1Dios ima nishcata huillaccunapac churicunami Eliseotaca:
—Riqui, cai canhuan causacuc huasica ñucanchicmanca uchillami.
2Chaimanta cunanca Jordán yacu ladoman rishpa, cada shuc jatun caspicunata pitishpa, chaipi causangapac huasita ruhuachun saqui— nirca.
Shina nicpimi Eliseoca:
—Richiclla— nirca.
3Shina nicpimi, paicunapuramanta shucca:
—Canta servic ñucanchic-huan jacuyari— nirca.
Shina nicpimi paica:
—Ñucapish rishallami— nirca.
4Eliseopish paicunahuan rircami. Jordán yacuman chayashpaca, yuracunatami pitircacuna.
5Chashna piticushpami shuc runaca hachata yacupi urmachirca. Chaimantami chai runaca Eliseotaca:
—¡Ñuca amolla! ¡Hachaca mañashcallami carca!— nishpa caparirca.
6Shina caparicpimi, Diospac runaca:
—¿Maipitac urmarca?— nishpa tapurca.
Shina tapucpica ricuchircami. Shina ricuchicpimi, Eliseoca shuc caspita pitishpa, hacha urmashca pushtupi shitashpa, hachata huambuchirca.
7Chashna huambuchishpami paica:
—Hachata japi— nirca.
Shina nicpimi, chai runaca hachata japirca.
Eliseo Siria soldadocunata apashcamanta8Siria llactata jatun mandacca israelcunahuanmi macanacucurca. Chaipimi paita servic soldadocunahuan tandanacushpaca: «Ñuca carpa huasicunaca cai pushtupi, chai pushtupimi canga» nirca.
9Chaimantami Diospac runaca Israel llactata jatun mandactaca: «Riqui, Siria soldadocunaca chai pushtutami pasagricun. Chaimanta ama chai pushtuta pasanguichicchu» nichun huillaccunata cacharca.
10Shina nicpimi, Israel llactata jatun mandacca Diospac runa huillashca pushtuta chapachun cacharca. Paicuna yallita cuidashpami, cutinpish, cutinpish chapachun cacharca.
11Chaimantami Siria llactata jatun mandacca caita chaita shungupi yuyarishpa, paita serviccunata cayashpaca:
—¿Ñucanchicpuramanta maijantac Israel llactata jatun mandac-huan canguichic? ¡Chaita huillaichic!— nirca.
12Shina nicpi, servicpuramanta shucca:
—Jatun mandac, ñuca amolla, pipish mana huillashcanchicchu. Ashtahuanpish, Dios ima nishcata huillac Israel llactapi causac Eliseomi Israel llactata jatun mandacman huillan. Can sueñuna ucupi imata pacalla parlanacushcatapish tucuimi huillan— nirca.
13Shina nicpi, jatun mandacca:
—Ñuca chai runata prezuchun cachangapac, chai runa maipi cashcata ricungapac ri— nirca.
Shina nicpica:
—Riqui, paica Dotán pueblopimi causan— nishpa huillarca.
14Shina huillacpimi, chai jatun mandacca caballocunapi, carretacunapi soldadocunata, shinallatac chaquillahuan puric achca soldadocunata chai puebloman cacharca. Paicunaca tuta chayashpami, chai pueblotaca tucui muyunacushpa chaparcacuna.
15Diospac runata servic runa tutamanta llucshingapac utca jatarishpaca, chai tucui soldadocunapish, caballopi, carretapi cac tucui soldadocunapish, chai pueblota tucui muyunacushpa shayacuctami ricurca. Chaita ricushpami, chai servicca:
—¡Aij, ñuca amolla! ¿Imatatac ruhuashunyari?— nirca.
16Shina nicpimi Eliseoca:
—Ñucanchic-huan caccunami paicunahuan cacta atishpa ashtahuan achcacuna. Chaimanta ama manchaichu— nirca.
17Chaimanta Eliseo Diosta mañashpaca: «Mandac Dioslla, pai ricuchun paipac ñahuita pascaiyari» nishpa mañarca.
Chashna mañacpimi, Mandac Diosca chai servicpac ñahuita pascarca. Chashna pascacpimi, paica Eliseopac muyundipi caballocunapi ric gentecuna nina japirishca carretacuna chai loma junda shayacucta ricurca.
18Siria llactamanta soldadocuna ña uraiman shamui callaricpimi, Eliseoca Mandac Diostaca: «Cai gentecunata ñahui mana ricucta ruhuashpa llaquichi» nishpa mañarca.
Eliseo mañashca shinallatacmi, ñahui mana ricucta ruhuashpa llaquichirca.
19Chai quipami, Eliseoca chai gentecunataca: «Mana cai ñanchu. Caica mana cancuna mashcacushca pueblochu. Ñucata catichic. Ñucami cancuna mashcacushca runapacman pushasha» nirca.
Shina nishpami, Samaria puebloman pusharca.
20Ña chai puebloman chayacpi Eliseoca: «Mandac Dioslla, paicuna ricuchun paicunapac ñahuita pascai» nirca.
Shina nicpimi, Mandac Diosca paicunapac ñahuita pascarca. Shina pascacpica, paicunaca Samaria pueblo chaupipi shayacushcatami ricurca.
21Israel llactata jatun mandac paicunata ricushpami Eliseotaca:
—Ñuca taitalla, ¿paicunataca huañuchishachu? ¿Huañuchishallachu?— nirca.
22Shina nicpimi paica:
—Ama huañuchichu. ¿Cambac espadahuan, cambac arcohuan macanacuita mishashpa prezu japimushcacunataca huañuchinguimanchu? Ashtahuanpish paicunapac amopacman cutichun, micuchun, ubiachun, tandata, yacuta cui— nirca.
23Shina nicpimi, jatun micuita ruhuarca. Chaita ña micushca, ubiashca quipaca chai soldadocunata cachacpimi, paicunapac amopacman cutimurca. Chai punzhamanta pachami Siria llactamanta tandanacushpa macanacuc soldadocunaca mana ashtahuan yaicurca.
Eliseoca Samariapi ima tucunata huillashcamanta24Chai quipami, Siria llactata jatun mandac Ben-adadca tucui paipac soldadocunata tandachishpa, huichai shamushpa Samaria pueblota tucui muyurca.
25Chashna muyunacushpa shayacucpimi, Samaria pueblopica achca yarcai callarirca. Shuc burro umataca pusac chunga siclos cullquipi, chaupi libra paloma huanutaca pichca siclos cullquipimi catuc carca.
26Shuc punzhami Israel llactata jatun mandacca jatun pirca jahuata puricurca. Chaita shuc huarmi ricushpaca:
—¡Ñuca amo jatun mandaclla, llaquishpa ayudaiyari!— nishpa caparirca.
27Shina caparicpi jatun mandacca:
—Mandac Diospish llaquishpa mana ayudacpica, ¿ñucacarin ima shinatac ayudashayari? ¿Trillana eramanta, mana cashpaca, uvas cutanamantachu cusha?— nirca.
28Shinallatac jatun mandac cutin rimashpaca:
—¿Imatac tucunguiyari?— nirca.
Shina nicpi, chai huarmica:
—Cai huarmica ñucataca: “Cambac huahuata cunan micungapac apamui. Ñuca huahuataca caya micushunllami” nirca.
29Shina nicpimi, ñuca huahuataca yanushpa micurcanchic. Cayandi punzha ñucaca: “Cambac huahuata micungapac apamui” nircani. Ashtahuanpish paipac huahuataca pacashpami rishca— carca.
30Chai huarmi chashna nicta jatun mandac uyashpaca, paipac churanata lliquirishpami, chai lliqui churanallahuantac chai pirca jahuata puricurca. Chashna puricucpimi, gentecunaca sharpa churanahuan paipac cuerpota tapashcata ricurca.
31Chai quipami jatun mandacca: «¡Safatpac churi Eliseopac umata cunan mana piticpica, Diosllatac yallita llaquichichun!» nirca.
32Jatun mandac shuc runata Eliseopacman cachacpica, paica paipac huasipimi yuyac runacunahuan carca. Ashtahuanpish, huillangapac shamuc runa manarac chayamucpimi, Eliseoca yuyac runacunataca:
—Huañuchic runaca ñuca umata pitichunmi cachashca. Chai huillangapac shamuc runa shamucpica, punguta huichcashpa, ama yaicuchinguichu. Paipac amopish paipac huashatami sarushca uyarishpa shamucun— nirca.
33Eliseo paicunahuan chashna parlacucpimi, Eliseopacman huillac runa chayashpaca: “¡Mana llullashpami nini! Cai llaquicunaca Mandac Diosmantami shamun. Shina cashpaca, ¿imatatac Mandac Diosmantaca shuyashayari?” nirca.
Who We AreWhat We EelieveWhat We Do
2025 by iamachristian.org,Inc All rights reserved.
