1Mandac Diosca: «Israelcunalla,
ñucapacman cutishpaca,
tucui shunguhuan cutimuichic.
Yanga dioscunata saquichic.
Ñucamanta ama ashtahuan
anchurichicchu.
2Mandac Dios ñucapac
shutipi ari nishpaca,
mana llullashpa cashcata nichic.
Shina ruhuacpica, shuctac
llactacunapi causaccunapish,
ñucamantami bendiciashca canga.
Ñucahuanmi cushicunga.
3Mandac Dios ñuca Judá llactapi
causaccunatapish, Jerusalenpi
causaccunatapish rimashpaca:
Samarishca allpata yapuichic.
Casha chaupicunapica
ama tarpuichicchu.
4Judá llactapi causaccunalla,
Jerusalenpi causaccunalla,
circuncisionta ruhuashpa,
cancunapac shungumanta
asha carata pitic shina,
ñucapacman cuichic.
Cancuna mana allita
ruhuashcamantaca pacta nina
japiric shina piñariman.
Chai piñarishca nina shinataca
pi mana huañuchi pudingachu nini»
ninmi.
Judá llactata llaquichinamanta5Mandac Diosca: «Judá llactapipish,
Jerusalenpipish:
“¡Cai llactapi cornetapi
tocaichic!” nichicyari.
Shinallatac sinchita caparishpa:
“¡Muyundita pircashca
llactacunaman tandanacushpa
yaicushunchic!” nichicyari.
6¡Sión ladoman banderata
alzaichicyari!
¡Ama unaiyashpa miticungapac
callpaichic!
Jahua lado llactamantami
yalli llaquichicta cachagrini.
Chaica yalli llaquimi canga.
7Leonmi sacha ucumanta shamucun.
Llactacunata tucuchingapacmi
pai tiyacushca pushtumanta
caiman shamungapac,
ñanman llucshishca.
Cancunapac llactacunapica
shuc runallapish mana
saquiringachu.
Tucui tucuchishcami canga.
8Chaimanta sharpa churanata
churarishpa, yallita llaquirishpa,
caparishpa huacaichicyari.
Mandac Dios ñucaca
cancunahuan piñarishcami cani» ninmi.
9Mandac Diosca:
«Chai llaqui punzhacunapica,
jatun mandacpac shungupish,
pai churashca mandaccunapac
shungupish yallita manchaihuanmi
shaicushca shina tucunga.
Curacunapish mancharishpami
musparinga.
Ñucamanta huillaccunapish
manchaihuan chucchungami» ninmi.
10Shina nicpimi ñucaca:
«¡Aij, Mandac Dioslla!
Ñucanchicca espadahuan
huañunallami canchic.
Judá llactapi,
Jerusalenpi causaccunata:
“Cancunaca cushi causaitami
charinguichic” nishpaca,
llullashcanguimi» nircani.
11Chai punzhacunapica
Judá llactapi,
Jerusalenpi causaccunataca:
«Ñuca llactapi causaccunapacmanca
shitashca urcumantami
chaquishca huaira shamurca.
Chai huairaca mana granota
chuyayachic huairachu.
12Chai huairaca ñuca cachashca
ashtahuan sinchi huairami.
Cunanca ñucami paicunataca
taripashpa llaquichigrini.
13Piñac runacunaca
puyu huichai shamuc shina,
carretacunaca acapana huaira
shinami shamun.
Caballocunaca
angata yallimi callpan.
Chashna shamucpica cancunaca:
“¡Aij, ñucanchiclla, imachari
tucushun!” ninguichicmi.
14Jerusalenpi causaccunalla,
cancuna quishpiringapacca
cancunapac shungu mapayashcata
maillarichicyari.
¿Ima horascamantac millaillata
ruhuana yuyaihuan
causagringuichic?
15Dan llactamanta,
Efraín urcumantami
llaqui tiyashcataca
huillangapac shamucun.
16Shuctac llactacunatapish,
Jerusalentapish:
“Caru llactamantami soldadocunaca
muyunacushpa, Judá llactacunapi
causaccunata llaquichingapac
caparishpa shamucun” nichicyari.
17Cancunallatac mana
cazushcamantami chai soldadocunaca
chagrata cuidac runacuna shina,
muyundipi chapacun.
Chaitaca Mandac Dios ñucami nini.
18Cancuna mana allita ruhuashpa
causashcallatacmi cancunataca
llaquichirca.
¡Chai jayac shina llaquimi
shunguman chayashpa,
yallita llaquichishca!» ninmi.
Israel llaqui tucushcamantaJeremías llaquirishcamanta19Shina nicpimi Jeremiasca:
«¡Aij, ñuca shungulla,
ñuca shungulla!
Ñuca shunguca nanaihuan
pitirigrinmi.
Ñuca shunguca yallitami saltacun.
Jatun macanacuita huillac
cornetapi tocashcatapish,
yallita caparishcatapish
uyashpaca, ¡ima shinatac
upalla cashayari!
20Yalli llaquicuna shamucushcataca
catintami huillan.
Tucui llactacunami tucuchishca.
¡Cungaillami ñuca
carpa huasicunatapish,
cortinatapish lliquishpami
tucuchincuna!
21¿Ima horascamantac urcupi
banderata ricushayari?
¿Ima horascamantac cornetapi
tocashcata uyashayari?
22Ñuca acllashcacunaca ñucata
mana ricsic yuyai illaccunami.
Ñuca huahuacunaca imatapish
mana yachac, imatapish
mana entendiccunami.
Millaita ruhuanataca
allita yachancunami.
Ashtahuanpish allita ruhuanataca
mana yachancunachu.
23Cai pachata ricucpica,
llaquinayaita tucuchishca,
imapish mana tiyarcachu.
Cutin jahua pachata ricucpica,
ima achicpish mana tiyarcachu.
24Urcucunata ricucpica
chucchucurcami.
Lomacunapish cuyuricurcami.
25Tucui muyundita ricucpica,
shuc runallapish
mana ricurircachu.
Tucui volac animalcunapish
rishcami carca.
26Alli pucuc allpacunata
ricucpica,
shitashcami saquirishca carca.
Mandac Diosca yallita piñarishpami,
tucui llactacunatapish,
paipac ñaupapi tucuchishca
carca» nircani.
27Mandac Diosca:
«Tucui llactata tucuchishpapish,
mana tucuita tucuchishachu.
28Chaimantami cai pachaca
yana churanata
churarishca shina tucunga.
Jahua pachapish purayangami.
Chaita ruhuanataca
ñucallatacmi yuyarircani.
Chaitaca manatac saquishachu.
Ñuca ruhuasha nishcataca
ruhuashatacmi.
29Caballopi montac soldadocunapish,
flechata cacharic soldadocunapish
yallita tulun nishpa
shamucucta uyashpami
llactapi causaccunaca
jatun sachacunapi,
rumi quingraicunapi miticunga.
Tucui llactacunata shitashpa
rishcamantami shucllapish
mana tiyanga.
30Can chai llaquihuan cashpaca,
¿imatatac ruhuangui?
Sumac pucanlla churanata
churarishcapish,
sumac coronata churarishcapish,
cambac ñahui millmacunata
yananllata ruhuashca cashpapish
imata mana ruhuai pudinguichu.
Yangami sumacta allichiringui.
Canta cuyaccunaca
canta piñashpami,
huañuchingapac mashcancuna.
31Punta sajuaric huarmi shina,
llaquinayaita caparicuctami
uyarcani.
Sionpi causaccunami
yallita caparishpa huacacun.
Paicuna maquita chutashpaca:
“¡Aij ñucalla, cunanca
imachari tucusha!
Ñucaca huañugrinimi.
Cai runacunami ñucataca
tucuchigrin”
nishpami caparicun» ninmi.
Who We AreWhat We EelieveWhat We Do
2025 by iamachristian.org,Inc All rights reserved.