1Maijanpish jahua pachapi causac
Diospi miticucca tucuita ruhuac Dios
cuidashcami causan.
2Chaimantami Mandac Diostaca:
«Canca ñuca miticuna,
ñuca jarcarina jatun
torre shinami cangui.
Canpimi shunguta churani» nini.
3Paimi pacallapi churashca tucllamanta,
huañuchic ungüimantapish huacaichin.
4Paipac plumahuan pacashpami,
paipac alas ucupi cuidashpa charinga.
Cashcata nic cashcahuanmi
escudo shina, fierro churana shina
huacaichinga.
5Chashna cashcamanta tutaca
ima manchaitapish mana charinguichu.
Flechahuan punzha huañuchictapish
6tuta shamuc mapa ungüitapish,
punzha pacha huañuchiccunatapish
mana manchanguichu.
7Cambac lluqui ladopi huaranga,
alli ladopi chunga huaranga
urmashpa huañucpipish,
cantaca pi imata mana ruhuangachu.
8Canca Diosta mana manchaccuna
llaquita apacuctaca
cambac ñahuihuantacmi ricungui.
9Jahua pachapi causac
ñuca miticuna Mandac Diostami
cambac huasita ruhuashcangui.
10Chashna cashcamantaca ima llaquipish,
ima ungüipish cambac huasimanca
mana yaicungachu.
11Paipac angelcunatami
can mai ñanta ricpipish,
cuidachun cachanga.
12Cambac chaqui rumipi
ama mitcarichunmi
paicunapac maquipi apanga.
13Leonpac, culebrapac
jahuatami puringui.
Maltón leontapish,
huañuchic culebratapish sarunguimi.
14Sumac Diosca:
«Paitaca ñucata cuyashcamantami
quishpichisha.
Ñuca shutita ricsishcamantami
ashtahuan jahuapi churasha.
15Pai ñucata mañacpica,
ñucaca uyashami.
Pai yallita llaquihuan cacpica,
ñucaca paihuanmi casha.
Paita quishpichishpami
alli nishca cachun ruhuasha.
16Paimanca unai huatacunatami
causachun saquisha.
Paita quishpichishpami
cushichisha» nirca.
Who We AreWhat We EelieveWhat We Do
2025 by iamachristian.org,Inc All rights reserved.
