1Moisesca shitashca pamba Moabmanta rishpaca, Jericomanta chimbapurapi cac Nebo urcuman rishpami, Pisga urcu jahuaman chayarca. Mandac Diosca Galaad llactamantaca Danpac llactacamanmi tucui llactata ricuchirca.
2Neftalipac, Efrainpac, Manasespac shinallatac tucui Judapac llactacunatapish jatun mama cuchacamanmi ricuchirca.
3Neguev llactata, Jericó pambacunatapish, palmacuna tiyac llactatapish Zoar llactacamanmi ricuchirca.
4Chai tucuita ricuchishpami Mandac Diosca:
«Cai llactacunatami Abrahamman, Isaacman, Jacoboman cungapac ari nishpaca: “Cambac huahua huahuacunamanmi cusha” nircani. Ñucaca cai llactacunata ricuchun saquinimi. Shina cacpipish, mana chaiman pasanguichu» nirca.
5Mandac Diosta servic Moisesca pai nishca shinami Moab llactapi huañurca.
6Shinami Moisestaca Bet-peor chimba ladopi cac Moab llacta pambapi enterrarca. Pai enterrashca jutcutaca cunancaman pi mana yachanchu.
7Moisesca patsac ishcai chunga huatayuc cashpami huañurca. Paica jaicapi ñahui mana shuctaclaya tucurcachu. Alli sinchimi carca.
8Israelcunaca Moisés huañushcamantaca quimsa chunga punzhacamanmi Moab pambapica huacarca. Chashnami Moisesmanta llaquirina punzhacuna pactangacaman carca.
9Nunpac churi Josueca Moisés maquita uma jahuapi churashcamantami alli yachac carca. Chaimantami israelcunaca Mandac Dios Moisesta mandashca shina Josué tucui nishcata cazurca.
10Israel llactapica Moisés shina, Mandac Dios-huan ñahui ñahui parlac Diosmanta huillacca mana pi tiyarcachu.
11Mandac Dios Moisesta mandacpi, tucui ricuchinacunata, mancharinacunata Egipto llactapi Faraonman, paita serviccunaman, chaipi causaccunaman ruhuashpa ricuchishca shinataca pi mana ruhuarcachu.
12Moisesca pi mana ruhuaipaccunatapish, jatun mancharinacunatapish ruhuashpa, tucui israelcunaman ricuchircami. Pai ruhuashca shinataca pi mana ruhuarcachu.
Who We AreWhat We EelieveWhat We Do
2025 by iamachristian.org,Inc All rights reserved.
