1 CRÓNICAS 24 - Biblia Quichua Cañar 2010

Diospac huasipi servic curacunamanta

1Aaronpac huahua huahuacunapish Diosta servingapacmi caishuc chaishuc chaupirinacurca. Aaronpac churicunaca: Nadab, Abiú, Eleazar, shinallatac Itamarmi carca.

2Nadabpish, Abiupish huahuacunata manarac charishpami, paicunapac taita manarac huañucpi huañurca. Chaimantami Eleazar, shinallatac Itamar curacuna tucurca.

3Davidca Eliazarpac huahua huahuapuramanta Sadoc curahuan, Itamarpac huahua huahuapuramanta Ahimelec curahuanmi, curacunata chaupishpa servichun churarca.

4Eleazarpac huahua huahuapuramantami Itamarpac huahua huahuapuracunata ashtahuan mandaccuna tiyarca. Chaimantami, Eleazarpac huahua huahuapuramanta paicunapac ñaupa taitacunapac huasi ucupurata mandaccunataca chunga sucta curacunata churarca. Itamarpac huahua huahuapuramanta paicunapac taitacunapac huasi ucupurata mandaccunaca pusac curacunami carca.

5Eleazarpac, Itamarpac huahua huahuacunamantaca, Diospac huasipi mandaccunapish, Diospac huasipi imata ruhuaccunata mandaccunapish cashcamantami suerteta ruhuashpa chaupirca.

6Levitapuramanta Natanaelpac churi Semaiasca quillcacmi carca. Paica jatun mandacpac, quipa mandaccunapac, Sadoc curapac, Abiatar curapac churi Ahimelecpac, paicunapac ñaupa taitacunapac huasi ucupurata mandac curacunapac, levitacunapac ñaupapimi paicunapac shuticunata quillcarca. Eleazarpac huahua huahuapuramantaca paicunapac huasi ucupurata mandactami suerteta ruhuashpa, ishcaita acllarca. Itamarpac huahua huahuapuramantaca shuctami acllarca.

7Punta suerteca Joiaribmanmi urmarca. Quipataca Jedaiasman,

8quimsaniquica Harimman, chuscuniquica Seorimman,

9pichcaniquica Malquiasman, suctaniquica Mijaminman,

10canchisniquica Cosman, pusacniquica Abiasman,

11iscunniquica Jesuaman, chunganiquica Secaniasman,

12chunga shucniquica Eliasibman, chunga ishcainiquica Jaquimman,

13chunga quimsaniquica Hupaman, chunga chuscuniquica Jesebeadman,

14chunga pichcaniquica Bilgaman, chunga suctaniquica Imerman,

15chunga canchisniquica Hezirman, chunga pusacniquica Afsesman,

16chunga iscunniquica Petaiasman, ishcai chunganiquica Hezequielman,

17ishcai chunga shucniquica Jaquinman, ishcai chunga ishcainiquica Gamulman,

18ishcai chunga quimsaniquica Delaiaman, ishcai chunga chuscuniquica Maaziasmanmi urmarca.

19Israelcunata Mandac Dios paicunapac ñaupa taita Aaronta mandashca shinallatacmi paicunataca Mandac Diospac huasiman yaicushpa, Diospacta ruhuanapi chaupishpa churarca.

20Saquirishca levitacunaca: Amrampac huahua huahuapuramantaca Subael, Subaelpac huahua huahuapuramantaca Jehedías,

21Rahabiaspac huahua huahuapuramantaca Isías, paica mandacmi carca.

22Izharpac huahua huahuapuramantaca Selomot, Selomotpac huahua huahuapuramantaca Jahatmi carca.

23Hebronpac huahua huahuapuramantaca puntaca Jerías, quipaca Amarías, quimsaniquica Jahaziel, chuscuniquica Jecamanmi carca.

24Uzielpac huahua huahuapuramantaca Micaía, Micaiaspac huahua huahuapuramanta Samirmi carca.

25Micaiaspac huauquica Isiasmi carca. Isiaspac huahua huahuapuramantaca Zacariasmi carca.

26Meraripac huahua huahuapuramantaca Mahli, shinallatac Musimi carca. Jaaziaspac huahua huahuapuramantaca Benomi carca.

27Meraripac huahua huahuapuramanta Jaaziasmanta tiyashca churicunaca: Beno, Soham, Zacur, shinallatac Ibrimi carca.

28Mahlipac huahua huahuapuramantaca Eleazarmi carca. Paica mana huahuacunata charircachu.

29Cispac churi Jerameelpishmi carca.

30Musipac huahua huahuapuramantaca Mahli, Edar, shinallatac Jerimotmi carca.

Paicunami paicunapac ñaupa taitacunapac huasi ucupuramantaca carca.

31Paicunapish paicunapac aillu Aaronpac huahua huahuacuna shinallatacmi Diosta servingapac suerteta ruhuarcacuna. Paicunaca jatun mandac Davidpac, Sadocpac, Ahimelecpac, ñaupa taitacunapac huasi ucupurata mandac curacunapac, levitacunapac ñaupapimi suerteta ruhuarcacuna. Chashnami taitacunata mandaccunatapish, paicunapac quipa huauquicunatapish, ruhuarcacuna.