1Mandac Diosta jatunyachishpa
cantanaca mai sumacmi.
Jahua pachapi causac Dioslla,
canta salmocunahuan cantana sumacmari.
2Can llaquic cashcata tutamanta huillana,
can cashcata nic cashcata tuta huillanaca
mai sumacmi.
3Chunga cuerdayuc tocanapi, salteriopi,
arpapi sumacta tocashpami cantani.
4Mandac Dioslla,
can ruhuashcacunahuanca
cushichishcanguimi.
Cambac maquicunahuan ruhuashcata
ricushpami yallita cushicuni.
5¡Mandac Dioslla,
can ruhuashcacunaca mai jatunmi!
¡Cambac yuyaica pi mana entendipac
yallita jatunmi!
6Mana entendic runaca
caitaca mana yachanchu.
Yuyai illac runaca mana entendinchu.
7Diosta mana manchaccuna
quihua shina huiñashca cashpapish,
millaita ruhuaccuna,
yura sumacta sisac shina cashpapish,
huiñaita chingaringapacmi cancuna.
8Mandac Dioslla, canca huiñaita
jahua pachapi causac Diosmi cangui.
9Mandac Dioslla,
canta piñaccunaca chingaringami.
Millaita ruhuaccunataca
caita chaitami cachangui.
10Shina cacpipish canca
sacha huagrata shinami
ñucataca sinchiyachingui.
Ashtahuan alli aceitehuanmi
cahuishca casha.
11Ñucata piñaccuna llaqui tucuctaca
ñuca ñahuihuantac ricuchun,
ñucata mana ricunayachiccuna
aij nicuctaca ñuca ringrihuantac
uyachunmi saquishcangui.
12Cashcata ruhuaccunaca
palmera yura shinami sisacunga.
Líbano urcupi tiyac cedro
shinami huiñanga.
13Mandac Diospac huasipi tarpushca shinami,
Diospac huasi canzha pambapica sisanga.
14Yuyac cashpapish alli granota
pucuc yura shinami canga.
Paicunaca verdinlla yuracuna
shinami sinchi canga.
15Chaica: «Ñucanchicta
huacaichic Diosca cashcata ruhuacmi,
jucha illacmi» nishpa huillangapacmi
chashna canga.
Who We AreWhat We EelieveWhat We Do
2025 by iamachristian.org,Inc All rights reserved.
