1Filisteocunaca tucui paicunapac soldadocunatami Afec pueblopi tandachirca. Shinallatac israelcunaca Jezreel pueblo ladopi cac tucyac yacu ladopimi carpa huasicunata shayachishpa tiyarirca.
2Filisteocunata mandaccuna paicunapac soldadocunata patsacpi, huarangapi tandachishpa paicunapac ñaupata ricucpica, Davidpish, paipac runacunandimi Aquis jatun mandacta cuidashpa huashata caticurca.
3Chaita ricushpami, filisteocunata mandaccunaca:
—¿Cai hebreocunaca imatatac caipica ruhuacuncuna?— nirca.
Shina tapucpimi, Aquisca filisteocunata mandaccunataca:
—Paica Israel llactata jatun mandac Saulta servic Davidmari. Paica tauca punzhacunata, huatacunatami ñucahuan causarca. Ashtahuanpish paica ñucapacman shamushca punzhamanta pacha, cunan punzhacaman ima mana allitaca mana ruhuashcachu— nirca.
4Shina nicpimi, filisteocunata mandaccuna yallita piñarishpa Aquistaca:
—Cai runa ñucanchic-huan macanacuiman richunca mana munanchicchu. Maipi cashcallamantac cutichishpa cachai. Pacta macanacuipi ñucanchicta piñaccunahuan tucunman. Cai filisteo runacunapac umacunata apashpa, paita mandacpac ñaupapi alli ricurigrinman.
5¿Manachu cai Davidta:
“Saulca huaranga runacunatami
huañuchirca, cutin Davidca
chunga huaranga runacunatami
huañuchirca” nishpa
cantashpa danzarcacuna?— nirca.
6Shina nicpimi, Aquisca Davidta cayashpaca:
—¡Mandac Diospac shutipimi nini: Canca cashcata ruhuacmi cangui! Maiman rishpapish, cutimushpapish allita ruhuashpami ñuca carpa huasipica causacungui. Ñucapacman shamushca punzhamanta pacha, cunancaman ima mana allita ruhuactapish cantaca mana ricushcanichu. Ashtahuanpish caishuc mandaccunapac ñaupapimi mana alli ricuringui.
7Shina cashcamanta filisteocunata mandaccunata ama ashtahuan piñachingapac, mana piñarishpa sumacta cutilla— nirca.
8Shina nicpimi, Davidca Aquistaca:
—¿Imatatac ruhuashcani? ¿Cambacman shamushca punzhamanta cunancaman canta servic ñucataca ima mana alli ruhuashcatatac ricushcangui? ¿Ima nishpatac jatun mandac ñuca amota piñaccunahuan macanacuchunca mana apasha ninguiyari?— nirca.
9Shina nicpimi, Aquisca Davidtaca:
—Canca ñuca ñaupapica Diospac ángel shina, alli cactami ricuni. Ashtahuanpish filisteocunata mandaccunami: “Paica cai macanacuiman manatac ñucanchic-huan ringachu” nincuna.
10Shina cashcamanta caya tutamanta utca jatarishpa canpish, canhuan shamushca canta mandacpac serviccunapish ña achicyacpi ringuichicllami— nirca.
11Shina nicpimi, Davidca paipac runacunandi filisteocunapac llactaman cutishpa ringapac tutamanta utca jatarirca. Shinallatac filisteocunaca Jezreel pueblomanmi rirca.
Who We AreWhat We EelieveWhat We Do
2025 by iamachristian.org,Inc All rights reserved.
