1Mandac Dios rimashpaca:
2«Huañunalla runa, Israel llacta urcucunata ricushpa, llaquichina cashcata huillai.
3Chai urcucunataca: “¡Israel llacta urcucunalla, Mandac Dios rimashcata uyaichic! Mandac Dios urcucunatapish, lomacunatapish, chaipi tiyac yacucunatapish, pambacunatapish rimashpaca: Riquichic, ñucami cancunata llaquichichun, jatun macanacuita cachashpa, lomacunapi tiyac altarcunatapish tucuchigrini.
4Cancunapac altarcunatapish, inciensota rupachina altarcunatapish ñutuchishpami chingachisha. Runacunaca ruhuashcalla dioscunapac ñaupapimi huañunga.
5Israelcuna huañushca cuerpocunataca ruhuashcalla dioscunapac ñaupapi churashpami, tullucunataca cancunapac altar muyundipi shic-huasha.
6Cancuna causana llactacunapish, lomacunapi tiyac altarcunapish chingachishcami canga. Cancunapac altarcunaca tucui polvoshca, ruhuashcalla dioscunaca paquishca, inciensota rupachina altarcunaca tucui chingachishcami canga. Shinallatac cancuna ima ruhuashcapish tucui chingachishcami canga.
7Huañushcacunapish cancunapac chaupillapitacmi urmanga. Chaita ricushpami, ñucataca Mandac Dios cashcata yachanguichic.
8Jatun macanacuipi mana huañushpa, saquiriccunaca caita chaita rishpami, tucui llactacunapi causanga.
9Cancunapuramanta mana huañushpa saquiriccunaca shuctac llactacunapi prezu causacushpami, paicunapac shungupi huainayac shina, ruhuashcalla dioscunata paicunapac shungupi munashpa, ñucamanta anchuringa. Chaimantami ñuca ima shina llaquichishcata yuyaringa. Paicuna millana juchacunata ruhuashcata yuyarishpaca, yallita pingangami.
10Chaimantami ñucataca Mandac Dios cashcata, shinallatac llaquichishami nishpa mana yanga nicushcata yachangacuna” ninmi ningui» nirca.
11Mandac Diosca: «Maquicunahuan huactarishpa, chaquihuanca tacarishpa: “Cai tucui millaita ruhuac israelcunaca, ¡Aij, imachari tucunga! ¡Paicunaca jatun macanacuipi yarcaihuan, ungüicunahuanmi huañunga!
12Carupi caccunaca ungüicunahuan, ladollapi caccunaca jatun macanacuipimi huañunga. Cutin mana huañushpa saquiriccunaca yarcaihuanmi huañunga” niyari. Chashnami ñuca piñarishcataca paicunata llaquichishpa pasachisha.
13Ruhuashcalla dioscunapac chaupipi, tucui altar muyundipi, lomacunapi, urcucunapi, jatun yura ucucunapi, chai dioscunaman cushpa, rupachina pushtucunapimi paicuna huañushcacunaca siricunga. Shina siricucta ricushpami, ñucataca Mandac Dios cashcata yachanguichic.
14Ñucaca llaquichishpami paicuna causana llactatapish, ura ladopi cac shitashca pambamanta jahua Diblat llactacaman tucuchisha. Chashna ruhuacta ricushpami, ñucataca Mandac Dios cashcata yachangacuna» nirca.
Who We AreWhat We EelieveWhat We Do
2025 by iamachristian.org,Inc All rights reserved.
