1Mandac Dioslla, cantaca cuyanimi.
Canca ñucapac jarcarina
jatun pirca shinami cangui.
2Mandac Dioslla,
jatun rumimari cangui.
Ñucata cuidashpa,
llaquimantapish quishpichicmi cangui.
Ñuca Dioslla,
muyundita jarcac jatun
pirca shinami cangui.
Canpimi miticusha.
Ñucata jarcac escudomi cangui.
Tucuimanta yalli jatun
ñuca miticunamari cangui.
Ñucata quishpichicmi cangui.
3Mandac Dios cantami mañasha.
Canca alabanatacmi cangui.
Canta mañashpami piñaccunapac
maquimanta quishpichishca casha.
4Huañuchic llaquicunami
pilluc shina japirca.
Millaicunaca jatun yacu
jundac shinami
yallita manchachirca.
5Seolman ringapac ña huatashca
shinami carcani.
Huañuchic tucllatami churarcacuna.
6Llaquihuan cashpaca Mandac Diostami
caparishpa mañarcani.
Ñuca mañashcataca paipac
huasimantami uyarca.
Ñuca caparishcaca paipac
ringrimanmi uyarirca
7Pai piñaricpica, cai pachaca
mancharinatami chucchurca.
Jatun urcu callari
rumicunapish chucchurcami.
8Paipac singamantaca
cushnimi llucshirca.
Shimimantaca tucuchic
ninami llucshirca.
Nina carboncunami
chaimanta llucshicurca.
9Jahua pachata pascashpami
urai shamurca.
Paipac chaqui ucupica
amsa puyumi tiyarca.
10Shuc querubinpi
tiyarishpami volarca.
Huaira alascunapi
tiyarishpami rirca.
11Pai miticungapacca
amsa tutatami churarca.
Cortina shinatami paipac
muyundita churarca.
Jahua catataca tamyanalla
tendiricuc yana puyutami churarca.
12Paipac achic nicucmantaca
puyupish, rundupish, jagan nicuc
nina carbonpish llucshirca.
13Jahua pachapi causac
Mandac Diosca tulun nishpami
uyarirca.
Rundupish, jagan nicuc nina
carbonpish urmarcami.
14Piñaccunataca paipac rayohuanmi
caita chaita callpachirca.
Paipac relampahuanmi
paicunataca tucuchirca.
15Mandac Dioslla,
can piñarishpa pucucpica,
mama cucha ucu allpapish,
cai pacha callari rumicunapish
ricurircami.
16Diosmari jahuamanta
paipac maquita chutashpa,
ñucataca manchana jatun
yacumanta llucchirca.
17Ñucata piñac, mai sinchi
gentecunapac maquimantami
ñucata quishpichirca.
Paicunaca ñucata yalli
mai sinchicunami carca.
18Paicunaca ñucapac llaqui punzhami
llaquichingapac japircacuna.
Chashna cacpipish,
Mandac Diosmi ñucata ayudarca.
19Paica ñucata cuyashcamantami
jatun pambaman llucchishpa
quishpichirca.
20Mandac Diosca ñuca cashcata
ruhuashpa causac cacpimi
allicunata curca.
Ñuca maquihuan ima millaita
mana ruhuashcamantami
cuna cashcataca curca.
21Ñuca Mandac Dios mandashca shinami
paimanta mana caruyashpa causarcani.
Ñuca Diosmantaca mana caruyarcanichu.
22Pai yachachishcacunataca
yuyaipimi charini.
Pai quillcashpa mandashcamantaca
mana anchurishcanichu.
23Paipac ñaupapi allita ruhuashpami,
tucui millaimanta huacaichirishpa
causarcani.
24Mandac Diosca ñuca cashcata
ruhuashpa causac cacpimi
allicunata curca.
Ñuca maquihuan ima millaita
mana ruhuashcamantami
cuna cashcataca curca.
25Llaquiccunahuanca
llaquic cashcallatatacmi ricuchingui.
Mana pandaric runamanca
canpish allicunallatatacmi ruhuangui.
26Mapa illac runamanca
chuya cashcatami ricuchingui.
Ashtahuanpish millaita ruhuactaca
yallitami llaquichingui.
27Yangalla gentecunataca
quishpichinguimi.
Ashtahuanpish jatun tucushcacunataca
cumurichinguimi.
28Mandac Dioslla,
canmi ñuca lamparataca
japichishpa charingui.
Ñucata Mandac Dios canmi
amsapi cacpipish achicyachingui.
29Canhuanmi achca
soldadocunatapish mishasha.
Ñuca Dios-huanca jatun
pircacunatapish urmachishami.
30Dios ruhuashcacunapica
ima pandai mana tiyanchu.
Paipac rimashca shimicunapish
rupachishca cullqui shina
tucui mapa illacmi.
Canpi jarcariccunapacca
escudo shinami cangui.
31Mandac Dios shinaca
pi shuctac mana tiyanchu.
Ñucanchicta jarcac
jatun pirca shina Diosca
pi shuctac mana tiyanchu.
32Diosmi alli chumbillichic shina
fuerzata cun.
Paimi ñucataca mana pandarishpa
causachun cuidan.
33Paimi ñuca chaquicunatapish
taruga chaqui shina callpacta ruhuan.
Jahua urcucunapipish
ima manchai illactami charin.
34Paimi jatun macanacuipi
macanacuchunpish ñuca
rigracunata yachachin.
Chashna yachachicpimi,
bronce arcotapish cachari pudini.
35Canmi, cambac alli
maquihuan ñucata allipi churashpa
escudo shina jarcashpa quishpichingui.
36Ñuca chaquicuna ama lluchcarichunmi
ñuca purina ñantapish allichingui.
37Ñucata piñaccunata cati rishpa
llaquichircanimi.
Paicunata tucuchishpatacmi cutircani.
38Urmachishpa ñutushpami
chingachircani.
Ñuca chaqui ucumantaca
mana jatarircacunachu.
39Chumbillichic shina
fuerzata cushpami
jatun macanacuipipish mishachingui.
Ñucata piñaccunataca
ñuca chaqui ucupimi churangui.
40Ñucata piñaccunataca
catishpami callpachircangui.
Chashna ruhuacpimi, ñucata
piñaccunataca tucui tucuchircani.
41Paicuna caparicpipish
pi mana ayudarcachu.
Can Mandac Diostapish mañarcacunami,
canpish mana uyarcanguichu.
42Paicunataca ñuto allpata huairapi
chingachic shinami chingachircani.
Ñanpi siric turuta shinami sarurcani.
43Ñuca llacta gentecuna
yallita juchanchicpipish,
quishpichishpami llactacunata
jatun mandacta ruhuarcangui.
Ñuca mana ricsishca gentecunapish
ñucata servircacunami.
44Ñuca mañashcata uyashcahuanmi
cazurcacuna.
Shuctac llactamanta gentecunami
ñucata alli nincuna.
45Paicunaca manchaihuan
chucchushpami, paicunapac
ucumanta llucshin.
46¡Mandac Diosca causacunmi!
¡Ñuca jarcarina jatun rumica
alli nishca cachun!
Ñucata quishpichic Diosca
jatunyachishca cachun.
47Paica ñucata llaquichiccunata
llaquichic Diosmi.
Shuctac gentecunata
ñuca chaqui ucupi churacmi.
48Piñaccunapac maquimanta
quishpichingui.
Ñucata llaquichiccunapac jahuapi
ñucata churangui.
Huañuchicpac maquimantami
quishpichircangui.
49Chaimantami Mandac Dioslla,
tucui llacta gentecunaman
canmanta huillasha.
Cambac shutitaca salmocunahuanmi
cantacushalla.
50Pai churashca jatun mandactaca
jatun macanacuitapish mishachinmi.
Davidtapish, paipac
huahuacunatapish cuyashpami,
huiñaita pushanga.
Who We AreWhat We EelieveWhat We Do
2025 by iamachristian.org,Inc All rights reserved.
