JOB 33 - Biblia Quichua Cañar 2010

Eliú Jobta juchanchishcamanta

1Job, ñuca imata yuyarishcata uyai.

Ñuca tucui imata rimashcata

allita uyai.

2Ñuca shimihuanmi cantaca rimagrini.

Ñuca cungapi cac callumi

cantaca rimanga.

3Ñuca shungupi alli cashcatami

ñuca rimashpaca ricuchisha.

Ñuca shimica imatapish

cashcatatacmi rimanga.

4Ñucataca Diospac Espiritumi ruhuarca.

Tucuita ruhuac Diospac samaimi

causaita cun.

5Can cutichinata

pudishpaca cutichingui.

Ñuca ima nishcata cutichingapac

ñuca ñaupaman shamui.

6Canpish, ñucapish Diospac ñaupapica

chashnallatacmi canchic.

Ñucapish allpamanta

ruhuashcallatacmi cani.

7Ñuca rimashcacunaca

mana manchachingachu.

Ñuca maquipish cantaca

mana llaquichingachu.

8Canca ñucamantami rimarcangui.

Ñuca ringrihuantac

uyashca shimicunaca:

9“Ñucaca ima mapa illac

chuyami cani.

Ñucaca ima mana faltayucchu cani.

Ima millaita ruhuanatapish

mana yachanichu.

10Shina cacpipish Diosca

juchatami ñucapica tarishca.

Shina tarishpami ñucataca

paita piñacta shina ricucun.

11Ñuca chaquicunatapish

jutcushca caspipimi canichirca.

Ñuca maita ricpipish

chaparacunmi” nircangui.

12Uyai, can chashna nishpaca

pandaricunguimi.

Diosca runata yallimi.

Chaitami canmanca ricuchigrini.

13¿Ima nishpatac runa mañashcataca

mana uyanchu nishpa,

paitaca piñarishpa rimanguiyari?

14Ashtahuanpish Diosca runahuanca

shuctac shuctaclayami parlan.

Shina cacpipish,

runamari mana entendin.

15Runacunamanca muscuipipish,

muscuipi shina tuta

ricurishpami riman.

Runataca huañui sueñuhuan

camapi sueñucucpimi riman.

16Chashnami runapac ringrillapi

rimashpa, pai imata

nigricushcataca huillan.

17Runacunataca, mana allita

ruhuanamanta, jatun tucushpa

causanamanta anchuchingapacmi

chashnaca huillan.

18Chashnami enterrana jutcumanta,

espadapi huañunamanta quishpichin.

19Maijantaca sinchi ungüihuan,

maijantaca tullucunapi

mana anchuric nanaihuanmi llaquichin.

20Chai nanaihuan cashpami,

tandatapish sumaimana micunatapish

millanayachishpa mana micun.

21Paipac aicha tucurishpa caticpimi,

jaicapi mana ricurishca

tullucunapish ricuricun.

22Chashnami paipac causaica

enterrana jutcuman chayacun.

Paica ñami huañuiman chayacun.

23Diospac huaranga angelcunamanta

shuc ángel, runa allita ruhuana

cashcata Diosman tapuc

tiyashpachari alli canman.

24Pai tapushpa allita

tarishca cashpaca:

“Enterrana jutcumanta

quishpichircami.

Canca quishpirinata

tarircanguimi” ninmanmi.

25Shina mañacpica,

paipac cuerpoca huahuacunapac

cuerpota yalli huambra tucushpami

mosorac cashca punzhacunaman cutinman.

26Diosta mañacpica,

paica cuyanmanmi.

Paipac ñahuita ricushpami

cushicushpa caparinman.

Runataca cashcata ruhuactami ruhuanman.

27Runaca tucuipac

ñaupapi cantashpaca:

“Ñucaca juchatami ruhuashcani,

allita ruhuanapac randica

mana allitami ruhuashcani.

Shina cacpipish,

ñuca japina cashcataca

mana japishcanichu” ninmanmi.

28Diosmi paitaca enterrana

jutcumanta quishpichinga.

Shina cacpica, achicta ricushpami

paica causanga.

29Diosca chashnami tucuita ruhuan.

Runataca ishcai cutin,

quimsa cutinmi chashna ruhuan.

30Paitaca enterrana jutcuman

rinamanta quishpichingapac

causaita cuc luz-huan

achicyachingapacmi chashnaca ruhuan.

31Joblla, ñuca rimashcata

upalla uyai.

32Ima yuyaicunata charishpaca cutichi.

Ñucaca cantaca mana juchanchina

cashcatami huillasha ninimi.

Chaimanta imata nisha nishpaca nilla.

33Mana cashpaca upalla uyai.

Ñucami allita yachachisha

nini» nirca.