MARCOS 15 - Biblia Quichua Cañar 2010

Pilatopacman Jesusta apashcamanta(Mt 27.1-2,11-14; Lc 23.1-5; Jn 18.28-38)

1Tutamanta ña pacarimucucpimi, Israel curacunata mandac curacunaca pushac yuyaccunahuanpish, mandashcacunata yachachiccunahuanpish, caishuc mandaccunahuanpish parlangapac tandanacurca. Chai quipami, mandac Pilatopac ñaupaman Jesustaca huatashpa aparcacuna.

2Chaipimi Pilatoca:

—¿Canchu israelcunata Jatun Mandac cangui?— nirca.

Shina tapucpimi Jesusca:

—Ari, canllatac nishcanguimi— nirca.

3Curacunata mandac curacunaca caita chaita nishpami juchanchirca.

4Pilato cutin tapushpaca:

—Canta yallita juchanchicucpipish, ¿manachu imata ningui?— nirca.

5Ashtahuanpish, Jesusca upallami carca. Chaimantami Pilatoca mancharirca.

Jesús huañunamanta cutin huillashcamanta(Mt 27.15-31; Lc 23.13-25; Jn 18.38—19.16)

6Pascua fiesta punzhapi gentecuna shuc prezuta cacharichun nicpica, Pilatoca cacharicllami carca.

7Chai punzhapica Barrabasmi prezu carca. Paica caishuc runacunahuan tandanacushpami, jatun mandac-huan piñanacushca carca. Chaipi huañuchishcamantami carcelpi tiyacurca.

8Gentecunaca utcaman ruhuashca shinallatac shuc prezuta cacharichunmi Pilatoman mañangapac chayarca.

9Chashna mañacpimi Pilatoca:

—¿Israelcunata Jatun Mandactachu cacharichun ninguichic?— nirca.

10Pilatoca curacunata mandac curacuna envidiamanta Jesusta apamushcata yachashpami, chashnaca nirca.

11Ashtahuanpish chai mandac curacunaca Jesusta cacharinapac randica, Barrabasta cacharichun mañachunmi chaipi caccunamanca yuyaita curca.

12Pilato caccunata cutin tapushpaca:

—Israelcunata Jatun Mandac nishca runataca, ¿imatatac ruhuachun ninguichic?— nirca.

13Chashna tapucpica:

—¡Paitaca chacatailla!— nishpami caparircacuna.

14Chaimantami Pilatoca:

—Cai runaca, ¿ima mana allitatac ruhuashcayari?— nirca.

Chashna nicpicarin:

—¡Cai runataca chacatailla!— nishpami, ashtahuan caparircacuna.

15Pilatoca gentecunahuan alli saquiringaraicumi Barrabasta cacharichirca. Jesustaca azotichishpami, chacatachun soldadocunaman curca.

16Chaimantaca Pilato mandana jatun huasi pungu pambaman Jesusta apashpa, soldadocunata tandachirca.

17Chaipimi soldadocunaca morado churanata Jesusman pachallichishpa, casha anguta ahuashca coronata churachirca.

18Chashna churachishpa burlashpaca:

—¡Israelcunata Jatun Mandac, canca allimari cangui!— nircami.

19Chashna nishpami, Jesusta caspihuan umapi huactashpa, tucashpa cunguric tucushpa, mañac tucurca.

20Chashna burlashca quipami, morado churanata llucchichishpa, paipac churanallatatac cutin churachishpa, chacatangapac aparcacuna.

Jesusta cruzpi chacatashcamanta(Mt 27.32-44; Lc 23.26-43; Jn 19.17-27)

21Alejandropac, Rufopac taita, Cirene llacta Simonmi chagramanta shamurca. Paimanmi Jesuspac cruzta apachirca.

22Jesustaca Gólgota urcumanmi pusharcacuna. (“Gólgota” nishpaca, “Uma Tullu” nisha ninmi).

23Chai urcupimi Jesusmanca, mirrahuan chapushca vinota ubiachishun nirca. Paica mana ubiasha nircachu.

24Jesusta cruzpi chacatashpaca, paipac churanacunata maijanlla japingapacmi suerteta ruhuarca.

25Iscun horastami Jesusta chacatarca.

26Imamanta chacatashcataca caspipimi: “Caica Israelcunata Jatun Mandacmi” nishpa quillcarca.

27Jesus-huanca ishcai shuhuac runacunatapish, shuctaca alli maquiman, shuctaca lluqui maquimanmi chacatarca.

28Chashna chacatacpimi, Dios quillcachishcapi: «Juchayuccunahuanmi tandachishca canga» nishcaca pactarca.

29Chaita pasaccunaca umata cuyuchishpa, camishpaca:

—¡Jai, canca “Diosta mañana huasita urmachishpaca, quimsa punzhapi cutin shayachishallami” nircanguica!

30¡Cunanca, chacatashcamanta uricushpa, canllatac quishpiriyari!— nircacuna.

31Shinallatac curacunata mandac curacuna mandashcacunata yachachiccunahuan burlashpaca:

—Paica shuccunataca quishpichircami. Cunanca paillatacca mana quishpiri pudinchu.

32¡Israelcunata Jatun Mandac Cristo cashpaca, cunanllatac chacatashcamanta uricui, chaita ricushpaca, ñucanchicpish crinchicmanmi!— nircacuna.

Jesus-huan pacta chacatashca runacunapish, camishpa rimarcami.

Jesús huañushcamanta(Mt 27.45-56; Lc 23.44-49; Jn 19.28-30)

33Chaupi punzhamanta quimsa horas chishicamanmi, tucui cai pachaca amsayarca.

34Chai horasllatacmi Jesusca:

—Eloí, Eloí, ¿lama sabactani?— nishpa, sinchita caparirca. (Caica: “Ñuca Dios, ñuca Dios, ¿ima nishpatac ñucallata saquinguiyari?” nisha ninmi).

35Chaipi caccunapuramanta maijanca:

—Uyaichic, huillac Eliastami cayacun— nirca.

36Cutin shuc runaca esponjata apangapacmi callparca. Chaitaca jayac vinopi satishpami, caspi puntapi churashpa, Jesusman ubiachisha nishpa, shimiman chayachirca. Shina ruhuashpaca:

—Saquichic, Eliasca cruzmanta uricuchingapac shamucta ricungapac— nirca.

37Jesusca sinchita caparishcahuan huañurcallami.

38Jesús huañucpica, Diosta mañana huasi ucupi jarcachishca jatun lienzoca jahuamanta uraimanmi chaupita lliquirirca.

39Jesusta cruzpi chacatashca ladopica, patsac soldadocunata mandacmi shayacurca. Chai mandac, Jesús ima shina caparishpa huañucta ricushpaca:

—Cai runaca Diospac Churitacmi cashca— nirca.

40Shinallatac tauca huarmicunapish carullamanta ricushpami shayacurca. Chai huarmicunapurapica, Magdala pueblomanta Mariapish, quipa Jacobopac, Josepac mama Mariapish, Salomepishmi carca.

41Paicunami Galilea llactapi Jesús puricucpica, ayudashpa paita catishpa puriccuna carca. Jerusalén puebloman paihuan shamuc huarmicunapish chaipimi carca.

Jesusta enterrashcamanta(Mt 27.57-61; Lc 23.50-56; Jn 19.38-42)

42Cayandi samana punzhapac allichirina punzhaca, ñami chishiyarca.

43Chai chishimi Arimatea pueblomanta Joseca mana manchashpa, mandac Pilatopacman rishpa, Jesuspac cuerpota enterrangapac mañarca. Paica tandanacushca mandaccunapurapica, mai alli nishca runami carca. Paipish Dios mandacucta ricusha nishpami shuyacurca.

44Pilatoca Jesús huañushcata uyashpami, mancharirca. Chaimantami patsac soldadocunata mandacta cayashpa tapurca.

45Patsac soldadocunata mandac huillacpimi, Pilatoca Jesuspac cuerpota enterrachun Joseman curca.

46Chaimantami Joseca shuc jatun lienzo pañota randishpa, Jesuspac cuerpota uricuchishpa, chai lienzohuan pillushpa, rumi quingrai jutcushcapi churarca. Chaimantaca shuc jatun rumita singuchishpami, chai jutcu pungutaca jarcarca.

47Jesusta maipi churactaca, Magdala pueblomanta Mariapish, Josepac mama Mariapishmi ricucurca.