1 REYES 12 - Biblia Quichua Cañar 2010

Israelcuna mana cazushcamanta(2 Cr 10.1—11.4)

1Jatun mandac cachun Roboamta churangapacmi tucui israelcuna Siquem pueblopi tandanacushca carca. Chaimantami Roboampish Siquem puebloman rirca.

2Nabatpac churi Jeroboamca Egiptopi cashparacmi caitaca yachac chayarca. Paica jatun mandac Salomonpac ñaupamanta miticushpami Egiptoman rishpa causacurca.

3Chaipi causacucpimi, shamuchun nishpa cacharca. Shina shamushpami Jeroboampish, tandanacushca tucui israelcunapish Roboamtaca:

4—Cambac taitaca yugota apachishca shinami llaquinayaita charirca. Cunanca, chai llashac yugomantapish sinchi ruhuaicunapi charishcamantaca canca ashallatapish cacharichi. Chashna ruhuacpica, cantaca servishpami causashun— nircacuna.

5Shina nicpimi Roboamca:

—Cunanca richiclla, cunanmanta quimsa punzhapi ñucapacman cutimunguichic— nirca.

Shina nicpica, tucui gentecunami rircacuna.

6Chai quipami jatun mandac Roboamca paipac taita Salomón causacucpi, servishpa causacushca cunac yuyaccunaman yuyaita cuchun mañashpaca:

—¿Cai gentecuna cashna nishcamantaca ima nishpatac cutichina alli canga?— nirca.

7Shina nicpimi paicunaca:

—Cunan, cai gentecunata servingapac can yaicushpaca, sumac shimicunahuan rimangui. Shina rimacpica, tucui causaipimi paicunaca cantaca servishpa causanga— nirca.

8Ashtahuanpish paica chai cunac yuyaccuna yuyaita cushcata saquishpami, paillahuantac huiñashca cunan huiñaicunata yuyaita cuchun mañarca.

9Paicunataca:

—Ñucataca: “Cambac taita yugota apachic shina llaquinayaita charishcamantaca ashallatapish cacharichiyari” nincunami. Shina ningapac shamuc gentecunataca ¿Ima nishpatac cutichina alli canman, cancunaca ima yuyaita cunguichic?— nirca.

10Shina nicpi, Roboamhuan huiñashca quipa huiñaicunaca:

—Canhuan rimac gentecunataca: “Yugota apachic shinami llaquinayaita charirca. Cunanca, chai llashac yugomantapish, sinchi ruhuaicunapi charishcamantaca ashallatapish cacharichiyari” ninguichic. Shinallatac: “Ñucapac uchilla dedoca ñuca taitapac huasha lomotapish yalli racumi.

11Ñuca taita llashac yugota apachishca shina llaquichishca cacpica, ñucacarin ashtahuanmi llashac yugota apachisha. Ñuca taita angucunahuan llaquichishca cacpica, ñucacarin alacrancunahuanmi llaquichisha” ningui— nirca.

12Jatun mandac Roboamca: «Quimsa punzha tucucpi, ñucapacman cutimunguichic» nishcami carca. Shina nishca shinallatacmi ña quimsa punzha tucucpica, Jeroboamca tucui gentecunandi Roboampacman shamurca.

13Shina shamucpimi, jatun mandac Roboamca cunan mandac yuyaccuna nishcata mana cazushpa sinchita rimarca.

14Chai mosocuna yuyaita cushca shinallatacmi paica: «Ñuca taitaca llashac yugota apachishca shinami llaquichirca. Ashtahuanpish ñucaca chai yugotaca ashtahuanmi llashacyachisha. Ñuca taitaca angucunahuanmi macashpa llaquichirca. Ñucacarin alacrancunahuanmi llaquichishpa charisha» nirca.

15Jatun mandacca israelcuna mañashcataca mana uyarcachu. Mandac Diosca Nabatpac churi Jeroboamman Silo pueblopi causacuc Ahiasta huillashca pactachunmi chashna ruhuarca.

16Tucui israelcunaca paicuna mañashcata jatun mandac mana uyasha nicpica:

«Davidmantaca,

¿imatatac ñucanchicca charinchic?

¿Israelpac churimantaca,

ima japinatatac charinchic?

¡Israelcuna cancunapac,

carpa huasicunaman richiclla!

¡David cunanca, cambac huasi

ucupurata ricuilla!» nirca.

Shina nishpami, israelcunaca paicunapac carpa huasicunaman rircacuna.

17Ashtahuanpish Roboamca Judá llacta pueblocunapi causacuc israelcunallatacmi mandacurca.

18Jatun mandac Roboamca impuestota japic Adoramtami israelcunapacman cacharca. Ashtahuanpish israelcunaca rumicunahuan shitashpami huañuchirca. Shina cacpimi, jatun mandac Roboamca shuc carretapi huichicushpa, Jerusalenpi miticungapac rirca.

19Chashnami israelcunaca Davidpac huahua huahuapuramanta chicanyashpa, cunan punzhacaman chashna causacuncuna.

20Chai quipami Jeroboam Egiptomanta cutimushcata tucui israelcuna yachac chayashpaca, paicuna tandanacushcaman cayachishpa, tucui israelcunata jatun mandac cachun churarca. Davidpac huahua huahuapura mandacuc-huanca Judá aillullami saquirirca. Caishuc Israel aillucunaca tucuimi chicanyarcacuna.

21Roboam Jerusalenman shamushpaca, israelcunahuan macanacungapacmi, Judapac tucui aillumantapish, Benjamín aillumantapish macanacunata alli yachac patsac pusac chunga huaranga soldadocunata tandachirca. Salomonpac churi Roboamca pai mandashca llactata cutin paipacman tigrachingapacmi chashna ruhuarca.

22Ashtahuanpish Mandac Diosca paipaclla cac Semaiasta rimashpaca:

23«Salomonpac churi Judá llactata jatun mandac Roboamtapish, Judapac, Benjaminpac tucui aillucunatapish, tucui gentecunatapish,

24Mandac Diosca: “Cancunapac huauqui israelcunahuanca ama macanacungapac richicchu. Cancunapac huasicunaman cutichiclla. Caitaca ñucallatacmi chashna tucuchun munarcani” nigri» nirca.

Paicunaca Mandac Dios mandashcata uyashpami, pai mandashca shinallatac cutircacuna.

Jeroboam ishcai curi becicunata ruhuashcamanta

25Jeroboamca Efraín urcupi cac Siquem pueblota cutin allichishpami chaipi causai callarirca. Chaimanta llucshishpaca, Penuel pueblotami allichirca.

26Chai quipami, Jeroboamca paipac shungupica: «Cunanca, ñuca mandacuc cai llactaca cutinmi Davidpac huahua huahuapurallamantac cutinga.

27Israelcunaca Mandac Diospac huasipimi animalcunata Diosman cushpa huañuchingapac Jerusalenman huichai ringacuna. Cai gentecunaca Judá llactata jatun mandac paicunapac amo Roboampacman cutinatami, paicunapac shungupica yuyaringa. Shina tucushpaca ñucata huañuchishpami, Judá llactata jatun mandac Roboamhuan tandaringacuna» nishpa yuyarca.

28Chashna yuyarishcata shuccunaman parlacpi, paicuna alli nicpimi, jatun mandac Jeroboamca curimanta ishcai becicunata ruhuashpa israelcunataca: «¡Cancuna, Jerusalenman huichai rinaca mana allichu! ¡Cancunapac dioscunaca caipimi! ¡Paicunami cancunataca Egiptomanta llucchimurca!» nirca.

29Chai ishcai becicunataca shuctaca Bet-el pueblopi, caishuctaca Dan pueblopimi churarca.

30Chaicunahuanmi israelcunaca juchallircacuna. Achcacuna Dan puebloman rishpa, chaipi cac becita alli nircacuna.

31Shinallatac Jeroboamca dioscunapac huasicunata lomacunapi ruhuashpami, manapish levitapura cac gentecunata curacuna cachun churarca.

32Chai huatapac pusac quilla chunga pichca punzhapimi Jeroboamca Judá llactapi jatun fiestata ruhuashca shinallatac fiestata ruhuarca. Shinallatac Bet-el puebloman rishpami, chai becicunaman animalta cushpa altar jahuapi huañuchirca. Chai dioscunapac ruhuashca huasicunapipish curacunatami churarca.

33Shinami Jeroboamca pusac quillapac chunga pichca punzhapi Bet-el pueblopi ruhuashca altarman huichicushpa inciensota rupachirca. Cai punzhaca paipac shungupi yuyarishcami carca.