1Naamatitapuramanta Zofarca:
2«Ñuca shungupi tiyashca yuyaicuna
nanachicpimi utca rimanata munani.
3Ñucata mana alli nishpa
rimashcatami uyashcani.
Chaimantami ñucapac
yuyaicunallatac ñucataca rimachinga.
4Cai pachapi runata
churashcamanta pacha
chashna cashcata,
¿Manachu yachangui?
5Mana allita ruhuaccunapac
cushicuica utcami tucurin,
Diosta mana manchac runapac
cushicuipish ashacamallami can.
6Jahua pachaman chayacta
jatun tucushca cashpapish,
paipac umahuan puyupi tupacushpapish,
7pai huanurishca mapa shinami
huiñaita chingaringa.
Chaita ricushpaca:
“¿Paica imatac tucushca?” ningami.
8Muscushca shinallami tucuringa.
Paitaca mana taringachu.
Muscuipi ricushca shinallami
chingaringa.
9Paita ricuccunapish
mana ashtahuan ricungachu.
Pai maipi cashcata ricuccunapish
cutinca mana ricungachu.
10Paipac huahuacunaca
huacchacunamanmi mañangacuna.
Paipac maquillahuantacmi
pai imata shuhuashcata cutichinga.
11Paipac tullucuna
sinchirac cashpapish,
paillahuantacmi ñuto
allpapi samaringa.
12Mana allita shimipi
mishquilliricucpipish,
callu ucupi pacashpa charicucpipish,
13allimi nishpa mana shitashpa,
paipac shimi ucullapi charicucpipish,
14chai micunaca huicsa
ucupimi shuctacyanga.
Chashna jayacyashpami huicsapica
culebrapac veneno shina tucunga.
15Pai charishcacunata
micushca cashpapish arcadangami.
Paipac huicsa ucumantami
Diosca llucchinga.
16Culebrapac venenotami sunganga.
Culebrapac callumi huañuchinga.
17Yacu callpac shina bunga
mishquitapish, lechetapish
mana ricungachu.
18Tucui pai trabajashcamanta japishcataca
mana micushpami cutichinga.
Chaihuanca mana jatun
tucushpa cushicungachu.
19Chaica, huacchacunata
llaquichishpa, imata charishcacunata
quichushpa, mana huasiyuc cashpapish,
quichushpami huasiyuc tucushca.
20Paica jaicapi mana sacsangachu.
Pai imata munashcataca
manatac atichingachu.
21Pai mana micushcaca
imapish mana tiyarcachu.
Chaimantami pai imalla
charishcacunaca
mana unaicaman canga.
22Achcata charishpapish
llaquihuanmi causanga.
Millaicuna shamushpami
tucui quichunga.
23Huicsa pactata micugricucpimi,
Diosca nina japiric shina piñarishpa,
paipac jahuapipish, paipac
micuna jahuapipish tamyachinga.
24Fierrohuan huañuchigricucpi,
miticushpa ricucpica, bronce
arcohuan shitashpami chugrichinga.
25Paipac cuerpo huashamanmi
flechaca llucshinga.
Jagan nicun flechami paipac hieltaca
chaupishpa pasanga.
Jatun manchaimi paitaca japinga.
26Paipac charishcacunata
tucuchingapacca manchana amsami
huacaichishca tiyacun.
Manapish pucuna ninami paitapish,
paipac huasipi tiyaccunatapish
tucuchinga.
27Pai millaita ruhuashcataca
jahua pachami ricuchinga.
Paita llaquichingapacca
cai pachami jataringa.
28Paipac huasipi tiyaccunataca
Dios yallita piñarishca punzhami
tucuita tucuchinga.
29Chaitami Diosca paita mana
manchaccunamanca allichishpa charicun.
Diosca paipac shimihuanmi
runa japinataca cusha nishca» nirca.
Who We AreWhat We EelieveWhat We Do
2025 by iamachristian.org,Inc All rights reserved.
