1Jatun mandac Nabucodonosormi curimanta shuc runaman ricchata ruhuarca. Chaica altomanca ishcai chunga canchis metro, anchomanca ishcai metro, canchis chunga centimetromi carca. Chai runaman ricchataca Babilonia llacta Dura pambapimi shayarirca.
2Chashna ruhuashpami, jatun mandac Nabucodonosorca prefectocunata, soldadocunata mandaccunata, shuctac mandaccunata, cunaccunata, cullquita huacaichiccunata, juezcunata, tucui llactacunapi mandaccunata tandachichun mandarca. Chai mandaccunataca chai runaman ricchata mañai callaringapacmi cayarca.
3Jatun mandac Nabucodonosor ruhuashca runaman ricchata ricushpa, mañai callaringapacmi prefectocunapish, soldadocunata mandaccunapish, shuctac mandaccunapish, cunaccunapish, cullquita huacaichiccunapish, juezcunapish, shinallatac tucui llactapi causac mandaccunapish tandanacurca. Chashna tandanacushpa, jatun mandac Nabucodonosor ruhuashca runaman ricchapac cuchupi shayacucpimi,
4shuc huillac runa sinchita caparishpaca: «Llactacunapi, pueblocunapi causaccunalla, chican rimaita rimaccunalla,
5cornetapi, flautapi, tamborpi, arpapi, salteriopi, zampoñapi shuctac tocanacunapi tocashca uyaricpica, jatun mandac Nabucodonosor curimanta ruhuashca runaman ricchapac ladopi cumurishpa, alli ninguichic.
6Maijanpish chai runaman ricchata cumurishpa mana adoractaca chai ratollatacmi rupacuc hornopi shitashca canga.
7Shina nicpimi, cornetapi, flautapi, tamborpi, arpapi, salteriopi, zampoñapi, shuctac tocanacunapi tocashcata uyashpaca, tucui gentecuna jatun mandac Nabucodonosor curimanta ruhuashca runaman ricchata cumurishpa adorarcacuna.
8Chai punzhallatacmi adivinocunapuramanta maijan jatun mandacpacman shamushpa, Judá gentecunapac contra huillarca.
9Chashnami jatun mandac Nabucodonosortaca:
—¡Jatun mandaclla, canca huiñaitami causangui!
10Jatun mandaclla, canca cornetapi, flautapi, tamborpi, arpapi, salteriopi, zampoñapi, shuctac tocanacunapi tocashcata uyashpaca tucui gentecuna, curimanta ruhuashca runaman ricchapac ñaupapi cumurishpa adorachunmi mandarcangui.
11Maijan cumurishpa mana adoractaca rupacuc hornopi shitachunmi mandarcangui.
12Chaica, can Babilonia llactata mandachun churashca israelcunapuramanta Sadrac, Misac shinallatac Abed-negomi can mandashcata mana cazushpa, cambac dioscunatapish, can curimanta ruhuashca runaman ricchatapish mana adorancuna.
13Chashna nicpimi, Nabucodonosorca yallita piñarishpa, Sadracta, Misacta, Abed-negota pushamuchun cacharca. Chashna mandacpimi, chai runacunata jatun mandacpac ñaupaman pushamurca.
14Nabucodonosorca paicunataca:
—Sadrac, Misac, Abed-nego, cancuna ñuca diostapish, ñuca curimanta ruhuashca runaman ricchatapish mana adorac nishcatami uyani.
15Cunanca Cornetapi, flautapi, tamborpi, arpapi, salteriopi, zampoñapi, shinallatac shuctac tocanacunapi tocashca uyaricpi, ¿ñuca ruhuashca runaman ricchapac ñaupapi cumurishpa alli ningapac rinallachu canguichic? Chai horas cumurishpa mana adorashpaca rupacuc hornopimi shitashca canguichic— nirca.
16Shina nicpimi, Sadroc, Misac, Abed-negoca jatun mandactaca:
—Caimantaca mana imata nisha ninchicchu.
17Chashna ruhuacpica, ñucanchic servina, ñucanchic Diosmi chai rupacuc hornomantapish, can jatun mandacpac maquimantapish quishpichinga.
18Jatun mandaclla, pai mana quishpichicpipish ñucanchicca cambac diosta mana servishunchu. Can ruhuashca runaman ricchata cumurishpa mana adorashunchu— nirca.
19Shina nicpimi, Sadrac-huan, Misac-huan, Abed-negohuan yallita piñarishpa ñahui shuctaclaya tucurca. Chaimantami hornotaca canchis cutinhuan yalli rupacyachichun mandarca.
20Chai quipami paipac soldadopuramanta ashtahuan sinchi runata Sadractapish, Misactapish, Abed-negotapish huatashpa rupacuc hornopi shitachun mandarca.
21Shina mandacpimi, chai soldadocunaca paicunata churanacunandi, ushutacunandi, turbantendi, jahualla churanacunandi rupacuc hornopi shitarca.
22Jatun mandac mandashcapish sinchimi carca. Horno ninapish yallitami rupacurca. Chaimantami Sadracta, Misacta, Abed-negota shitac soldadocunata rupachirca.
23Chashnami Sadrac, Misac, Abed-negoca maquicuna huatashca rupacuc hornopi urmarca.
24Chaimantami jatun mandac Nabucodonosorca mancharishpa utca jatarirca. Chashna jatarishpami shuctac mandaccunata cayashpaca:
—¿Manachu chai ninapi quimsa runacunata huatashpa shitarcanchic?— nirca.
Shina nicpimi paicunaca:
—Jatun mandaclla, chashnami carca— nirca.
25Shina nicpimi, jatun mandacca:
—Riquichic, chai nina chaupipica chuscu runacunami imapish mana tucushca puricun. Chai chuscu runapuramanta shucca dioscunapac churilayami puricun— nirca.
26Chaimanta Nabucodonosorca chai rupacuc horno pungu cuchuman cuchuyashpaca:
—¡Jahua pacha Diosta servic Sadrac, Misac, Abed-nego, chaimanta llucshishpa shamuichic!— nirca.
Shina nicpimi, Sadracpish, Misacpish, Abed-negopish chai nina chaupimanta llucshirca.
27Chai quipaca prefectocunatapish, soldadocunata mandaccunatapish, shuctac mandaccunatapish, chai ninamanta llucshishca runacunata ricungapacmi tandachirca. Chaica, chai runacuna mana rupashcata, acchallapish, churanapish mana yanayashcata, paicunapac cuerpoca ninallapish mana ashnacushcata ricungapacmi tandachirca.
28Chaimantami Nabucodonosorca: «Sadrocpac, Misacpac, Abed-negopac Diosca alli nishca cachun. Paimi, paita yuyarishpa causac, paita servic runacunata quishpichingapac paipac angelta cacharca. Paicunaca ñuca jatun mandac cacpipish, ñuca mandashcata mana cazurcachu. Paicunaca Diosta saquishpa, shuctac diosta servinapac randica, paicunapac cuerpotami rupachun saquirca.
29Chaimantami ñucaca: ‘Llactapi causaccunapish, ima rimaita rimaccunapish Sadracpac, Misacpac Abed-negopac Diosta piñashpa rimacca pitinacushca canga. Paipac huasipish tucuchishcami canga. Cashna quishpichic Dios shinaca mana shuctac dios tiyanchu’ nishpami mandani» nirca.
30Chai quipami jatun mandacca Sadracta, Misacta, Abed-negota tucui Babilonia llactata mandachun churashpa, allita pusharca.
Who We AreWhat We EelieveWhat We Do
2025 by iamachristian.org,Inc All rights reserved.
