EZEQUIEL 34 - Biblia Quichua Cañar 2010

Mana alli michiccunata llaquichinamanta

1Mandac Dios ñucata rimashpaca:

2«Huañunalla runa, Israel michiccuna llaqui tucunata huillashpa, Mandac Diosca: “¡Israel michiccunalla, cancunallami cuidaricunguichic! ¿Manachu michiccunaca ovejacunata cuidana can?

3Cancunaca oveja lecheta micushpapish, oveja millmamanta churarishpapish, huira oveja aichata micushpapish mana michinguichicchu.

4Irquiyashca ovejacunatapish mana sinchiyachinguichicchu, ungushcacunatapish mana jambinguichicchu. Chaqui paquicunatapish mana huatachinguichicchu, caita chaita rishca ovejacunatapish mana corralman tandachimunguichicchu. Chingarishca ovejacunatapish mana mashcanguichicchu. Ashtahuanpish yallita llaquichishpami mandashpa charinguichic.

5Michicta mana charishcamantami pandarishpa, sacha animalcuna japishpa micunallami caita chaita purirca.

6Ñuca ovejacunaca chingarishpami urcucunata, lomacunata purirca. Tucui cai pachatami caita chaita rircacuna. Chashna cacpipish, pi mana mashcarcachu, pi mana tapurcachu.

7Chaimanta michiccuna Mandac Dios ñuca rimashcata uyaichic.

8Ñuca shutipimi nini: Michic illac cashcamantami Ovejacunataca shuhuarca. Sacha millai animalcunami japishpa micurca. Ñuca ovejacunata michiccunaca mana yuyarircacunachu, ashtahuanpish paicunapuralla cuidarishpami, ñuca ovejacunataca mana cuidarca.

9Chaimanta michiccuna Mandac Dios ñuca rimashcata uyaichic.

10Mandac Dios ñucaca: ¡Riquichic, michiccunahuanca yallitami piñarishca cani! ¡Ñuca ovejacuna ima tucushcataca ñucami tapusha! Ña mana paicunata michichun saquishachu. Shina ruhuacpimi, paicunalla cuidarinataca saquinga. Ashtahuanpish ñuca ovejacunataca paicunapac shimimanta quichushpami, paicuna micuchunca, mana ashtahuan saquisha.

Alli michicmanta

11Mandac Dios ñucaca: Riquichic, ñucallatacmi ñuca ovejacunataca mashcashpa cuidasha.

12Ima shinami shuc michic caita, chaita rishca ovejacunata mashcan, chashnallatacmi ñucapish, ñuca ovejacunataca mashcasha. Puyu tapashca amsa punzhacunapimi ovejacunaca caita chaita rirca. Tucui chaicunataca llucchimushami.

13Shuctac llactamanta tandachimushpami paicunapac quiquin llactaman pushamusha. Chashna pushamushpami Israel urcucunapi, jatun yacu patacunapi, gentecuna causana pambacunapi michisha.

14Alli quihuapimi michisha. Israelpi tiyac jatun urcu sumac quihuapimi puringa. Chaipimi sumac michina pambapi samaringa, sumac quihuatami micunga.

15Ñuca ovejacunataca ñucallatacmi michishpa, paicuna tandanacuna pushtupi samachisha.

16Caita, chaita rishcacunatapish, chingarishca ovejacunatapish ñucallatacmi mashcashpa corralman cutichimusha. Chaqui paquicunataca huatachishami, irquiyashcacunataca sinchiyachishami. Ashtahuanpish huira ovejacunataca tucuchishami. Ñucaca cashcata ruhuashpami michisha.

17Mandac Dios ñuca cancunamanta rimashpaca: Ñucallatacmi ovejacunataca ovejacunapura, chivocunataca chivocunapura chicanyachishpa taripasha.

18Cancunaca, ¿manachu alli quihuata micucushpapish, saquirishcataca sarushpa mapayachinguichic? Shinallatac, ¿manachu chuyanlla yacuta ubiashpapish, chaquihuan cuyuchishpa mapayachinguichic?

19Ñuca ovejacunaca cancuna sarushca quihuatami micunga. Cancuna mapayachishca yacutami ubianga.

20Chaimantami Mandac Dios ñucaca: Ñucami huira ovejacunatapish, tullu ovejacunatapish taripasha.

21Cancunaca tullu ovejacunataca huicsahuan, rigrahuan, gachucunahuanmi tangashpa, caita chaita cacharcanguichic.

22Ñucami chai ovejacunataca quishpichisha. Ña mana cutin shuhuachun saquishachu. Ovejacunapura tandachishpami taripasha.

23Paicunata michichunca, ñucata servic Davidtami churasha. Paillami michinga.

24Ñucaca paicunapac Diosmi casha. Ñucata servic Davidca paicunata mandacmi canga. Chaitaca Mandac Dios ñucami nini.

25Cushi causai tiyachunmi paicunahuan ari ninacusha. Cai llacta millai animalcunataca anchuchishami. Chaimantami shitashca pambapi imata mana manchashpa causanga. Sachapi cashpapish sumactami sueñunga.

26Paicunataca muyundi sumac urcucunapimi causachun churasha. Tamyana punzhacunapimi tamyachisha. Chai tamyahuanmi achca allicunata japinga.

27Pambapi tiyac yuracunapish pucungami. Allpapipish alli granomi pucunga. Paicunapac llactapica imatapish mana manchashpami causanga. Paicuna huatashca shina causaimanta llucchicpi, servichishpa charicuccunapac maquimanta cacharichicpimi, ñucataca Mandac Dios cashcata yachangacuna.

28Shuctac llactapi causaccunapish ña mana ashtahuan servichishpa llaquichingachu. Cai allpapi tiyac millai animalcunapish mana micungachu. Pipish mana llaquichingachu. Chaimantami imata mana manchashpa causanga.

29Sumac granota pucuc yuracunatami paicunamanca cusha. Cai llactapica mana ashtahuan yarcaihuan huañungacunachu. Shuctac llactapi causaccunapish ña mana ashtahuan burlashpa pingaichingachu.

30Chaimantami paicunaca Mandac Dios ñucaca paicunahuan cashcata, cutin israelcunaca ñuca acllashca cashcata yachangacuna. Mandac Dios ñucami chashna nini.

31Cancunaca ñuca quihuapi micuc, ñuca ovejacunami canguichic. Ñucaca cancunapac Mandac Diosmi cani” ninmi ningui» nirca.