DEUTERONOMIO 23 - Biblia Quichua Cañar 2010

Maijancunalla Mandac Diospac tandanacuiman yaicunacashcamanta

1Mandac Diospac tandanacuimanca ruru ungushca, mana cashpa capashcacunapish mana yaicungachu.

2Huainayashpa charishca huahuapish Mandac Diospac tandanacuimanca mana yaicungachu. Paicunapac chunganiqui miranacuicamanmi Mandac Diospac tandanacuimanca mana yaicunga.

3Amonitacunapish, moabitacunapish Mandac Diospac tandanacuimanca mana yaicungachu. Paicunapac chunganiqui miraicunapish Mandac Diospac tandanacuimanca mana yaicungachu.

4Paicunaca, cancuna Egipto llactamanta llucshimucpica, micunallahuanpish, yacullahuanpish mana tupangapac llucshircachu. Ashtahuanpish Mesopotamia llactapi tiyac Petormanta Beorpac churi Balaamtami cancunata maldiciachun apamurca.

5Ashtahuanpish Mandac Diosca Balaamtaca mana uyasha nircachu. Mandac Diosca cuyanmi. Chaimantami maldicianapac randica bendiciarca.

6Paicunahuanca jaicapi ama apanacunguichicchu, shinallatac alli causachunpish ama saquinguichicchu.

7Edomitacunaca cancunapac huauquicunami, chaimanta paicunataca ama millanguichicchu. Cancunaca Egiptopica pozashpallami causarcanguichic. Chaimanta Egipto runacunatapish ama millanguichicchu.

8Paicunaca quimsaniqui miraicamanmi Mandac Diospac tandanacuimanca mana yaicunga.

Carpa huasipi chuyanlla causanamanta

9Cancunata piñaccunahuan macanacungapac llucshishpaca, tucui mana allimanta cuidaringuichic.

10Cancunamanta maijan tuta musparishpa mapayashpaca, campamentomanta llucshishpa, mana cutin yaicunachu can.

11Manarac tutayacpimi, yacuhuan armarishpa, inti tigrashca quipa carpa huasimanca yaicuna can.

12Carpa huasimanta carupimi mapayachingapac shuc pushtuta ricushpa, chaiman llucshina canguichic.

13Shuc ishtacata cinturapi apanguichic. Ishpangapac llucshishpaca chai ishtacahuan jutcushpa pambanguichic.

14Mandac Diosmi cancunata ayudashpa, piñaccunata cancunapac maquipi churangapac, carpa huasi chaupipi purin. Chaimantami carpa huasica Diospaclla, shinallatac chuyaclla cana can. Mapa cacpica, Mandac Diosca anchuringami.

Shuctac yachachishcacunamanta

15Shuc servic amopacmanta miticushpa, cancunapacman chayacpica, ama amopacllamanta cutichishpa cachanguichicchu.

16Paillatac cancunapac maijan llactata acllashpa cancunapac chaupipi causachun saquinguichic. Ama paita llaquichinguichicchu.

17Israelcunapurapica cullquimanta huainayac huarmipish, caripurapica chayarinacuc caripish mana tiyanachu can.

18Mandac Diospac huasimanca ama huainayashpa japishca cullquita apamunguichicchu. Caripura chayarinacushpa japishca cullquitapish ama apamunguichicchu. Mandac Diosca ishcaitatacmi millanayachin.

19Huauquiman cullquita, micunata, ima shuctac mañachishpaca, interesta cobraccuna shina ama cobranguichicchu.

20Shuctac llacta runacunamantaca cobranguichiclla. Shina cashpapish, huauquimantaca mana cobranachu canguichic. Chashna cacpimi, Mandac Diosca cancuna japigricuc llactapica tucui imata ruhuacpipish bendicianga.

Cusha nishcata pactachinamanta

21Mandac Diosman imata cusha nishpaca, ama unayashpa, utca cunguichic. Mana cucpica, Mandac Diosca cuchun ningami. Chaimanta juchayucmi tucunguichic.

22Cutin paiman mana cusha nishpaca, mana cushpapish, mana cushpapish mana juchayucchu tucunguichic.

23Cancunapac shimihuan cusha nishcataca pactachinami canguichic. Mandac Diosman cushami nishcata, cunami canguichic. Chashnami cancunapac shimihuan cusha nishcata pactachina canguichic.

Shucpac allpapi ima shina canamanta

24Huauquipac uvas chagrapi yaicushpaca, huicsa pactatami micui pudinguichic. Ashtahuanpish apangapac ama canashtapi churanguichicchu.

25Shucpac chagrata pasashpaca shuc espigata piti pudinguichicmi. Shina cashpapish hoces-huanca mana pitinachu canguichic.