1Mandac Dioslla, canllapimi
miticushpa causani.
Amatac pingaichishpa saquinguichu.
2Cashcata ruhuac cashcamanta
ayudashpa quishpichiyari.
Ñuca ladoman ringrita churashpa uyaiyari.
3Ñuca huiñaita miticungapac rina
jatun rumi caiyari.
Canca ñuca miticuna jatun rumi shina,
muyundita jatun pircashca shinami cangui.
Canca ñucata quishpichic cangui.
4Ñuca Dioslla,
canta mana manchaccunapac maquimanta,
millaicunapac maquimanta,
llaquichiccunapac maquimanta
quishpichiyari.
5Mandac Dioslla, canmi
ñuca shuyanapish,
ñucata huambramanta pacha
cuidacpish cangui.
6Ñucataca mamapac huicsapi cacpiracmi
cambac maquipi charircangui.
Ñuca mamapac huicsamantapish
canmi llucchircangui.
Chaimantami canllata alabasha.
7Ñucata ricushpaca tucuimi mancharirca.
Shina cacpipish, canca ñuca miticuna
sinchi rumi shinami cangui.
8Ñuca shimica canta alabana
rimaicunallahuan cachun.
Punzhanta can sumaimana
cashcata huillachun.
9Ñuca yuyacyacpipish ama shitanguichu.
Fuerza illac tucucpipish
ama saquinguichu.
10Chaica ñucata piñaccunaca rimancunami.
Huañuchingapac tandanacushpa,
11parlanacushpaca:
«Diosca paitaca saquishcami.
Paitaca pi quishpichic mana tiyanchu.
Chaimanta catishpa japichiclla» nincunami.
12Dioslla, ama ñucamanta caruyaichu.
Ñuca Dioslla, ñucata
quishpichingapac utca shamuiyari.
13Ñuca causaita tucuchishun niccunaca
pingaichishpa chingachishca cachun.
Ñucata llaquichishun niccunaca
muspachishpa, yallita pingaichishca cachun.
14Ashtahuanpish ñucaca tucui causaipimi
ashtahuan ashtahuan alabacushalla.
15Can cashcata ruhuac cashcata,
can quishpichic cashcataca tucui punzhami
ñuca shimica huillacungalla.
Maita mana yupaipac cacpipish
huillacushallami.
16Mandac Dioslla,
pi mana ruhuaipaccunata
can ruhuashcataca huillacushallami.
Can ruhuashcacunataca yuyaricushallami.
17Sumac Dioslla, huambramanta pachami
ñucataca yachachircangui.
Chaimantami jatun mancharinacunata
can ruhuashcataca huillacunilla.
18Dioslla, can tucuita ruhuac cashcataca
quipa huiñaicunamanpish,
quipa huahua huahuacunamanpish
huillangacaman yuyacyashpa
yurac uma cacpipish ama saquinguichu.
19Dioslla, jahua pachaman chayactami
cashcata ruhuashcangui.
Canmi jatun mancharinacunata ruhuashcangui.
¡Dioslla, can shinaca pi mana tiyanchu!
20Achca llaquicunata,
nanaicunatami ricuchircangui.
Shina cashpapish canllatacmi
cutin causaita cushpa
enterrashcamantapish llucchingui.
21Ñucata ashtahuan alli nishcata
ruhuashpami cutinllatac cushichingui.
22Dioslla,
canllatami salteriopi tocashpa alabasha.
Israelcunapac jucha illac Dioslla,
can imatapish pactachic cashcataca
arpapi tocashpami cantasha.
23Ñuca salmocunata cantacpica,
ñuca shimica cushicungami.
Can quishpichishcamantaca
ñuca almapish cushicungami.
24Ñucata mana allita ruhuasha niccunata
pingaichishpa muspachishcamantami,
ñuca calluca can cashcata ruhuac cashcataca
punzhanta huillacungalla.
Who We AreWhat We EelieveWhat We Do
2025 by iamachristian.org,Inc All rights reserved.
