2 CRÓNICAS 18 - Biblia Quichua Cañar 2010

Micaiaspish, Acabpish siriocunahuan macanacushcamanta(1 R 22.1-40)

1Josafatca yalli chayuc, tucuipac alli nishca, shinallatac Acabpac familiami tucurca.

2Paica tauca huatacuna quipami Acabta ricungapac Samaria puebloman rirca. Acabca Josafatmanpish, paihuan shamuc gentecunamanpish achca ovejacunata, huagracunata huañuchishpami, jatun micuita ruhuarca. Chai quipaca Galaad llacta Ramot pueblopi causaccunahuan macanacungapac jacu nishpami animarca.

3Israel llactata jatun mandac Acabca Judá llactata jatun mandac Josafattaca:

—¿Galaad llactapi causaccunahuan macanacungapac ñucahuan risha ninguichu?— nirca.

Shina nicpimi Josafatca:

—Ñucaca can shinallatacmi cani. Ñuca soldadocunapish cambac soldadocuna shinallatacmi. Shina cashcamanta macanacuimanca canhuan rishunllami— nirca.

4Shinallatac Josafatca Israel llactata jatun mandactaca:

—Manarac rishpa Mandac Diosmanrac tapui— nirca.

5Shina nicpimi, Israel llactata jatun mandacca Diosmanta huillac chuscu patsac runacunata tandachishpaca:

—¿Galaad llacta Ramot pueblopi causaccunahuan macanacungapacca rishachu, mana cashpaca saquishachu?— nirca.

Shina nicpimi paicunaca:

—Huichai rilla, Mandac Diosca chai pueblopi causaccunataca jatun mandacpac maquipimi churanga— nircacuna.

6Ashtahuanpish Josafatca:

—Paimanpish tapungapac Dios ima nishcata huillac maijan runa, ¿manachu caipi tiyan?— nirca.

7Shina nicpimi, Israel llactata jatun mandacca Josafattaca:

—Mandac Dios ima nishcata huillac shuc runa tiyanracmi. Paica Imlapac churi Micaiasmi. Paica ima allitaca mana huillanchu, ashtahuanpish mana allillatami huillan. Chaimantami paitaca mana ricunayan— nirca.

Shina nicpimi Josafatca:

—Jatun mandaclla, ama chashna rimaichu— nirca.

8Shina nicpimi, Israel llactata jatun mandac paita servic shuc mandacta cayashpaca:

—Imlapac churi Micaiasta utca pushamugri— nirca.

9Israel llactata jatun mandacpish, Judá llactata jatun mandac Josafatpish jatun mandaccuna churarinata churarishcami Samaria puebloman yaicuna pungu pambapi tiyac mandashpa tiyarinapi tiyacurcacuna. Chaipi tiyacucpimi, Diosmanta tucui huillaccunaca paicunapac ñaupapi huillarcacuna.

10Quenaanapac churi Sedequiasca fierromantami gachucunata ruhuachishca carca. Chaita ruhuachishpami paica: «Mandac Diosca: “Cai gachucunahuanmi siriocunataca sacmashpa tucuchingui” ninmi» nirca.

11Tucui huillaccunami chashnallatac huillashpaca: «Galaad llacta Ramot pueblopi causaccunahuan macanacungapac huichai rilla, mishanguimi. Mandac Diosmi can jatun mandacpac maquipi churanga» nircacuna.

12Micaiasta cayangapac ric runaca:

—Riqui, tucui huillaccunami shuc shinalla jatun mandacman allicunata huillancuna. Canpish paicuna shinallatac alli canata huillaiyari— nirca.

13Ashtahuanpish Micaiasca:

—Mandac Diospac shutipimi nini: Ñucaca pai imata nishcatami huillasha— nirca.

Shina nishpami, jatun mandacpacman shamurca.

14Pai chayacpi, jatun mandacca:

—Micaías, ¿Galaad llacta Ramot pueblopi causaccunahuan macanacungapacca rishunchu, mana cashpaca saquishunchu?— nirca.

Shina nicpimi Micaiasca:

—Huichai rilla, mishanguichicmi. Cambac maquipimi churashca canga— nirca.

15Shina nicpimi, jatun mandacca:

—¿Ima horascamantac cantaca mana llullashpa huillai nishpa Mandac Diospac shutipi nicushayari?— nirca.

16Shina nicpimi Micaiasca:

—Tucui israelcunatami michicta mana charic ovejacuna shina, urcucunata caita chaita rishcata ricurcani. Shina cacpimi, Mandac Diosca: “Paicunaca mandacta mana charinchu. Imatapish mana manchashpa huasiman cutimuchunlla” ninmi— nirca.

17Shina nicpi, Israel llactata jatun mandacca Josafattaca:

—¿Manachu ñucaca: “Paica allitaca mana huillangachu, ashtahuanpish llaquitami huillanga” nircani?— nirca.

18Shina nicpimi Micaiasca:

—Mandac Dios rimashcata uyaichic. Ñucaca Mandac Diostaca pai tiyarinapi tiyacuctami ricurcani. Paipac ladopica jahua pachapi tiyac tucui angelcunami alli ladomanpish, lluqui ladomanpish shayacurca.

19Chaipimi Mandac Diosca: “Israel llactata jatun mandac Acab Galaad llacta Ramot pueblopi causaccunahuan macanacungapac huichai rishpa llaquita apachunca, ¿pitac umangapac risha ninguichic?” nirca. Shina nicpimi, maijancunaca shuctac, shuccunaca shuctac ninacurca.

20Shina cacpimi, shuc espíritu Mandac Diospac ñaupaman shamushpaca: “Ñuca chaita ruhuagrisha” nirca. Shina nicpimi, Mandac Diosca: “¿Ima shinatac ruhuagringui?” nirca.

21Shina nicpimi, chai espirituca: “Ñuca rishpaca paipac tucui huillaccunapimi, llullashpa huillana yuyaita churasha” nirca. Shina nicpimi, Mandac Diosca: “Canca umai pudinguimi. Can nishca shinata ruhuangapac rilla” nirca.

22Riqui, cunanca Mandac Diosllatacmi cambac huillaccunapac shimipi llullac espirituta churashca. Mandac Diosllatacmi can llaquita apachun, chashna mandashca— nirca.

23Shina nicpimi, Quenaanapac churi Sedequiasca Micaiaspacman cuchuyashpa ñahuipi huactashpaca:

—Mandac Diospac espirituca, ¿maijan ñantatac ñucamanta anchurishpa, canman huillangapacca rircayari?— nirca.

24Shina nicpimi Micaiasca:

—Riqui, huasiman yaicushpa, shuc ucumanta caishuc ucuman miticushpa, puricui punzhami yachangui— nirca.

25Shina nicpi, Israel llactata jatun mandacca:

—Micaiasta japishpa, pueblota mandac Amonpacman, shinallatac jatun mandac ñuca churi Joaspacman apaichic.

26Paicunataca: “Jatun mandacca, Micaiastaca carcelpi churashpa, asha tandata asha yacullata cushpa, ñuca allilla cutimungacaman llaquichishpa charicuichic” ninmi nigrichic— nirca.

27Shina nicpimi Micaiasca:

—Ima mana tucushpa, can alli cutimushpaca Mandac Dios ñucaman mana huillachishcatami yachangui— nirca.

Shinallatac:

—¡Tucui caita uyaccuna ñuca ima nicushcata uyaichic!— nirca.

28Shinami Israel llactata jatun mandacca Judá llactata jatun mandac Josafathuan Galaad llacta Ramot puebloman huichai rirca.

29Chaipimi Israel llactata jatun mandacca Josafattaca:

—Ñucaca shuctac churanata churarishpami macanacungapac risha. Canca mandaccuna churarina cambac churanallatatac churarishpa ri— nirca.

Chashnami Israel llactata jatun mandacca shuc churanata churarishpa macanacuiman yaicurca.

Acab huañushcamanta

30Siria llactata jatun mandacca macanacuna carretacunapi ric paipac soldadocunata mandaccunataca: «Jatunhuanpish, uchillahuanpish ama macanacunguichicchu, Israel llactata jatun mandacllahuan macanacunguichic» nirca.

31Carretapi ric soldadocunata mandaccuna Josafatta ricushpaca:

—¡Paimi Israel llactata jatun mandac!— nircacuna.

Shina nishpami, paihuan macanacungapac rircacuna. Chaimantami Josafatca Mandac Diostaca ayudaiyari nishpa caparishpa mañarca. Shina mañacpimi, Mandac Diosca paillatac ayudashpa, chai soldadocunataca paipac ladomanta caruyachirca.

32Carretapi ric soldadocunata mandaccunaca mana Israel llactata jatun mandac cashcata ricushpami, Josafatta saquircacuna.

33Ashtahuanpish shuc soldadomi arcohuan pucllashpalla shitashpa, Israel llactata jatun mandactaca macanacungapac sinchi churanata churarishcata pasachishpa chugrichirca. Chaimantami paica carretata apactaca:

—¡Carretata muyuchishpa, cai macanacuimanta llucchi! ¡Ñucaca chugririshcami cani!— nirca.

34Chai punzhaca macanacuica ashtahuanmi sinchiyarca. Chaimantami Israel llactata jatun mandacca siriocunapac ñaupapi paipac carretapi shayarishpa, tucui punzha cainarca. Shina cashpami inti tigracucpica, ña huañurca.