1 SAMUEL 18 - Biblia Quichua Cañar 2010

Jonatanpish, Davidpish shuc ari ninacuita ruhuashcamanta

1David Saulhuan parlanata ña tucuchicpimi, Jonatanca Davidhuan shuc shinalla tucushpa, quiquin cuyaric shina Davidtaca cuyarca.

2Saulca chai punzhallatacmi Davidta paihuan causachun saquichishpa, paipac taitapac huasimanca mana cacharca.

3Jonatanca Davidta yallita cuyashcamantami paihuan shuc ari— ninacuita ruhuarca. Jonatanca quiquin cuyaric shinami Davidtaca cuyarca.

4Jonatanca paipac churanata llucchishpami shuctac churanacunandi Davidman curca. Shinallatac paipac espadatapish, arcotapish, chumbitapish curcami.

5Davidca Saúl maiman cachacpipish ricllami carca. Shinallatac tucui chaicunapica allitami ruhuac carca. Chaimantami Saulca soldadocunata mandac cachun churarca. Davidca tucui gentecunapac ñaupapipish, Saulta serviccunapac ñaupapipish allimi ricurirca.

Davidta gentecuna cuyacpi, Saúl piñarishcamanta

6Chai filisteota David huañuchishca quipa, paicuna cutimucpimi, tucui Israel llactapi cac pueblocunamanta huarmicunaca cantashpa, danzashpa, panderocunahuan, shuctac tocanacunapi cushilla tocashpa jatun mandac Saulta tupangapac llucshirca.

7Chai huarmicuna danzashpa cantashpaca:

«¡Saulca huaranga runacunatami

huañuchishca!

¡Davidca chunga huaranga

runacunatami huañuchishca!»

nircacuna.

8Chashna nishpa cantashcaca Saulmanca mana allichu carca. Chaimantami yallita piñarishpa: «Davidca chunga huaranga runatami huañuchirca, Saulca shuc huaranga runatami huañuchirca nincunami. ¡Ashtahuanpish Davidca jatun mandacmi ninallami faltan!» nishpa yuyarca.

9Chai punzhamanta pachami Saulca Davidtaca piñai callarirca.

10Cayandi punzhaca Mandac Dios cachashca shuc millai espíritu japicpimi, Saulca pai mandana ucupi musparishpa rimariricurca. Davidca ñaupa punzhacuna shinallatacmi maquihuan arpapi tocacurca. Cutin Saulca lanzatami maquipi charicurca.

11Shina charicushpami Saulca: «¡Lanzahuan shitashpami Davidtaca pirca quingraipi huañuchisha!» nishpami yuyarca. Ashtahuanpish ishcai cutinmi Davidca ladoyarca.

12Mandac Dios paimanta anchurishpa Davidhuan cacta yachashpami Saulca mancharca.

13Chaimantami Saulca paimanta anchurichun Davidtaca huaranga soldadocunata mandachun churarca. Shina churacpimi, Davidca soldadocunata pushashpa puric carca.

14Davidca Mandac Dios paihuan cacpimi, ima ruhuanapipish allita ruhuac carca.

15David imata ruhuashpapish allita ruhuacpimi, Saúl ashtahuan mancharca.

16David tucui soldadocunata allita pushashpa puricpimi, israelcunapish, Judá llacta gentecunapish Davidtaca mai cuyarca.

17Chaimantami Saulca Davidtaca:

—Riqui, ñuca punta ushi Merabtami cambac huarmi cachun cugrini. Can Mandac Diosmanta sinchita macanacushpa atichunmi cambac huarmi cachun cugrini— nirca.

Shina nicpipish, Saulca Davidtaca: «Mana ñuca maquihuan huañuchishachu. ¡Ashtahuanpish filisteocuna huañuchichun!» yuyashpami, chashna nirca.

18Shina nicpimi, Davidca Saultaca:

—Jatun mandacpac yerno tucungapacca ¿Ñucaca pitac caniyari? ¿Ñuca taitapac familiacunapish, israelpurapica imatac canyari?— nirca.

19Ashtahuanpish Saulca paipac ushi Merab solterata Davidhuan cazarachina punzhapica mana paihuan cazarachishpami, Mehola pueblomanta Adrielhuan cazarachirca.

20Shina cacpipish Saulpac quipa ushi Micalmi Davidta yallita cuyarca. Chaita Saúl yachashpaca maimi cushicurca.

21Chaimantami Saulca: «Tucllapi urmachic shinami filisteocunapac maquipi paicuna huañuchichun cazarachisha» yuyarca. Chaimantami Saulca cutinllatac Davidtaca:

—Cunanmi ñuca yerno cagringui— nirca.

22Shina nicpimi, Saulca paita serviccunata mandashpaca:

—Davidhuan pacalla parlashpa: “Riqui, jatun mandacpish cuyanmi. Paita serviccunapish yallimi cuyan. Chaimanta jatun mandacpac yerno tucuilla” nigrichic— nirca.

23Saulta serviccunaca cai nishcacunatami Davidman parlagrirca. Chaita parlacpimi Davidca:

—¿Jatun mandacpac yerno tucunaca jahuallachu imatacyari? Ñucaca imatapish mana charic, pipacpish mana ricsishca runami cani— nirca.

24Shina nicpimi, Saulta serviccunaca David tucui imata nishcacunata Saulman huillarca.

25Shina huillacpi Saulca:

—Davidtaca: “Jatun mandacca ushimanta pagachunca mana munanchu. Ashtahuanpish pai jatun mandacta piñaccuna llaquichishcamanta patsac filisteocunata huañuchishpa paicuna charishca asha aicha carata pitishpa apamuchunmi munan” nigrichic— nirca.

Saulca Davidta filisteocuna huañuchichun yuyashpami chashnaca nirca.

26Saulta serviccuna chashna huillacpimi, Davidca jatun mandacpac yerno alli cana cacpi, jatun mandacpac yerno tucunata yuyarirca. Saúl mandashca punzha manarac pactacpimi,

27Davidca paipac soldadocunahuan rishpa, ishcai patsac filisteocunata huañuchishpa, paicuna charishca aicha carata pitishpa jatun mandacman cungapac apamurca. Davidca jatun mandacpac yerno tucungapacmi chashna ruhuarca. Chaimantami Saulca paipac ushi Micalhuan Davidtaca cazarachirca.

28Ashtahuanpish Saulca Mandac Dios Davidhuan cactapish, paipac ushi Micalpish yallita cuyacta ricushpami,

29Davidtaca ashtahuan manchashpa, tucui paipac causaipi Davidtaca piñarca.

30Filisteocunata mandaccunaca macanacungapacmi shamushpa catirca. Chashna ima horas shamucpipish Saulta serviccunamanta yallica Davidmi ashtahuan atic carca. Chaimantami paitaca yallita cuyashpa, alli nic carca.