1 REYES 4 - Biblia Quichua Cañar 2010

Jatun mandac Salomonpac quipa mandaccunamanta

1Salomonca tucui israelcunapac jatun mandacmi carca.

2Salomón churashca mandaccunaca caicunami carca. Sadocpac churi Azariasca curacunata mandacmi carca.

3Sisapac churicuna Ahías shinallatac Elihorefca quillcaccunami carca. Ahiludpac churi Josafatca jatun mandacpac randi rimacmi carca.

4Joiadapac churi Benaiasca soldadocunata mandacmi carca. Sadocpish, Abiatarpish curacunami carca.

5Natanpac churi Azariasca llactacunapi churashca mandaccunata mandacmi carca. Natanpac churi Zabudca jatun mandacta cunac paipac alli ricsishcami carca.

6Ahisarca mandana huasita ricuc mayordomomi carca. Abdapac churi Adoniramca sinchi ruhuaicunapi caccunata mandacmi carca.

Salomonpac chunga ishcai quipa mandaccunamanta

7Salomonca tucui Israel llactapimi chunga ishcai mandaccunata charirca. Paicunami jatun mandacmanpish, paipac huasipi causaccunamanpish imatapish apamuc carca. Paicunaca tucuimi huatanta shuc quilla jundata imatapish jatun mandacman apamuccuna carca.

8Chai mandaccunapac shuticunaca caicunami. Efraín urcupica Hurmi mandacurca.

9Decarpac churitaca Macazpi, Saalbimpi, Bet-semespi, Elonpi shinallatac Bet-janán pueblocunapimi mandachun churarca.

10Arubot pueblopica Hesedmi mandacurca. Soco pueblopipish, Hefer tucui llactatapish, paillatacmi mandacurca.

11Dor tucui llactacunapica Ben-abinadabmi mandacurca. Paica Salomonpac ushi Tafathuanmi cazararca.

12Ahiludpac churi Baanaca Taanac, Miguido pueblocunatapish, Zaretán pueblo ladollapi tiyac, Bet-seán tucui llactatami mandacurca. Zaretán puebloca, Jezreel pueblo ura ladomanmi carca. Bet-seán pueblomantaca Abel-mehola pueblocaman, shinallatac chimba lado Jocmeam pueblocunatapish mandacurcami.

13Geberpac churica Galaad llactapi cac Ramot pueblotami mandacurca. Shinallatac Galaad llactapi cac Manasespac churi Jair ruhuachishca pueblocunatapish mandacurcami. Shinallatac Basán llactapi tiyac Argob llactatapish mandacurcami. Chai llactaca muyundita jarcashca sucta chunga jatun pueblocunami carca. Chai pueblopac pungucunaca bronce aldabacunahuanmi carca.

14Iddopac churi Ahinadabca Mahanaim pueblotami mandacurca.

15Ahimaasca Neftalí llactatami mandacurca. Paica Salomonpac ushi Basemathuanmi cazararca.

16Husaipac churi Baanaca Aser llactata, shinallatac Alot pueblotami mandacurca.

17Paruapac churi Josafatca Isacar llactatami mandacurca.

18Elapac churi Semeica Benjamín llactatami mandacurca.

19Uripac churi Gebertaca Galaad llactatami mandachun churarca. Chai llactaca amorreocunata jatun mandac Sehonpac, shinallatac Basán llactata jatun mandac Ogpacmi carca.

Chai llactapica Geber runallami mandacurca.

Mandac Salomonpac huasipi achca micuna tiyashcamanta

20Judá llactapi, Israel llactapi, causaccunaca mama cucha yacu patapi tiyac tio shina achcami carca.

Paicunaca tucuimi micushpa, ubiashpa, cushicushpa causarcacuna.

21Salomonca Eufrates yacu lado llactacunamantaca filisteocunapac llacta ladocaman, chaimantaca Egipto linderocamanmi mandarca. Tucui chai llactapi causaccunami Salomón huañungacaman imatapish cuna cashcata cushpa, paita servishpa causarca.

22Salomonmanca punzhantami ashtahuan alli harinataca quimsa chunga corota apamurcacuna. Yangalla harinata sucta chunga corotami apamurca.

23Shinallatac chunga huirayachishca huagracunata, michina ishcai chunga huagracunata, patsac ovejacunatami apamurcacuna. Tarugacunata, gacelacunata, corzos shuti animalcunata shinallatac huira huallpacunatapish apamurcacunami. Chaicunaca mana yupashcami carca.

24Salomonca Eufrates yacumantaca inti tigrana tucui ladota, shinallatac Tifsa pueblomantaca Gaza pueblocaman jatun mandaccunatami mandacurca. Shina cacpimi, muyundi llactapi causaccunapish, mana macanacushpa alli causarca.

25Salomón causai punzhacunapica Judá llactapi, Israel llactapi causaccunaca Dan pueblomanta Beerseba pueblocamanmi, uvas chagrayuc, higo chagrayuc alli causarcacuna.

26Salomonca caballocuna shayana huasicunapica macanacuna carretacunata aisac chuscu huaranga caballotami charirca. Caballocunapi ric soldadocunataca chunga ishcai huarangatami charirca.

27Chai chunga ishcai mandaccunami imapish ama illachun nishpa jatun mandac Salomonman mizapi micungapac tucui shamuccunamanpish apamuccuna carca.

28Shinallatac pai maipi cacpipish, caballocunamanpish aparishpa puric shuctac animalcunamanpish, cebadata, ucshata apashpa richunmi mandac carca. Shinami paicunaca maiman apana tucucpipish, quillanta apaccuna carca.

Salomonpac yuyaimanta

29Diosca alli yuyaita, alli entendishpa causanata shungupi yuyarinatami Salomonmanca mama cucha yacu patapi tiyac tio shina yallita jatun yuyaita curca.

30Salomonca inti llucshic ladopi causaccunata, Egiptopi causac alli yachaccunata ashtahuan alli yachacmi carca.

31Paica tucui gentecunata atishpa alli yachacmi carca. Ezraitapura Etán, Hemán runacunatapish, Calcol shinallatac Darda Maholpac churicunatapish, atishpa alli yachacmi carca. Chaimantami paitaca muyundi tucui llactacunapi causaccunaca ricsirca.

32Salomonca quimsa huaranga sumac rimaicunata shinallatac pichca huaranga cantocunatami quillcarca.

33Shinallatac yuracunamanta yachachishpaca, Líbano llacta cedro yuracunamanta callarishpa, patapi huiñac hisopo uchilla yuracunacamanmi yachachirca. Shinallatac jatun animalcunamantapish, volashpa puric animalcunamantapish, llucashpa puric animalcunamantapish, challuacunamantapish yachachircami.

34Salomonpac jatun yachaita uyangapacca, tucui pueblocunapi causaccunapish, tucui llactacunamanta jatun mandaccunapish paipac jatun yachai maicaman uyarishcamantami shamurcacuna.