1¡Ñuca Dioslla, ñuca Dioslla!
¿Ima nishpatac ñucallata
saquinguiyari?
¿Ima nishpatac ñucamantaca
caruyanguiyari?
Quishpichiyari nishpa,
ñuca caparishcataca,
¿ima nishpatac mana uyanguiyari?
2Ñuca Dioslla, punzhacuna
mañacpica mana uyanguica.
Tutacuna mañacpipish
mana samachinguica.
3Canca jucha illacmi cangui.
¡Israelcuna alli nishcami
causangui!
4Ñucanchic ñaupa taitacunaca
can quishpichichunmi shuyarcacuna.
Chashna shuyacpica canca
quishpichircanguimi.
5Canta mañashpami
llaquimanta llucshircacuna.
Canpi shunguta churashpaca
mana pingai tucurcacunachu.
6Ashtahuanpish ñucaca
curu shinallami cani.
Mana runa shinachu cani.
Runacuna burlashca,
gentecunapac millashcami cani.
7Tucui ñucata ricuccunami
burlancuna.
Paicunaca shimita huishtuyachishpa,
umata cuyuchishpaca:
8«Chaicunaca Mandac Diospimi
shunguta churac carca.
Pai cuyashcami cani niccunami carca.
Shina cacpica Mandac Diosllatac
quishpichichun.
Paillatac llaquimanta llucchichun»
nincunami.
9Ashtahuanpish canmi
mamapac huicsamanta llucchircangui.
Canmi ñucataca chuchucucmanta pacha
canpi shunguta churanata
yachachircangui.
10Manarac sajuarishpa ñuca mamapac
huicsapi cashparacmi
cambac maquipi mingashca carcani.
Canca ñuca Diosmi cangui.
11Jatun llaqui japigrinmi,
pi ayudacca mana tiyanchu.
Ñuca ladomantaca ama caruyaichu.
12Ñucataca achca piña huagra shinami
muyucuncuna.
Basán llacta piñac huagracunapac
chaupipi shinami cani.
13León piñarishpa
shimita pascac shinami
ñucata piñashpa rimancuna.
14Ñucaca talliricuc yacu shinami
tucuricuni.
Ñuca tullucunapish
tucui quihuirishcami.
Ñuca shunguca huira nuyucuc shinami
tucuricun.
15Ñuca shimipish chaquishca
callana shinami.
Ñuca callupish chaquishpami,
palancarapi llutarin.
Huañushpa allpa tucuchunmi
saquishcangui.
16Allcucuna shinami
muyunacushpa charicuncuna.
Millai gentecunami ñuca muyundipi
shayacuncuna.
Ñuca maquicunatapish,
chaquicunatapish llaquinayaitami
chugrichincuna.
17Ñuca tucui tullucunapish
yupanallami.
Chashna ruhuashpaca
paicunaca chaparacuncunami.
18Ñuca churanatapish
suerteta ruhuashpami,
paicunapura chaupinacurca.
19Shina cacpipish,
Mandac Dioslla,
ama ñucamanta caruyaichu.
Canca ñuca muyunditaca
jatun pirca shinami cuidangui.
Utca quishpichingapac shamuiyari.
20Espadahuan huañuchinamanta
quishpichiyari.
Ñucapac causaitaca chai allcucunapac
quirumanta quishpichiyari.
21Leonpac shimimantapish,
piña huagracunapac gachumantapish
quishpichiyari.
22Can ruhuashcataca
ñuca huauquicunamanpish huillashami.
Paicunapac chaupipimi canta alabasha.
23Tucui Mandac Diosta manchaccuna
alabaichicyari.
Tucui taita Jacobopac huahuacuna
paitaca alli nichicyari.
Taita Israelpac huahuacuna
tucui mashna paita cazuichicyari.
24Paica ñuca llaquihuan cacpipish,
mana cungarircachu.
Llaquihuan cashpa ñuca mañacpica,
ñahuita mana pacarcachu,
ashtahuanpish ayudarcami.
25Can acllashcacuna
tandanacushcapac chaupipimi
cantaca alli nisha.
Canman imata ari nishcataca
canta manchaccunapac ñaupapimi
pactachisha.
26Chaipica huacchacunaca
mana nictami micungacuna.
Mandac Diosta mashcaccunaca
paitami alli ningacuna.
¡Paicunaca unaitami causangacuna!
27Cai pacha tucuri llactacunapi
causaccunami Mandac Diosta
yuyarishpa paiman cutingacuna.
Tucui llactapi causaccunami
cambac ñaupapi alli nishpa
cumuringacuna.
28Mandac Diosmi tucuita
jatun mandac.
Paimi tucui llactacunata mandacun.
29Cai allpa pachapi causac
tucui chayuccunaca cambac
ñaupapimi cumuringacuna.
Huañushpa allpa tucunalla
gentecunapish, quiquinllatac mana
causaita chari pudiccunapish
tucuimi cambac ñaupapi cumuringa.
30Quipa huahua huahuacunapish
Mandac Diostami servingacuna.
Mandac Dios ruhuashcataca quipa
huahuacunamanpish huillangacunami.
31Pai cashcata ruhuashcata
ashtahuan quipaman manarac
huacharishcacunaman huillashpaca:
«Paimi tucui allicunata ruhuarca»
nishpami huillangacuna.
Who We AreWhat We EelieveWhat We Do
2025 by iamachristian.org,Inc All rights reserved.
