EZEQUIEL 45 - Biblia Quichua Cañar 2010

Diospaclla chicanyachishca allpamanta

1Cancuna suerteta ruhuashpa, allpata chaupishpaca, shuc parte allpataca Mandac Diospaclla cachun chicanyachinguichic. Chai allpaca chunga ishcai huaranga pichca patsac metro largo, chunga huaranga metro anchomi canga. Chai allpaca tucui muyunditami ñucapaclla chicanyachishca canga.

2Chai allpamanta largomanpish, anchomanpish ishcai patsac pichca chunga metro allpaca ñucapaclla huasita ruhuangapacmi canga. Cutin muyundi ishcai chunga pichca metro anchoca michina pambami canga.

3Chunga ishcai huaranga pichca patsac metro largo, pichca huaranga metro ancho allpata medinguichic. Chaipimi ñucapaclla huasipish, ñucapaclla chicanyachishca ucupish canga.

4Chai allpami ñucapaclla chicanyachishca allpaca canga. Chaipi ucupimi curacunaca Mandac Diosta serviccunapac yaicunga. Chai allpami curacuna causanapish, ñucapaclla huasita ruhuangapac chicanyachishcapish canga.

5Cutin chunga ishcai huaranga pichca patsac metro largo, pichca huaranga metro ancho allpaca ñuca huasipi servic levita curacunapacmi canga. Chai allpata japishpami huasicunata ruhuashpa causanga.

6Chai allpa ñaupapica israelcuna causachunmi anchomanpish, largomanpish chunga ishcai huaranga pichca patsac metrota allpa canga. Chaipimi huasicunata ruhuashpa causanga.

7Mandacpac allpaca ñucapaclla huasita ruhuangapac chicanyachishca allpa, shinallatac huasicunata ruhuangapac chicanyachishca ladopimi canga. Chai allpaca inti tigrana ladomanca mama cuchacaman, inti llucshina ladomanca Jordán yacucamanmi canga.

8Chai allpata japishpami, Israel llactata mandacca ñuca acllashca israelcunata ña mana ashtahuan llaquichinga. Chai allpaca tucui Israel aillucuna causanami canga.

Mandaccuna imata ruhuanamanta

9Mandac Diosca: ¡Israel llactata mandaccunalla! ¡Llaquichinatapish, shuhuanatapish ña saquichic! ¡Ashtahuanpish imapish allita, cashcata ruhuaichic!

10Cashcata pezaccunata, cashcata mediccunata, allita pezac balanzacunata charichic.

11Granota medingapacpish, yacuta medingapacpish shuc medinallata charichic. Bato medinaca homer medinata chungapi chaupishpa chicanyachishcami canga. Cutin efa nishca medinaca shuc homer medinata chungapi chaupishpa, chicanyachishcami canga. Homer medinami tucuita medina canga.

12Shinallatac shuc siclos cullquica ishcai chunga gerastami pezanga. Sucta chunga siclos cullquica shuc minatami pezanga.

13Ñucaman ofrendata efa medinapi medishca suctapi chaupishcata, shuc partemantaca shuc gomer trigota cunguichic. Efa medinata suctapi chaupishca shuc partetaca shuc gomer cebadata cunguichic.

14Aceitetaca quimsa chunga canchis litrota medishpa cunguichic. Bato medinaca shuc coro medinata chungapi medishpa chicanyachishcami.

15Cutin animalta cushpa, tucui rupachingapac, Dios-huan alli tucungapacca Israelpi tiyac ovejacunamanta alli huira ovejatami cada patsacmanta shucta cuna can.

16Tucui cai llactapi causaccunami cai ofrendata Israel llactata mandacman cuna can.

17Chai mandacmi israelcunapac jatun fiestacunapi, llullu quillapi, samana punzhapimi animalta huañuchishpa rupachinga, shinallatac vinota tallinga. Paicunallatacmi juchacunamanta ñucaman cunga, animaltapish rupachinga. Shinallatac ñucahuan alli tucungapacpish paicunallatacmi ofrendata cunga, israelcunapac juchacunata perdonachunpish animalta cunga.

Pascua punzhapi imata cunamanta

18Mandac Dios cutinllatac rimashpaca: Huata callari quilla, punta punzhapi mana ima tucushca becita ñucaman cushpa huañuchishpa, ñucapaclla huasita mapa illacta ruhuangui.

19Juchamanta cushca animalpac yahuartaca cura ashata japishpami ñucapac huasi pungu pilarcunapipish, altar chuscu esquinacunapipish, ucupi, canzhapi cac pilarcunapipish cahuinga.

20Chai callari quilla, canchis punzhapica maijan mana yachashpa juchallishcamantapish, manapish quiquin munaimanta juchallishcamantapish chashnallatac ruhuanguichic. Chashna ruhuacpimi, ñuca huasica mapa illac saquiringa.

21Huata callari quilla, chunga chuscu punzhapica Pascua fiestatami ruhuashpa, canchis punzhata levadura illac tandata micunguichic.

22Chai punzhapica mandacmi paipac juchacunamantapish, tucui gentecunapac juchacunamantapish shuc becita ñucaman cushpa huañuchinga.

23Chai fiestapica cada punzha canchis becita, canchis carnero ovejata canchis punzhacamanmi ñucaman cuna can. Juchacunamantaca cada punzhami shuc cari chivota huañuchinga.

24Chashnallatac cada becihuan, cada carnerohuanmi shuc efa harinata cuna can. Shuc efa harinahuanca shuc hin aceitetami cunga.

25Chai mandacca canchis quilla, chunga pichca punzhapica, chai canchis punzhapi ruhuashca shinallatacmi ruhuanga. Chai fiesta punzhapica tucui gentecunapac juchacunamanta animalta cushca shinallatac, animalta cushpa tucui rupachishca shinallatac, ofrendata cushca shinallatac, aceiteta cushca shinallatacmi ruhuanga.