NEHEMÍAS 12 - Biblia Quichua Cañar 2010

Curacunamantapish levitacunamantapish

1Salatielpac churi Zorobabelhuan, Jesúa curahuan, cutimuc Levitacuna curacunaca: Seraías, Jeremías, Esdras,

2Amarías, Maluc, Hatús,

3Secanías, Rehum, Meremot,

4Iddo, Ginetón, Abías,

5Mijamín, Maadías, Bilga,

6Semaías, Joiarib, Jedaías,

7Salú, Amoc, Hilcías, shinallatac Jedaiasmi carca. Jesúa causacui punzhacunapica paicunami curacunata, paicunapac huauquicunata mandaccuna carca.

8Levitapuramantaca: Jesúa, Binúi, Cadmiel, Serebías, Judá, shinallatac Mataniasmi paipac huauquicunahuan Diosta alli nishpa cantanata pushacurca.

9Bacbuquiaspish, Unipish paicunapac tucui huauquicunahuanmi Diospacta ruhuarcacuna.

10Jesuaca Joiacim churitami charirca. Joiacimca Eliasib churitami charirca. Eliasibca Joiada churitami charirca.

11Joiadaca Jonatán churitami charirca. Jonatanca Jadúa churitami charirca.

12Joiacim causacui punzhacunapi curacunapac huasi ucupurataca caicunami mandacurca: Seraiaspac huasi ucupurataca Meraías, Jeremiaspac huasi ucupurataca Ananías,

13Esdraspac huasi ucupurataca Mesulam, Amariaspac huasi ucupurataca Johanán,

14Melicupac huasi ucupurataca Jonatán, Sebaniaspac huasi ucupurataca José,

15Harimpac huasi ucupurataca Adna, Meraiotpac huasi ucupurataca Helcai,

16Iddopac huasi ucupurataca Zacarías, Ginetonpac huasi ucupurataca Mesulam,

17Abiaspac huasi ucupurataca Zicri, Miniaminpac, Moadiaspac huasi ucupurataca Piltai,

18Bilgapac huasi ucupurataca Samúa, Semaiaspac huasi ucupurataca Jonatán,

19Joiaribpac huasi ucupurataca Matenai, Jedaiaspac huasi ucupurataca Uzi,

20Salaipac huasi ucupurataca Calai, Amocpac huasi ucupurataca Eber,

21Hilciaspac huasi ucupurataca Hasabías, shinallatac Jedaiaspac huasi ucupurataca Natanaelmi mandacurca.

22Eliasib, Joiada, Johanán, Jadúa runacuna causacui punzhacunamanta Persia llactata jatun mandac Darío mandai punzhacunacamanmi levitacunapac, curacunapac huasi ucupurata mandaccunapac shuticunataca quillcashca carca.

23Shinallatac Eliasibpac nieto Johanán causacui punzhacunacamanmi Levipac huahua huahuacunata mandaccunapac shuticunata Judá llactata jatun mandaccuna imata ruhuashcacunata quillcanapi quillcashca carca.

24Levitacunata mandaccunaca: Hasabías, Serebías, Cadmielpac churi Jesuami carca. Paicunapac huauquicunaca Diosta servic David mandashpa quillcachishca shinallatacmi Diosta pagui nishpa cantaccunapac ñaupapi yaicuna horas chayacpi shayariccuna carca.

25Matanías, Bacbuquías, Obadías, Mesulam, Talmón, shinallatac Acubca yaicuna pungucunata cuidaccunami carca.

26Paicunaca Jesuapac churi Joiacim, mandac Nehemías, quillcac Esdras causacui punzhacunapimi cuidaccuna carca. Joiacimca Josadacpac nietomi carca.

Jerusalén muyundi pircata Diosman mingashcamanta

27Jerusalén muyundi pircata Diosman mingangapacca tucui levitacunatami maimantapish Jerusalenman pushamurca. Paicunataca platillopi, salteriopi, citarrapi Diosta alli nishpa cantashpa Diosman mingangapacmi pushamurca.

28Shinallatac cantaccunapac churicunaca Jerusalén muyundi llactacunamanta, Netofa pueblo muyundi uchilla llactacunamanta,

29Gilgal pueblomanta, Geba, Azmavet pambacunamantami tandanacumurca. Chai cantaccunaca Jerusalén pueblo muyundipimi asha huasicunata ruhuashca carca.

30Chaipica curacunapish, levitacunapish paicunarac Diospaclla tucushpami, gentecunatapish, pungucunatapish, jatun pircatapish Diospacllata ruhuarcacuna.

31Chai quipaca Judá llactata mandaccunatami jatun pirca jahuaman huichicuchun mandarcani. Ishcai coro cantaccunatami ñaupata richun mandarcani. Shuc chaupi cantaccunataca mapata shitana pungu ladoman cac alli lado pirca jahuata richunmi mandarcani.

32Chai quipaca Osaiastami Judá llactata chaupi mandaccunahuan richun mandarcani. Paicunaca:

33Azarías, Esdras, Mesulam,

34Judá, Benjamín, Semaías, shinallatac Jeremiasmi carcacuna.

35Curacunapac churicunaca trompetapi tocashpami rircacuna. Paicunaca: Zacariasca Jonatanpac churi, Jonatanca Semaiaspac churi, Semaiasca Mataniaspac churi, Mataniasca Micaiaspac churi, Micaiasca Zacurpac churi, Zacurca Asafpac churimi carca.

36Paicunapac huauquicuna Semaías, Azarael, Milalai, Gilalai, Maai, Natanael, Judá, shinallatac Hananica Diosta servic Davidpac tocanacunapimi tocashpa ricurca. Paicunapac ñaupataca quillcac Esdrasmi rirca.

37Yacu junduman llucchina punguta derechashpami Davidpac puebloman huichai rina gradata rircacuna. Davidpac huasimantaca inti llucshina yacuman rina pungucamanmi huichai rircacuna.

38Chaishuc coro cantaccunaca lluqui ladotami rircacuna. Paicunapac huashataca ñucami pirca jahuata caishuc chaupi gentecunahuan Hornos torreta pasashpa, ancho pircacaman rircani.

39Efraín pungumantaca mauca jatun pungutapish, Challua pungutapish, Hananeel torretapish, Hamea torretapish, Ovejacuna yaicuna pungutapish pasashpami prezu huasi pungupi saquirircanchic.

40Chai quipaca ishcai coro cantaccunaca Diospac huasimanmi chayarca. Ñucapish, ñucahuan puric mandaccunahuanmi chayarcani.

41Trompetapi tocac curacunaca: Eliacim, Maaseías, Miniamín, Micaías, Elioenai, Zacarías, Hananías,

42Maaseías, Semaías, Eleazar, Uzi, Johanán, Malquías, Elam, shinallatac Ezermi carca. Cantaccunaca Izrahías pushashcami sinchitami cantarcacuna.

43Chai punzhaca Diosllata cushichicpimi, achca animalcunata Diosman cushpa huañuchishpa, yallita cushicurcacuna. Chaipica huarmicunapish, huahuacunapish yallitami cushicurca. Jerusalenpi chashna yallita cushicushcaca carucamanmi uyaricurca.

Curacunamanpish, levitacunamanpish micunata cushcamanta

44Chai punzhapica imapish yalli valishcacunata, Diosman cushcacunata, punta pucushcacunata, chungamanta shucta cushcacunata, huacaichina ucuta cuidachunmi churarca. Paicunataca pueblo muyundi pambacunapi pucushcacunata, shinallatac mandashcapi nishca shina curacunaman, levitacunaman cungapac apamushcacunata tandachichunmi churarca. Judá llactapi causaccunaca curacunapish, levitacunapish Diosta servicucpica yallitami cushicurca.

45Chashnami curacunapish, levitacunapish paicunapac Dios mandashcata pactachishpa, juchamanta cushpa chuyayarcacuna. Cantaccunapish, pungupi cuidaccunapish David shinallatac paipac churi Salomón quillcashpa mandashcatami pactachircacuna.

46Jatun mandac David, Asaf causacui punzhamanta pachami Diosta pagui nishpa cantaccunata punzhacunaca tiyarca.

47Zorobabel, shinallatac Nehemías causacui punzhacunapica tucui israelcunami punzhanta cantaccunamanpish, pungupi cuidaccunamanpish cararcacuna. Shinallatac levitacunaman cungapacmi imallata chicanyachic carcacuna. Levitacunapish chai cushcacunamantaca Aaronpac huahua huahuacunamanmi cuna cashcata curca.