ISAÍAS 24 - Biblia Quichua Cañar 2010

Cai pachata Dios llaquichinamanta

1Riquichic, Mandac Diosca

cai pachataca chushacllatami

saquinga.

Cai pachapi causaccunataca

caita chaita cachashpami,

cai allpataca chushacllata

ruhuanga.

2Chai llaquica

llactapi causactapish, curatapish,

amotapish, servictapish,

amatapish, servic huarmitapish,

randictapish, catuctapish,

cullquita mañachictapish,

cullquita mañactapish,

imata mañachictapishmi

llaquichinga.

3Tucui allpaca chushaclla,

tucui imapish illacmi saquiringa.

Chaitaca Mandac Diosmi nin.

4Cai allpaca chaquishpami

huañushca shina tucun.

Tucui cai pachami chaquishpa

turicun.

Cai pachapi alli gentecunami

yura chaquic shina huañun.

5Cai pachapi causaccunaca

Dios mandashcacunata

mana cazushpami,

pandata ruhuashpa,

huiñaita Dios-huan ari

ninacushcatapish mana pactachirca.

Chai juchacunamantami

cai pachaca mapayarca.

6Chaimantami cai pachataca

Dios cachashca llaqui tucuchicun.

Cai pachapi causaccunaca

shitashcami saquirin.

Cai pachapi causaccuna

juchata ruhuashcamantami

chashna llaquichin.

Chaimantami cai pachapi

causaccunaca chingarishpa,

maijanlla saquirishca.

7Uvas chagrapi ungüi yaicucpimi,

vinopish tucurirca.

Shungupi yallita cushicushpa

causaccunami llaquirishpa huacan.

8Panderopi huactashpa

cushicunapish,

yallita cushicushpa caparinapish,

arpapi tocashpa cushicunapish

tucurinmi.

9Ña mana vinota ubiashpa

cantangacunachu.

Machachic yacupish jayacmi

tucunga.

10Llactacunapish tucurishpami

llaquilla tucushca.

Ama pi yaicuchun,

pungucunapish huichcashcami.

11Ñancunapica vino illashcamantami

huacashpa purincuna.

Tucui cushicuimi tucurishca.

Cuchicunaca cai pachapimi

chingarishca.

12Llactacunaca llaquitami

tucurishca.

Pungucunapish tucui paquirishpa

urmashpami siricun.

13Tucui cai pachapi causaccunaca

olivos yurata cuyuchishpa

granota pallacpi,

maijanlla saquiric shina,

uvasta cosechashpa,

tucui pallashca shinami

saquiringa.

14Chai saquirishcacunami

Mandac Dios jatun cacta ricushpa,

yallita cushicushpa cantanga.

Yacu chaupipi tiyac

llactacunapi causaccunapish

alli ningacunami.

15Chaimantami inti llucshina

ladopi causaccunapish,

mama cucha patapi causaccunapish

israelcunata Mandac Diosta

jatunyachishpa, alli ningacuna.

16Cai pachapi causaccunaca:

«¡Cashcata ruhuactaca

sumaimanami cangui nichicyari!»

nishpa cantashcatami uyarcanchic.

Chaita uyashpami ñucaca:

«¡Aij, ñucaca llaquipimi cani!»

nircani.

Mana cazushpami

ñucataca llaquichin.

Urmachic runacunami ñucataca

urmachin.

17Cai pachapi causaccunalla,

cancunamanca yallita manchana

jutcu urmachic tucllami

llaquichingapac shuyacun.

18Jahua pachamanta ventanata

pascashpa,

manchana llaquita cachacpica,

miticushpa callpacushpaca

jutcupimi urmanga.

Chaimanta llucshishpaca

tucllapimi japi tucunga.

Cai pacha allpapish

tucuimi cuyuringa.

19Cai pachaca tucui

ñutuchishpa tucushcami canga.

Tucui cai pachapimi yallita

manchai tiyanga.

20Cai pachaca machashca runa

shinami, sansa nicunga.

Chuclla shinami yallita cuyuringa.

Cai pachapica jucha yallita

miracpimi, tucui urmashpa

manatac jataringa.

21Chai punzhapica Mandac Diosmi

jahua pacha angelcunatapish,

cai pachapi tiyac

jatun mandaccunatapish

llaquichinga.

22Paicunaca jutcupi prezucunata

montonashca shinami canga.

Carcelpi unaita prezushca quipami

paicunataca yallita llaquichinga.

23Quillapish pingangami,

intipish musparingami.

Chaica tucuita Mandac Diosmi

Sión urcupi tiyac

Jerusalenpi mandacunga.

Pai acllashca pushac

yuyaccunapac ñaupapimi

sumaimana achic nicuc tiyacunga.