1 SAMUEL 24 - Biblia Quichua Cañar 2010

Davidca Saulta mana huañuchishpa saquishcamanta

1Saúl filisteocunahuan macanacushpa cutimucpica: «Riqui, Davidca shitashca En-gadi pambapimi» nishpa huillarcacuna.

2Shina huillacpimi, Saulca tucui israelpuramanta quimsa huaranga acllashca runacunata pushashpa Davidtapish, paipac runacunatapish mashcangapac rirca. Chashna rishpaca sacha chivocuna sirina rumi quingraicunapimi mashcagrirca.

3Shina ricushpami, oveja corral ladoman chayarca. Chai ladopimi shuc jatun machai tiyarca. Chai machaimanmi Saulca allichiringapac yaicurca. Chai machaillapitacmi ashtahuan ucuman Davidpish, paipac runacunapish miticushpa tiyacurca.

4Chaipimi Davidpac runacunaca:

—Cunan punzhami Mandac Dios: “Canta piñaccunataca cambac maquipimi churasha. Paitaca can imata munashcata ruhuangui” nishcaca pactashca— nirca.

Shina nicpimi, Davidca jatarishpa Saulpac jahualla churanata upalla ashata pitirca.

5Saulpac jahualla churanata ashata pitishcamantami Davidca paipac shungupi yallita llaquirirca.

6Chaimantami paipac runacunataca:

—Mandac Dios acllashpa aceitehuan cahuishca ñuca amota huañuchinamantaca Mandac Diosllatac jarcachun. Paica Mandac Diospaclla cachun aceitehuan cahuishca mandacmari— nirca.

7Shina nishpaca, Davidca Saulta ama huañuchichunmi paipac runacunataca sinchita rimashpa jarcarca. Chai quipaca Saulca chai machaimanta llucshishpaca rircallami.

8David jatarishpa, machaimanta llucshishpaca:

—¡Jatun mandac ñuca amolla!— nishpa caparirca.

Shina caparicpi, Saúl tigrarishpa ricucpica, Davidca allpaman chayactami cumurirca.

9Chaipimi Davidca Saultaca:

—Riqui, Davidca cantaca huañuchisha nicunmi nishpa huillaccunataca ¿Ima nishpatac cringuiyari?

10Riqui, cai machaipi Mandac Dios canta ñuca maquipi churashcataca canllatac ricurcanguimi. Canta huañuchichun nicpipish ñucaca: “Ñuca amoca Mandac Dios acllashpa aceitehuan cahuishcami. Chaimanta ñucaca mana huañuchishachu” nishpami cantaca mana huañuchishpa saquircani.

11¡Riqui, ñuca taitalla! Cambac jahualla churanata ashata pitishcataca ñuca maquipimi charicuni. Shina pitishpapish cantaca mana huañuchircanichu. Cunanca ñuca mana millai cashcatapish, canta huañuchingapac mana mashcacushtapish canllatac ña yachanguimi. Ñucaca ima juchata mana ruhuashcanichu, ashtahuanpish canmari ñucata huañuchisha nishpa mashcashpa puricungui.

12Cantapish, ñucatapish Mandac Diosllatac ricuchun. Ñucata can llaquichishcamantaca Mandac Diosllatac llaquichichun. Ashtahuanpish ñuca poderhuanca mana llaquichishachu.

13Ñaupa punzhacuna yuyaita japina shimicunapica: “Mana allicunamantami mana alli yuyaicunaca llucshin” nicmi carca. Ashtahuanpish ñuca maquihuanca cantaca mana llaquichishachu.

14Israelcunata jatun mandaclla, ¿pitatac llaquichingapac shamurcangui? ¿Pitatac caticungui? ¿Huañushca allcutachu caticungui? ¿Piquitachu caticungui?

15Mandac Diosllatac cantapish, ñucatapish ricushpa llaquichichun. Paillatac ñuca ima shina cashcatapish ricuchun. Can llaquichisha nishcamantapish paillatac quishpichichun— nirca.

16David chashna nishca quipami Saulca:

—¿Manachu ñuca churi Davidllatac cashna nicungui?— nirca.

Shina nishpami Saulca sinchita huacarca.

17Chai quipami Davidtaca:

—Ñuca canta mana allita ruhuacucpipish, canca allitami ñucamanca ruhuashcangui. Chaimantami canca ñucata atishpa cashcata ruhuac cangui.

18Mandac Dios cambac maquipi ñucata churacpipish mana huañuchishpami allita ruhuac cashcata cunan ricuchingui.

19Shuc runa paita piñacta paipac maquipi charicushpaca ¿Mana imata ruhuashpa richun cacharishpa cachanmanllachu? ¡Cunan punzha ñucata can mana huañuchishcamantaca Mandac Diosllatac canman allicunata cuchun!

20Cunanca can mandac tucunatapish allimi yachani. Israelcunata mandanaca cambac maquipimi huiñaita alli canga.

21Cunanca ñuca huañushca quipa, ñuca huahua huahuacunata mana tucuchingapac, ñuca taitapac huasi ucupuramanta ñuca shutita mana chingachingapac Mandac Diosmanta ari ni— nirca.

22Shina nicpimi, Davidca Saulman ari nirca. Chai quipaca Saulca paipac huasiman cutircami. Shinallatac Davidpish paipac runacunandimi miticushcallamanta cutirca.