LUCAS 6 - Biblia Quichua Cañar 2010

Yachacuccuna samana punzhapitrigo umata pitishcamanta(Mt 12.1-8; Mr 2.23-28)

1Samana punzhapi Jesús trigo chagra chaupita ricucpimi, paipac yachacuccunaca trigo umata pitishpa, cacushpa micui callarirca.

2Chaimantami maijan fariseocunaca:

—¿Ima nishpatac samana punzhapi mana ruhuanata ruhuacunguichic?— nirca.

3Chashna nicpimi Jesusca:

—Mandac David yarcaihuan cashpa, paihuan puriccunahuan imata ruhuashcataca, ¿manachu rezarcanguichic?

4Paica Diosta mañana huasiman yaicushpami, Diosman cushca tandata micurca. Shinallatac paihuan puriccunamanpish curcami. Chai tandataca mana pipish micunallachu carca, ashtahuanpish curacunallami micuna carca— nirca.

5Shinallatac Jesusca:

—Runa Tucungapac shamushca ñucaca, samana punzhapipish mandai pudinimi— nirca.

Jesús maqui chaquishca runata alliyachishcamanta(Mt 12.9-14; Mr 3.1-6)

6Shinallatac shuctac samana punzhapipish Jesusca israelcuna tandanacuna huasiman yaicushpami yachachicurca. Chaipimi alli lado maqui chaquishca shuc runa tiyacurca.

7Mandashcacunata yachachiccunapish, fariseocunapish samana punzhapi chai runata Jesús alliyachictami ricuracurca. Chaica, samana punzhapi alliyachicpica, juchanchingapacmi chaparacurca.

8Jesusca paicuna chashna yuyacucta yachashpami, chai maqui chaquishca runataca:

—Jatarishpa, caipi caccunapac chaupipi shayari— nirca.

Shina nicpica, chai runaca shayarircallami.

9Jesusca chaipi caccunataca:

—Cancunataca caillata tapusha: ¿Samana punzhapica, allitachu ruhuana, mana cashpaca mana allita ruhuanachu alli canga? ¿Huañuimanta quishpichinachu, mana cashpaca, causaita quichunachu alli canga?— nirca.

10Jesús chaipi caccunata muyundita ricushpa, chai runataca:

—Maquita chutai— nirca.

Shina nicpi, chai runa maquita chutacpica, maquica alli tucurcallami.

11Chaimantami yallita piñarishpa, Jesusta ima shina huañuchinata yuyarinacurca.

Jesús chunga ishcai apostolcunata acllashcamanta(Mt 10.1-4; Mr 3.13-19)

12Chai punzhacunapimi Jesusca Diosta mañangapac urcuman rirca. Chaipica tucui tutami Diosta mañarca.

13Ña punzhayamucpimi, yachacuccunata cayashpa, paicunamantaca chunga ishcaita acllashpa, apostolcunata shutichirca.

14Paicunaca: Pedro nishca Simón, Simonpac huauqui Andrés, Jacobo, Juan, Felipe, Bartolomé,

15Mateo, Tomás, Alfeopac churi Jacobo, Simón Celote,

16Jacobopac huauqui Judas, Judas Iscariotemi carca. Quipamanca paimi Jesustaca huañuchiccunaman japichirca.

Jesús achca gentecunata yachachishcamanta(Mt 4.23-25)

17Jesús paicunahuan urcumanta shamushpaca, shuc pambamanmi chayarca. Chai pambamanmi paipac yachacuccunapish, Judea llactamantapish, Jerusalén pueblomantapish, mama cucha lado Tiro llactamantapish, Sidón llactamantapish achca gentecuna Jesús yachachishcata uyangapac, ungüicunamanta alliyangapacpish shamushca carca.

18Millai supaicuna japishca cashcamanta llaquihuan caccunatapish alliyachircami.

19Alliyachiclla cashcata yachashpami, tucui gentecuna Jesuspi tuparina yuyailla carca.

Huacaccunaca cushilla,cushicuccunaca llaquilla canamanta(Mt 5.1-12)

20Jesús paipac yachacuccunata ricushpaca:

«¡Cushicuichic, huacchacuna!

Jahua pacha Dios

mandacucca cancunapacmi.

21¡Cunan yarcaihuan

caccunaca cushicuichic!

Mana nictami micunguichic.

¡Cunan huacaccunaca

cushicuichic!

Cushicushpa asinguichicmi.

22Runa Tucungapac shamushca

ñucamanta gentecuna piñacpipish,

llucchishpa cachacpipish,

camicpipish, ima millaita

rimacpipish, ¡cushicuichic!

23Cancunata chashna llaquichicpipish, ¡cushicuichiclla! Diosca jahua pachapica, cancuna japina cashcataca achcatami cunga. Dios ima nishcata huillaccunatapish chai shinallatacmi ñaupa taitacunaca llaquichic carca.

24¡Chayuccunalla, imachari tucunguichic! Cancunaca ñami charishcahuan cushicushcanguichic.

25¡Cunan mana nicta micuccunalla, imachari tucunguichic! Cancunaca yarcaihuanmi canguichic. ¡Cunan cushicushpa asiccunalla, llaquihuanmi huacanguichic!

26¡Tucui gentecunapac alli nishcacunalla, imachari tucunguichic! Chai shinallatacmi ñaupa taitacunapish, llullac huillaccunataca alli nic nirca.

Piñaccunata cuyanamanta(Mt 5.38-48; 7.12)

27Caipi ñucata uyaccunataca cashnami nini: Cancunata piñaccunata cuyaichic. Mana ricunayachiccunaman allita ruhuaichic.

28Cancunata sinchita rimacpica, sumac rimaicunahuan cutichichic. Cancunata camiccunamanta Diosta mañanaichic.

29Canta shuc lado jazhapi huactacpica, caishuc ladopipish huactachun saquingui. Cambac jahualla churanata quichucpica, ucu churanatapish apachun saquingui.

30Maijan imata mañacpipish cungui. Maijan canmanta imata quichucpipish, upalla saquingui.

31Ima shinami shuccuna cancunaman allita ruhuachun ninguichic, chashnallatac cancunapish shuccunaman allita ruhuaichic.

32Cancunata cuyaccunallata cuyashpaca, ¿ima allitatac ruhuanguichic? Diosta mana cazuccunapish paicunata cuyaccunataca cuyancunami.

33Allita ruhuaccunallata cuyashpaca, ¿ima allitatac ruhuanguichic? Diosta mana cazuccunapish chashnaca ruhuancunami.

34Imatapish cutichipaccunallaman mañachishpaca, ¿ima allitatac ruhuanguichic? Diosta mana cazuccunapish chashnaca mañachinacuncunami.

35Cancunata piñaccunata cuyaichic, paicunaman allita ruhuaichic. Imata mañachishpaca, ama chasquina yuyaihuan caichicchu. Chashna ruhuashpami, allicunata japinguichic. Jahua pacha Diospac huahuacunapishmi canguichic. Diosca mana paita pagui niccunatapish, millaicunatapish llaquinmi.

36Chashnallatac Dios ima shinami cancunata llaquin, chai shinallatac shuccunata llaquichic.

Mana juchanchina cashcamanta(Mt 7.1-5)

37Ama shuccunata juzgaichichicchu. Shina mana juzgacpica, Diospish cancunata mana juzgangachu. Ama shuccunata juchanchichicchu. Shina mana juchanchicpica, Diospish cancunata mana juchanchingachu. Shuccunata perdonaichic. Chashna perdonacpica, Diospish cancunapac juchacunata perdonangami.

38Shuccuna ima minishtishcata cuichic, Chashna cucpica, Diospish cancunaman cungami. Paica alli medidapimi jatun cushtalpi alli cuyuchishpa jundachishpa, talliricucta cunga. Cancuna cushca shinallatacmi Diosca cancunamanpish cunga» nirca.

39Jesús chimbapurashca parlohuan parlashpaca: «¿Shuc ñahui mana ricuc runaca caishuc mana ricuc runata pushai pudingachu? ¿Manachu ishcaitac mai jutcupi urmanman?

40Yachacucca yachachicta mana yallichu. Shina cashpapish tucuita alli yachacushpaca, yachachic shinallatacmi tucunga.

41¿Ima nishpatac cambac ñahuipi tiyacuc caspita ricushpa, shucpac ñahuipi tiyacuc ucshatarac ricungui?

42Cambac ñahuipi tiyacuc caspita manarac ricushpaca, ¿ima shinatac cambac huauquitaca: “Shuyai, cambac ñahuipi tiyacuc ucshata llucchisha” ningui? Mishqui shimi, jayac shungu, cambac ñahuipi tiyacuc caspitarac llucchi. Chashna llucchishpami, alli ricushpa, cambac huauquipac ñahuipi tiyacuc ucshataca llucchingui.

Yuraca pucushpa ricuchic cashcamanta(Mt 7.17-20; 12.34-35)

43Alli yuraca, mana alli granota mana pucunchu. Mana alli yurapish, mana alli granota pucunchu.

44Yuraca pucushpami ima yura cashcata ricuchin. Higoca, mana casha yurapi pucunchu. Uvaspish chini yurapica mana pucunchu.

45Alli runaca, shungupi alli yuyaiyuc cashcamantami allita riman. Mana alli runaca shungupi millai yuyai junda cashcamantami mana allita riman. Shungupi ima tiyashcatami shimica riman.

Jesús ishcai huasichiccunamanta parlashcamanta(Mt 7.24-27)

46Cancunaca, ¿ima nishpatac Apunchic Jesús, Apunchic Jesús nicushpapish, mandashcataca mana pactachinguichic?

47Maijanpish ñucapacman shamushpa, ñuca nishcata uyashpa cazucca,

48ucuta allashpa, rumi allpapi huasichic runa shinami. Chai huasica sinchi rumi allpapimi ruhuashca. Chaimantami achca yacu shamushpa huactarishpapish, yacu jundashpapish mana imata ruhuanchu.

49Maijanpish ñuca nishcata uyashpapish mana cazucca, mana ucuta allashpa, cabia allpapi huasichic runa shinami. Chai huasita achca yacu shamushpa huactarishpaca, tucui urmachinllami. Chaica yalli llaquimi» nirca.