HECHOS 12 - Biblia Quichua Cañar 2010

Jacobota huañuchishcamantapish,Pedrota carcelpi churashcamantapish

1Chai punzhacunallatacmi jatun mandac Herodesca maijan criccunata piñashpa, llaquichingapac japichi callarirca.

2Chashnami Juanpac huauqui Jacobota espadahuan huañuchichun mandarca.

3Chashna ruhuashca israelcunaman alli ricuricpimi, Pedrotapish japichirca. Chai punzhacunaca, levadura illac tandata micuna fiestami carca.

4Chaimantami Pedrota carcelpi churashpa, chunga sucta soldadocunata, chuscu chuscu chullayanacushpa cuidachun churarca. Pedrotaca Pascua punzhacuna quipa, tucui gentecunapac ñaupaman llucchishpa juchanchinatami yuyarca.

5Chaimantami Pedrotaca carcelpi alli cuidaracurca. Ashtahuanpish tandanacushca criccunaca Pedromanta Diosta mañanataca manatac saquircachu.

Pedro carcelmanta llucchishcamanta

6Mandac Herodesca cayandimi Pedrota carcelmanta llucchishpa, juchanchigricurca. Pedroca chai tutaca ishcai cadenacunahuan huatashca, ishcai soldadocunapac chaupipimi sueñucurca. Caishuc soldadocunaca cárcel pungupimi cuidacurca.

7Chashna Pedro sueñucucpimi, Mandac Dios cachashca ángel cungailla ricurishpa, chai ucuta achicyachirca. Chai ángel Pedrota tuparishpa ricchachishpaca: «¡Utca jatari!» nirca. Chashna nicpica, huatashca cadenaca Pedropac maquicunamanta cacharirishpa urmarcallami.

8Shinallatac angelca: «Chumbilliri, ushutatapish churari» nircami. Pedro chashna ruhuacpica, cutin chai angelca: «Jahualla churanatapish churarishpa, ñucata cati» nirca.

9Chaimantami Pedroca chai angelta catishpa llucshirca. Pedroca ángel chashna llucchicushcataca mana yuyarcachu, ashtahuanpish muscuipi cashcatami yuyarca.

10Paicuna punta cuidacuc soldadocunatapish, quipata cuidacuc soldadocunatapish pasashpa, canzha jatun fierro punguman chayacucpica, chai punguca paillatac pascarircallami. Ñanman llucshishpa, ashata ricucpica, chai angelca chingarircami.

11Chaimanta Pedro yuyaita japishpaca: «Cunanca, israelcunapac maquimantapish, Herodespac maquimantapish quishpichingapac Mandac Dios paipac angelta cachashcatami yachani» nirca.

12Chashna cashcata yuyashpami, Marcos nishca Juanpac mama Mariapac huasiman rirca. Chai huasipica achca criccunami tandanacushpa, Diosta mañacushca carca.

13Pedro calle punguta huactacpica, Rode huarmi huambrami ricungapac llucshirca.

14Chai huambra Pedropac rimaita ricsishpa, punguta manarac pascashpami, yallita cushicushpa, Pedro cashcata huillangapac ucuman callparca.

15Chashna huillacpimi paicunaca:

—¡Musparinguimi!— nirca.

Chashna nicpi, chai huambraca:

—¡Mana, paillatacmi!— nirca.

Chashna nicpipish paicunaca:

—¡Paihuan puric angelmi canga!— nirca.

16Chaicamanca Pedroca pungupi huactacurcallami. Paicuna punguta pascashpa Pedrota ricushpaca, mancharishpami saquirircacuna.

17Pedroca upalla cachun, maquihuan señata ruhuashpami, Mandac Dios ima shina paita carcelmanta llucchishcata parlarca. Chashna parlashpaca:

—Caitaca Jacobomanpish, caishuc criccunamanpish parlanguichic— nishpaca, chaimanta llucshishpa, shuc llactaman rircallami.

18Ña pacaricpi, cuidac soldadocunaca:

—¿Maipitac Pedroca?— nishpami, caishuc chaishuc mancharishpa tapunacurca.

19Herodesca Pedrota mashcachishpa, mana tarishpami, cuidac soldadocunata alli tapushpa, paicunata huañuchichun mandarca. Chai quipaca Judea llactamanta llucshishpa, Cesarea pueblopimi causagrirca.

Herodes huañushcamanta

20Mandac Herodesca Tiro pueblopi, Sidón pueblopi causaccunahuanmi yallita piñarirca. Chashna piñarishpami, chai llactapi causaccunaman ama imata catuchun mandarca. Chaimantami paicunaca shuc yuyailla tucushpa, Herodespac mayordomo Blastota Herodes-huan parlashpa cuchun mañarcacuna. Chai llactacunapi causaccunaca Herodespac llactamantami micunata randishpa causac carca. Chaimantami mana piñanacunata munarcacuna.

21Chashna mañacpica, shuc punzhapacmi cayarca. Chai punzhapimi Herodesca mandac churanata churarishca, jatun tiyarinapi tiyarishpa, paicunataca sumacta rimarca.

22Chaimanta chai gentecuna caparishpaca: “¡Canca Dios shinami rimangui, mana runa shinachu rimangui!” nircacuna.

23Herodes “Dios shinami cani” nishpa, Mandac Diosta mana jatunyachishcamantami chai rato ángel ungüita cachashpa huañuchirca. Chashnami curucuna micushca tucurirca.

24Diospac shimica ashtahuanmi huillarishpa catirca.

25Bernabepish, Saulopish paicuna ruhuana cashcata tucuchishpami, Jerusalenmanta Marcos nishca Juanta pushashpa, cutinllatac Antioquía puebloman cutircacuna.