1Cutinllatac huichai ricushpaca, ishcai urcu chaupimanta chuscu carretacuna llucshimuctami ricurcani. Chai urcucunaca bronce urcucunami carca.
2Shucniqui carretataca puca caballocuna, ishcainiqui carretataca yana caballocuna,
3quimsaniqui carretataca yurac caballocuna, chuscuniqui carretataca muru bayu caballocunami aisacurca.
4Chaita ricushpami, ñucahuan parlacuc angeltaca:
—Ñuca mandaclla, ¿caicunaca imatac?— nircani.
5Shina tapucpimi angelca:
—Caicunaca jahua pacha chuscu huairacunami cai pachata Mandac Diospac ñaupamanta llucshimucun.
6Yana caballocuna aisashca carretaca jahua llactamanmi ricun. Yurac caballocunaca aisashca carretaca inti tigrana ladomanmi ricun. Muru caballocunaca aisashca carretaca ura lado llactamanmi ricun— nirca.
7Bayu caballocuna aisashca carretaca cai pachata muyugrinatami yallita munarca. Chaimantami angelca:
—¡Cai pachata muyugrichic!— nirca.
Chaimantami cai pachata muyugrirca.
8Chai quipata ángel ñucata cayashpaca:
—Riqui, jahua lado llactaman riccunaca chai llactapi ñuca piñarishcata chiriyachingapacmi rirca— nirca.
Josuepac curunamanta9Mandac Dios ñucata rimashpaca:
10«Babiloniapi prezu cashpa, cutimuc Heldaimanta, Tobiasmanta, Jedaiasmanta ofrendata chasqui. Chaimantaca chai punzhallatac Sofoniaspac churi Josiaspac huasiman ri.
11Chaiman chayashpaca cullquimanta, curimanta coronata ruhuangui. Chaitaca Josadacpac churi, curacunata mandac Josueman churachingui.
12Chashna churachishpaca, tucuita Mandac Dios ñucaca:
“¡Retoño shuti runaca
ñallami shamunga!
¡Paica, paipac
sapillamantatac huiñashpami,
Mandac Dios ñuca
huasitaca shayachinga!
13Paimi, Mandac Dios ñuca
huasitaca shayachinga.
Paica tucuipac
alli nishcami canga.
Pai mandashpa tiyarinapi
tiyarishpami, tucuita mandanga.
Paipac ladopica
shuc curami shayacunga.
Paihuanca shuc
yuyaillami canga” ninimi.
14Chai coronaca Helem, Tobías, Jedaías runacunapish, Sofoniaspac churi Henpish yuyarichunmi Mandac Diospac huasipi churashca canga» nirca.
15Carupi causaccuna shamushpami, Mandac Diospac huasita shayachinata ayudanga. Chaita ricushpami, Mandac Diosllatac cancunapacman ñucata cachashcata yachanguichic. Mandac Dios rimashcata uyashpa cazucpimi, chashnaca tucunga.
Who We AreWhat We EelieveWhat We Do
2025 by iamachristian.org,Inc All rights reserved.
