1 SAMUEL 9 - Biblia Quichua Cañar 2010

Samuelhuan Saúl tupashcamanta

1Benjamín aillupurapimi alli nishca Cis runa tiyarca. Cisca Abielpac churi. Abielca Zerorpac churi. Zerorca Becoratpac churi. Becoratca Afiapac churimi carca. Paica Benjaminpac aillupurami carca.

2Cisca cunanlla huiñai sumac Saúl churitami charirca. Israelpurapica paita yalli ashtahuan sumacca mana tiyarcachu. Paica tucui gentecunatami rigramanta huichaiman yalli carca.

3Shuc punzhami paipac taita Cispac burrocuna chingarirca. Chaimantami paipac churi Saultaca:

—Riqui, cunanca ñucanchicta servic runacunamanta maijanhuan burrocunata mashcamugri— nirca.

4Shina nicpimi, Saulca Efraín urcuta rishpa Salisa llactacaman mashcashpa mana tarirca. Chai quipaca Saalim llactamanmi mashcangapac rirca. Chaipipish mana tarircachu. Shinallatac Benjamín aillupac llactaman rishpapish manallatac tarircachu.

5Zuf llactaman ña chayamushpami Saulca paihuan ric servic runataca:

—Cutishunlla, ñuca taitaca burrocuna chingarishcata cungarishpami, ñucanchicmanta ashtahuan llaquicunga— nirca.

6Shina nicpimi, chai runaca:

—Riqui, cai pueblopica Diospaclla cac runami tiyan. Paitaca tucuimi alli nincuna. Pai ima nishcaca chashnatacmi pactanlla. Chashna cashcamanta paiman tapungapac jacu. Ñucanchic maita rishpa mashcanatapish huillangapishchari— nirca.

7Shina nicpimi Saulca:

—Shina cashpaca jacu. Ashtahuanpish chai runaman carangapacca ¿Imatatac apashun? Ñucanchicpac cucayu tandapish, tucurishcami. Diospaclla runaman carangapacca imata mana charinchicchu— nirca.

8Shina nicpimi, chai servic runaca Saultaca:

—Riqui, ñucami quimsa gramosta pezac cullquita caipi charicuni. Ñucanchic mai ñanta rishpa mashcagrinata Diospaclla runa huillachunca caitami cushun— nirca.

9Ñaupa punzhacunaca Israel llactapi maijanpish Diosman imata tapusha nishpaca: «Dios ricuchishcata huillac runaman jacuchic tapushun» nicmi carca. Chashna huillac runallatatacmi cunan punzhacunaca Dios ima nishcata huillac nincuna.

10Shina nicpimi, Saulca servic runataca:

—Allimi, shina cashpaca jaculla— nirca.

Shina nishpami Diospaclla cac runa causana puebloman rirca.

11Chai puebloman chayana ñanta huichai ricushpami, yacuta apangapac urai shamucuc solteracunahuan tuparca. Paicunatami:

—¿Dios ricuchishcata huillac runaca cai pueblopichu?— nishpa tapurca.

12Shina tapucpimi, chai solteracunaca:

—Ari, utca richiclla, cancunata ñaupashpami ricun. Cunanca gentecuna animalta Diosman cushpa, lomapi huañuchina punzha cacpimi, paica ima ruhuana cashcata ruhuangapac puebloman shamushca, utca richiclla.

13Puebloman ña yaicushpaca manarac micungapac lomaman huichai ricpimi tupanguichic. Gentecunaca pai chayangacaman mana micungachu. Paimi Diosman cushca animaltaca bendicianga. Chai quipami tucui riccuna micunga. Cunan utca rishpaca manarac huichaiman ricpimi tupanguichic— nirca.

14Shina nicpimi, paicunaca puebloman huichai rirca. Paicuna puebloman chayashpa, chaupi pueblopi cacpimi, Samuelca lomaman huichai ringapac paicunapacman cuchuyarca.

15Saúl chayangapac shuc punzha siricpimi, Mandac Diosca Samuelman rimashpaca:

16«Caya cai horasllatacmi Benjamín aillupac llactamanta shuc runata cambacman cachasha. Paitaca ñuca acllashca israelcunata mandac cachun aceitehuan cahuingui. Paimi ñuca acllashcacunataca filisteocunapac maquimanta quishpichinga. Ñuca acllashcacuna llaquilla causacushcata ricushcanimi. Paicuna caparishpa mañashcaca ñucamanmi uyarirca» nirca.

17Saulta Samuel ricucpimi Mandac Diosca: «Riqui, cai runatami ñucaca canman huillarcani. Paimi ñuca acllashcacunata mandanga» nirca.

18Chai puebloman yaicuna chaupi pungupi Saúl Samuelpacman cuchuyashpaca:

—Dios ricuchishcata huillac runapac huasi maipi cashcata huillaiyari— nirca.

19Shina nicpimi, Samuelca Saultaca:

—Ñucami Dios ricuchishcata huillacca cani. Cunanca ñucahuan micungapac lomaman jacu. Caya tutamantami cambac shungupi imata yachasha nicushcataca huillashpa, caya minchacaman nishpa cachasha.

20Burrocuna chingarishcaca quimsa punzhami tucushca. Ama llaquilla caichu, ñami taririshca. Ashtahuanpish ¿israelcuna tucui charinacunaca pipashi canga? ¿Manachu cambacpish, cambac huasi ucu familiapacpish canga?— nirca.

21Shina nicpimi Saulca:

—¿Ñucaca manachu tucui Israel aillupuramanta yalli ashalla cac Benjaminpac aillupura cani? ¿Manachu ñuca huasi ucu familiaca tucui Benjamín aillupuramanta ashtahuan uchilla? ¿Ima nishpatac caitaca ninguiyari?— nirca.

22Chai quipami Samuelca Saultaca paita servic runandi micuna huasi ucuman aparca. Chaipimi tucuita yalli ashtahuan alli tiyarinapi tiyachirca. Chaipica quimsa chunga gentecunami carca.

23Chai quipami Samuelca yanuc runataca:

—Chican huacaichingui nishca aichata carangapac apamui— nirca.

24Shina nicpimi, yanuc runaca shuc changa aichata chai jahuapi imalla churashcacunandi apamushpa Saulpac ñaupapi churarca. Shina churacpimi Samuelca:

—Riqui, caimi canman huacaichishca aichaca. Cai aichata japishpa micuilla. Cunan punzha canman carangapac allichishpaca: “Ñucaca micuiman shamuchunmi gentecunata cayarcani” nishpami huacaichircani— nirca.

Chashnami Saulca chai punzhaca Samuelhuan micurca.

25Chai lomamanta puebloman cutimushpami Samuelca huasi jahuapi tiyac pambapi Saulhuan parlanacurca shinallatac samarichunpish shuc camata allichirca.

26Cayandi tutamanta inti ña llucshicucpimi, huasi jahuapi tiyac pambapi Saúl sueñucucpi Samuelca:

—Jatari ña ri— nirca.

Shina nicpimi, Saulca jatarishpa Samuelhuan canzhaman llucshirca.

27Chai pueblomanta ña llucshicushpami Samuelca Saultaca:

—Canta servictaca ñaupachishpa cachai. Ashtahuanpish canman Dios ima nishcatami huillagrini— nirca.

Chai servic runaca ñaupashpa rircallami.