ESDRAS 6 - Biblia Quichua Cañar 2010

Jatun mandac Darío mandac Ciro quillcashcata tarishcamanta

1Shina nicpimi, jatun mandac Darioca quillcacunata huacaichina huasipi mashcachun mandarca. Shina mandacpimi, Babilonia llactapi cac huasipi imapish yalli valishcacunata huacaichinapi mashcarca.

2Chashna mashcashpami, Media llacta Acmeta pueblopi mandashpa tiyana huasipi tarirca. Chai quillcashcapica:

3«Jatun mandac Ciro Babilonia llactata mandai callari huatami jatun mandac Ciro Jerusalenpi causac Diospac huasita cutin shayachichun mandan. Chai mandashcapica: Callari rumita churashpa pircata ruhuashpa Diospac huasita cutin shayachichic. Chai huasipimi animalcunata Diosman cushpa huañuchina canga. Altomanca ishcai chunga canchis metro, anchomanpish ishcai chunga canchis metromi canga.

4Chai huasipica quimsa fila labrashca rumicunata, shuc fila mushuc caspicunata churanguichic. Chaita ruhuangapacca jatun mandac ñuca huasipi tiyac valishcacunahuan randinguichic.

5Shinallatac Jerusalenpi causac Diospac huasimanta Babilonia llactaman Nabuconodosor apashca curimanta, cullquimanta ruhuashca imalla tiyashcacunatapish apanguichic. Chaicunataca Jerusalenpi causac Diospac huasiman apashpa, chai churana pushtullapitac churanguichic» nishpa quillcashcami carca.

6«Cunanca, jatun yacu chimba lado llactamanta mandac Tatnaipish, Setar-boznaipish, jatun yacu chimba ladollamantatac cac mandaccunapac huauquicunapish Jerusalenmanta anchurichic.

7Diospac huasita shayachinata ama jarcaichicchu. Judá llactapi causaccunata mandacpish, mandac curacunapish Diospac huasita utcapi shayachishcallapitac shayachichun saquichiclla.

8Diospac huasita cutin shayachichun Judá llactata mandaccunata ayudachunmi cancunataca mandani. Chai huasi ruhuana ama jarcarichunca, jatun yacu chimba ladopi causaccuna cushca impuestota, jatun mandacpac ima valishcacunata randichun cunguichic. Pacta cungaringuichicman.

9Curacuna mañashca shinallatac jahua pachapi causac Diosman cushpa, tucui rupachinacunataca cada punzha mana cungarishpa becicunata, cari ovejacunata, maltón ovejacunata cunguichic. Shinallatac trigota, cachita, vinota, aceitetapish cunguichic.

10Chai animalcunataca jahua pachapi causac Diosman rupachishpa, mishquillata ashnachichun, shinallatac ñucapac causaimantapish, churicunapac causaimantapish mañachunmi cuna canguichic.

11Shinallatac maijanpish ñuca mandashcata mana cazucpica, paipac huasipi tiyac viga caspita llucchishpa shayachishpa, chaipi huarcunguichic. Chashnallatac paipac huasica tigrachishcami canga nishpami mandani.

12Maijan jatun mandacpish, maijan gentecunapish ñuca mandashcata mana cazushpa, Jerusalenpi cac Diospac huasita urmachicpica, paipac shutita chaipi causachun saquic Diosllatac llaquichichun. Jatun mandac Darío ñucami caitaca mandani. Chaitaca utca pactachinguichic» nishpami quillcani.

Diospac huasita shayachinata tucuchishcamanta

13Chaimantami jatun yacu chimba lado llactata mandac Tatnaipish, Setar-boznaipish, paicunapac huauquicunapish, jatun mandac Darío mandashcata mana cungarishpa tucuita ruhuarca.

14Cutin Judá llactapi causaccunata mandaccunaca Dios ima nishcata huillac Hageopish, Iddopac churi Zacariaspish, huillashca shinallatacmi chai huasita shayachishpa, tucui alli ruhuarcacuna.

Chashnami israelcunapac Dios, shinallatac Persia llactata jatun mandac Ciro, Darío, Persia Artajerjes mandashca shinallatac chai huasita shayachirca.

15Chai huasica jatun mandac Darío sucta huatata mandacucpi, Adar quilla quimsa punzhapimi tucurirca.

16Chashna tucuricpica, chai huasita Diosman cushpami israelcunapish, curacunapish, levitacunapish, prezu apashcamanta caishuc cutimushcacunapish yallita cushicurca.

17Chai huasita Diosman cushpaca, patsac becita, ishcai patsac cari ovejata, chuscu patsac maltón ovejatami Diosman curcacuna. Tucui israelcunapac juchamantaca chunga ishcai Israel aillucuna cashca shinallatacmi chunga ishcai maltón chivota curcacuna.

18Chai quipaca Moisés mandashpa quillcashcapi nicushca shinallatacmi curacunataca servina horasllatac servichun, levitacunatapish chullayanacushpa Jerusalenpi Diosta servichun churarca.

Pascua fiestata ruhuashcamanta

19Huata callari quilla chunga chuscu punzhapimi prezu apashcamanta cutimushcacunaca cushicushpa, Pascua fiestata ruhuarcacuna.

20Curacunapish, levitacunapish shuc shinalla tucushpami tucui mashna chuyanlla tucurcacuna. Chashna tucushpami prezu apacpi cutimushcacunamanta, paicunapac huauqui curacunamanta, paicunallamantatac Diosman animalcunata cushpa, Pascua fiestata ruhuarca.

21Chai Pascua punzhapica prezu apashcamanta cutimushca israelcunaca Diosta mashcangapac chai llactapi causac mapa gentecunamanta anchurishca gentecunahuanmi tandanacushpa micurca.

22Levadura illac tandata micuna jatun fiestataca canchis punzhatami yallita cushicushpa ruhuarcacuna. Mandac Dios paicunata cushichishcamanta, Asiria llactata jatun mandacta, Diosllatac yuyaita cushpa israelcunapac Diospac huasita ruhuanata mana jarcashcamantami chashna cushicurca.