2 CRÓNICAS 17 - Biblia Quichua Cañar 2010

Jatun mandac Josafat Judá llactata mandashcamanta

1Asa huañucpica, paipac churi Josafatmi Judá llactata mandai callarirca. Paica sinchitami israelcunahuanca shayarirca.

2Judá llactapi cac muyundita pircashca pueblocunapica macanacuc soldadocunata, tucui Judá llacta ucupica chapac soldadocunatami churarca. Shinallatac paipac taita quichushca Efraín pueblocunapipish churarcami.

3Pai mandai callarishpaca, ñaupa taita David causashca shinallatacmi allita ruhuashpa causarca. Baal dioscunataca mana catircachu. Chaimantami Mandac Diosca Josafathuan carca.

4Paipac taitapac Diosta servishpami, mandashcacunata cazushpa causarca. Israelcuna ruhuashca shinaca mana causarcachu.

5Chaimantami Mandac Diosca Josafat mandanataca pi mana cuyuchipacta ruhuashpa, paipac maquipi churarca. Tucui Judá llactapi causaccunami Josafatman imallatapish carangapac apamurca. Chaimantami achca charicpish, alli nishcapish carca.

6Mandac Diosta cazushpa, causana munaitami paipac shungupi ashtahuan charirca. Lomacunapi tiyac altarcunatapish, Judá llacta chaupipi tiyac Asera huarmi diosta yuyarina yuratapish anchuchircami.

7Paica quimsa huatata mandacushpami, paita ayudac Ben-hail, Abdías, Zacarías, Natanael, Micaías mandaccunata Diosmanta yachachichun, Judá llactapi cac pueblocunaman cacharca.

8Paicunahuanca Semaías, Netanías, Zebadías, Asael, Semiramot, Jonatán, Adonías, Tobías, Tobadonías levitacunata shinallatac Elisama, Joram curacunatami cacharca.

9Paicunami Mandac Dios mandashpa quillcachishcata apashpa, tucui Judá llactapi cac pueblocunapi yachachirca.

10Judá llacta muyundipi tiyac llactacunata tucui mandaccunami yallita Mandac Diosta mancharcacuna. Chaimantami Josafathuan macanacunataca mana munarca.

11Maijan filisteocunaca tucui caranacunata, impuestota, cullquitami Josafatman apamurca. Arabecunapish canchis huaranga canchis patsac maltón ovejacunata, canchis huaranga canchis patsac cari chivocunatami apamurca.

12Josafatca ashtahuanmi jatunyashpa catirca. Judá llactapica torrecunata, imalla charishcacunata huacaichina pueblocunatami shayachirca.

13Judá llactapi cac pueblocunapica micunacunatapish, ima charinacunatapish achcatami charirca. Jerusalenpica sinchi alli macanacuc soldadocunatami charirca.

14Chai soldadocunaca paicunapac ñaupa taitacunapac huasi ucupura mashna cashcata yupacpica, Judá llactapica huaranga soldadocunata mandaccunapuramantaca Adnasmi quimsa patsac huaranga ashtahuan sinchi soldadocunata mandacurca.

15Paipac quipaca Johananmi ishcai patsac pusac chunga huaranga sinchi soldadocunata mandacurca.

16Chai quipaca Zicripac churi Amasiasmi ishcai patsac huaranga sinchi soldadocunata mandacurca. Paica, paipac munaimantami Mandac Diosta servisha nishca carca.

17Benjaminpuramantaca imatapish mana manchac Eliadami ishcai patsac huaranga sinchi soldadocunata mandacurca. Chai soldadocunaca flechahuan, jarcarina escudohuan macanacungapac allichirishcami carcacuna.

18Chai quipaca Jozabadmi macanacungapac alli allichirishca patsac pusac chunga huaranga soldadocunata mandacurca.

19Paicunami jatun mandac Josafatpac soldadocuna carca. Tucui Judá llactapi cac muyundita pircashca pueblocunapi churashca soldadocunataca mana yupashcachu carca.