1¡Aij, imatapish quichuc runalla!
Canmantaca pi mana quichushcachu.
Shuccunata pandachishpa
llaquichicpipish, cantaca
manarac chashnallatac
llaquichishcachu.
Imata quichushpa
tucuchishca quipaca cantapish
chashnallatacmi ruhuanga.
Shuccunata mana cazushpa,
can llaquichishpa tucuchishca
quipaca cantapish
chashnallatacmi ruhuanga.
2Mandac Dioslla,
ñucanchicta llaquiyari.
Canllatami shuyacunchic.
Tutamanta cambac rigrahuan
ayudaiyari.
Ñucanchic jatun llaquipi
cacpipish quishpichiyari.
3Can rimashca culun nishpa
uyaricpica, gentecunaca
miticuncunami.
Can jataricpica, llactacunapi
causaccunaca caita chaitami callpan.
4Oruga curucuna micuc shinami,
paicuna imalla charishcacunataca
tandanga.
Langosta curucuna shinami,
chai charishcacunata quichunga.
5¡Jahua pachapi causac
Mandac Diosca jatunyachishca
cachun!
Paimi Sión llactapica
allita mandanatapish,
cashcata mandanatapish churarca.
6Paica allitami mandanga.
Cushi causaimi tiyanga.
Shinallatac alli yuyaipish,
quishpirinapish yallimi tiyanga.
Mandac Diosta manchanami
yalli valishcacunatapish
yalli valin.
7Jatun mandacpac huillaccunaca
canzhapimi caparin.
Cushi causaimanta huillaccunaca
yallitami huacan.
8Ñancunapish shitashcami.
Pipish ña mana purincunachu.
Huillaccunataca mana cazushpami,
ari nishcatapish
mana pactachin.
Pitapish mana manchancunachu.
9Allpapish yallita llaquillami.
Líbano urcu yuracunapish
pingaihuanmi.
Sarón pambapish shitashca
pambami tucushca.
Basán urcupish, Carmelo urcupish
chaquishcami saquirishca.
10Mandac Diosca:
«Cunanmi jatarigrini.
Cunanmi tucuipac alli nishcapish,
jatunyachishcapish casha.
11Cancuna yurarishcaca
sacha panga shinallami.
Chaimantami tamota
sajuaringuichic.
Chaitaca cancunapac samaillatacmi
nina shina tucuchinga.
12Gentecunaca rupashca uchupa
shinami canga.
Pitishca cashacuna shinami,
rupashpa chingaringa.
13Caru llactapi causaccunalla,
ñuca ruhuashcata ricuichicyari.
Cuchulla llactapi causaccunalla,
ñuca poderta ricsichicyari» ninmi.
14Sión llactapimi
juchasapacunaca chucchuncuna.
Chashna chucchushpaca:
«Ñucanchicpuramantaca,
¿pitac tucuchic ninapi
causai pudingayari?
Ñucanchicpuramantaca,
¿pitac huiñai huiñaita
rupacuc ninapica
causai pudingayari?» ninacun.
15Maijanpish cashcata ruhuac,
mana llullac, pimanta quichushpa
mana chayucyac,
allita ruhuangapac imata
mana pacalla japic,
huañuchina yuyaita mana uyasha nic,
ima mana allita mana ricusha nicmi
16mana manchashpa causanga.
Paita jarcac rumica
jatun torrecunami canga.
Paimanca micunapish,
yacupish mana illangachu.
17Cambac ñahuihuanmi
Jatun Mandactaca
sumaimana tiyacucta ricungui.
Llactatapish mai carucaman
cashcatami ricungui.
18Llaquita yuyarishpami
cambac shungupica:
«¿Maipitac impuestota
japishcata yupacca?
¿Maipitac impuestota
pezashpa japicca?
¿Maipitac torrecunata yupacca?»
ningui.
19Ashtahuanpish canca
chai cari tucushca,
mana entendipacta rimac,
mana allita rimac gentecunataca
mana ashtahuan ricunguichu.
20Jatun fiestacunata ruhuac
ñucanchic Sión llactata ricuichic.
Jerusalenpica mana manchashpa
causacuctapish, mana pascaipac
carpa huasicunatapish ricunguimi.
Carpacunata charicuc
ishtacacunatapish
pi mana llucchingachu.
Carpacuna huatashca huascacunataca
shucllatapish mana pitingachu.
21Chaipimi Mandac Diosca
ñucanchicta sinchiyachinga.
Chaipica tendirishpa,
callpacuc yacu shinami canga.
Chaitaca uchilla barcocunapish,
jatun barcocunapish mana puringachu.
22Mandac Diosmi ñucanchic juez.
Mandac Diosllatacmi
mandashcacunata cucca.
Mandac Diosllatacmi
ñucanchic Jatun Mandacca.
Paillatacmi ñucanchicta quishpichin.
23Barcota purichic telata
huatashca huascacunapish
pitirircami.
Chai telata jahuaman sinchita
huatanataca mana pudinchu.
Shina cacpimi,
ima quichumushcatapish japishun.
Suchu runacunacamanmi
quichushpa chaupinacunga.
24Chaipi causaccunamanta maijan:
«Ungushcami cani» mana ningachu.
Sión llactapi causac gentecuna
mana allita ruhuashcataca
perdonangami.
Who We AreWhat We EelieveWhat We Do
2025 by iamachristian.org,Inc All rights reserved.
