DEUTERONOMIO 25 - Biblia Quichua Cañar 2010

1Maijan piñanacushpa, juezcunapacman ricpica, paicunaca taripashpami, cashcata ruhuac runataca cacharinga, cutin juchayuc runataca llaquichinga.

2Juchayuc runata macana cacpica, juezcunallatacmi pambapi chutachishpa, mashnahuan chicotena cacpica, paicunapac ñaupallapitac macachinga. Pai juchacata ruhuashca shinallatacmi chicotena can.

3Chuscu chunga cutincamanllami chicotena can. Chaimanta yallihuan chicotepica, cai runaca cancunapurapi pingaichishca cashcata yuyangami.

4Trillacushpaca ama huagrata shimita huatanguichicchu.

Huañuc huauquipac huarmihuan quipa huauquicazaranamanta

5Huauquindi causacushpa, shuc huauqui manarac huahuata charishpa huañucpica, chai saquiric huarmica mana ricsishca shuc carihuanca mana cazaranachu can. Ashtahuanpish chai huañuc cusapac huauquihuanmi cazarana can. Chashnami cuñadohuan cazarana can.

6Chai huarmi punta cari huahuata charicpica, huañuc huauquipac shutitami shutichina can. Shina shutichicpimi, israelcunapurapi paipac shutica mana chingaringa.

7Chai huauqui mana chai huarmihuan cazarasha nicpica, chai huarmica chai llacta yaicunaman rishpa, pushac yuyaccunaman huillashpaca: “Ñuca cuñadoca huañuc huauquipac shutita mana israelpurapi jatarichisha ninchu. Cuñadollatac cazarana cashcataca mana pactachisha ninchu” ninga.

8Chashna nicpica, chai llactata pushac yuyaccunaca chai runata cayashpami paihuan parlanga. Shina cayacpi, chai runa: “Mana cazarasha ninichu” nicpica,

9chai huarmica pushac yuyaccunapac ñaupapimi cuñadopac cuchuman cuchuyachishpa, ushutata llucchishpa, ñahuipi tucashpa: “Cashnami huasi familiapac shutita mana jatarichisha nictaca ruhuana” ninga.

10Shina ruhuacpimi, “Lluchu Chaqui Familia” nishpa shutichinga.

11Maijan runacuna macanacucucpi, maijanpac huarmi shamushpa, cusata misangaraicu macac runapac rurupi japirishpa llapicpica,

12huarmitaca mana llaquishpa, maquita pitinguichic.

13Randingapac llashac, cutin catungapac pangalla pezana rumita mochilapi apanguichicchu.

14Ama cancunapac huasipica randingapacca jatun medinata, cutin catungapacca uchilla medinata charinguichicchu.

15Pezanatapish cashcata pezacta, medinatapish cashcata medicta charinguichic. Shina ruhuashpami, Mandac Dios cushca llactaman yaicushpaca, unaita causanguichic.

16Mandac Diosca tucui chashna ruhuaccunatapish, cashcata mana ruhuaccunatapish millanayachinmi.

Amalec runata tucuchishcamanta

17Egipto llactamanta cancuna llucshicucpi, Amalec runacuna imata ruhuashcata yuyaringuichic.

18Paicunaca Diosta mana manchashpami, cancuna shaicushca cacpica, huashata shamushpa llaquichirca. Ashtahuancarin shaicushca quipayashcacunatami chashna llaquichirca.

19Chaimantami Mandac Dios cancunaman cushca llactapi causacucpica, cancunata piñac tucui muyundi llactacuna llaquichinamanta cuidanga. Chashna cacpimi, samaringuichic. Mandac Dios cushca llactapi causacushpaca, Amalecpac shutitaca tucui cai pachamanta chingachinguichic. Amatac chashna ruhuanataca cungaringuichicchu.