ISAÍAS 47 - Biblia Quichua Cañar 2010

Babilonia llactatallaquichinamanta

1Mandac Diosca:

«Carihuan manarac chayarishca

soltera shina Babilonia llactalla,

mandanamanta uricushpa,

ñuto allpapi tiyariyari.

Caldeocunapac ushilla,

cantaca mana cutin:

“Sumacmi, allimi cangui”

ningacunachu.

Can mandanamanta uricushpa,

allpapi tiyariyari.

2Cutana rumita japishpa,

harinata cutaiyari.

Umata tapashca pañotapish

anchuchiyari.

Churanata llucchishpa,

lluchu changa tucushpa,

jatun yacuta pasaiyari.

3Churanacunata anchuchishpa

lluchulla pingaihuan shayacuiyari.

Can llaquichishca shinallatacmi

cantapish llaquichisha.

Cantaca pipish

mana quishpichingachu» ninmi.

4Chashnami ñucanchicta

quishpichic nin.

Paipac shutica

tucuita Mandac Diosmi.

Israelcunapac

jucha illac Diosmi.

Paica:

5«Caldeocunapac ushilla,

cantaca mana ashtahuan

“Llactacunata mandac huarmi”

ningachu.

Chaimanta amsa tutaman yaicushpa,

upalla tiyarilla.

6Ñuca acllashcacunahuan

piñarishpami ñuca

acllashca llactataca

cambac maquipi churarcani.

Chashna churacpica,

mana llaquishpami yuyac runatapish

llashac yugota apachic shina

llaquichircangui.

7Canca: “Huiñaitami

mandac huarmi casha”

yuyarcanguimi.

Quipa punzha llaqui tucunataca

mana yuyarircanguichu.

8Sumac churanata churarishca,

ima llaqui japinata mana

yuyarishpa causac huarmilla,

cunanca caita alli uyai.

Canca cambac shungupica:

“Ñucallami mandac cani,

shuctac mandacca mana tiyanchu.

Viudapish, huahuacuna illacpish

mana tucushachu” yuyarcanguimi.

9Shina yuyacucpipish,

cai ishcai llaquicunami

cungailla japinga.

Yachac cacpipish,

brujeriata ruhuacucpipish,

chai llaquicunaca japingami.

Chai punzhallapitacmi viudapish,

cusa illacpish saquiringui.

10Canca: “Ñucataca pipish

mana ricucunchu” yuyashpami,

jatun mana allicunata

ruhuana yuyailla causarcangui.

Can yachacushcallatac,

cambac alli yuyaicunallatacmi

cantaca pandachirca.

Cambac shungupica:

“Ñucallami cani,

ñucamanta ashtahuan shucca

mana tiyanchu” yuyarcanguimi.

11Cantaca cungaillami

jatun llaqui japinga.

Chai llaqui maimanta

shamuctaca mana yachanguichu.

Shinallatac chai llaquimantaca

mana llucshi pudinguichu.

Can mana yachashca

horas shamushpami chai llaquica

yallita llaquichinga.

12Huahuamanta pachami

Brujeriata ruhuarcangui.

Chai shinallatac catilla.

Chashna catishpaca alli tucushpa,

sinchi tucunguipishchari.

13Canca shaicungacamanmi

cunashcacunata uyashcangui.

Cunanca, jahua cielota ricushpa

yachaccuna, lucerocunata

ricushpa yachaccuna,

cada quilla can ima tucunata

yachaccuna shayarishpa huillachun.

14Riqui, paicunaca ucsha shinami

canga.

Paicunataca ninami rupachinga.

Chaimantaca

mana quishpiri pudingachu.

Chai ninaca mana masharingapacchu.

Mana cunuringapacchu.

15Can huambramanta pachami

yachaccunahuan apanacushpa,

randishpa, catushpami

causarcangui.

Tucui paicunami

quiquin ñanta japishpa ringa.

Cantaca pipish mana

quishpichi pudingachu» ninmi.