1Chai quipami Samuelca Saultaca:
—Mandac Diosmi pai acllashca israelcunata jatun mandac cachun cantaca aceitehuan cahuichun ñucata cacharca. Chaimanta cunanca Mandac Dios ima nishcata alli uyangui.
2Tucui imatapish ruhuac Mandac Diosca: “Amalecitacuna israelcunata ima ruhuashcamantaca ñucami llaquichigrini. Paicunaca Egiptomanta huichai shamucucpimi, ñanpi jarcarcacuna.
3Shina cashcamanta amalecitacunata tucui huañuchigri. Paicuna ima charishcacunataca mana llaquishpa tucui chingachingui. Caricunata, huarmicunata, huahuacunata, chuchucuc huahuacunata, vacacunata, ovejacunata, camellocunata, burrocunatapish mana llaquishpa tucui huañuchingui” ninmi— nirca.
4Shina nicpimi, Saulca Telaim puebloman soldadocunata cayashpa yuparca. Chaquillahuan ric soldadocunaca ishcai patsac huarangami carca. Judá llactamanta soldadocunaca chunga huarangami carca.
5Chai quipami Saulca amalecitacunapac puebloman rishpa, chai pueblo lado pugru pambapi pacalla chapaccunata churarca.
6Chai quipaca chaipi causac ceneocunata Saulca:
—Cancuna paicunahuan pacta mana huañungapacca paicunapac chaupimanta llucshichic. Cancunaca israelcuna Egiptomanta shamucucpica llaquishpami, allita ruhuarcanguichic— nirca.
Shina nicpimi, ceneocunaca amalecitacunapac pueblomanta utca llucshi rirca.
7Saulca amalecitacunataca Havila llactamantaca Shur llactacamanmi huañuchirca. Shur llactaca Egiptomanta inti llucshic ladomanmi carca.
8Amalecitacunata jatun mandac Agagtaca causacta prezushpami, tucui gentecunataca espadahuan huañuchirca.
9Saulpish, paipac soldadocunapish Agagtaca mana huañuchircachu. Shinallatac alli ovejacunatapish, huagracunatapish, tucui huira animalcunatapish, cari ovejacunatapish, tucui allicunataca mana tucuchishpami imapish mana valic yangacunallata tucui tucuchirca.
10Chai quipami Mandac Diosca Samueltaca:
11—Saulta jatun mandac cachun churashcamantaca yallitami llaquirini. Paica ñucamanta anchurishpami ñuca mandashcataca mana pactachirca— nirca.
Shina nicpimi, Samuelca yallita llaquirishpa Mandac Diostaca tucui tuta mañarca.
12Chai quipami Samuelca manarac alli punzhayacpi, utca jatarishpa Saulhuan tupangapac rirca. Samuel chaiman chayacpica:
—Saulca ñami Carmel puebloman rirca. Riquichic, paita yuyarina pircata shayachishpami Gilgal puebloman muyushpa urai rirca— nirca.
13Samuel Saulpacman chayacpimi paica:
—¡Cantaca Mandac Dios bendiciachun! Mandac Dios mandashcataca ñami pactachini— nirca.
14Shina nicpimi Samuelca:
—Shinashpaca ¿Ima nishpatac ovejacuna, vacacuna huacashca ñuca ringripica uyaricunyari?— nishpa tapurca.
15Shina tapucpi Saulca:
—Amalecitacunapac ashtahuan alli ovejacunata, vacacunatami soldadocunaca mana huañuchishpa, canta Mandac Diosman cushpa huañuchingapac apamushca. Ashtahuanpish shuccunataca tucuimi tucuchircacuna— nirca.
16Shina nicpimi, Samuelca Saultaca:
—¡Ña chailla! Cunan tuta Mandac Dios ima nishcatami canman huillagrini— nirca.
Shina nicpimi Saulca:
—Huillailla— nirca.
17Shina nicpimi Samuelca:
—Can, cambac yuyaipi yanga runami cani yuyacpipish, ¿manachu cantaca Israel aillucunata mandac cachun churarca? Mandac Diosmi cantaca Israel llactata jatun mandac cachun aceitehuan cahuishpa acllarca.
18Chaimantami Mandac Diosca cantaca: “Juchata ruhuac amalecitacunata tucuchigri” nishpa mandarca.
19¿Ima nishpatac Mandac Dios mandashcata mana cazushpa, chai piñaccunapac ima tiyashcacunata apamushpa, Mandac Diospac ñaupapica mana allita ruhuarcangui?— nirca.
20Shina nicpimi, Saulca Samueltaca:
—Ashtahuanpish Mandac Dios mandashpa imata ruhuachun nishcata pactachircanimi. Chaimantami amalecitacunata jatun mandac Agagtaca prezushpa amalecitacunataca tucui tucuchircani.
21Ashtahuanpish soldadocunami ashtahuan alli ovejacunata, vacacunata canta Mandac Diosman cushpa Gilgal pueblopi rupachingapac apamurca— nirca.
22Shina nicpimi Samuelca:
—Mandac Diosca,
¿paiman cushpa,
tucui rupachicpi,
paiman animalcunata
cushpa huañuchicpichu
cushicunga?
Ashtahuanpish pai mandashcata
cazunami Diosman animalta
huañuchinatapish ashtahuan
yalli alli can.
Shinallatac ovejacunapac huirata
cunapac randica pai nishcata
uyanami ashtahuan alli can.
23Paita mana cazunaca
adivinashpa juchallishca
shinami can.
Sinchi shungu canapish
ruhuashca dioscunata adorashpa
causacuc shinami can.
Chashna ruhuashpa,
Mandac Diospac shimita
yangapi churashcamantaca
cantapish jatun mandac cashcamanta
anchuchishcami cangui— nirca.
24Shina nicpimi, Saulca Samueltaca:
—Shinashpaca juchatami ruhuashcani. Mandac Dios mandashcatapish, can ima nishcatapish mana cazushcanichu. Gentecunata manchashpami paicuna ima mañashcata ruhuachun saquircani. Shina cacpipish, ñuca juchata perdonai.
25Mandac Diosta alli nishpa mañangapac ñucahuan cutishun— nirca.
26Shina nicpimi, Samuelca Saultaca:
—Canhuanca mana cutishachu. Canca Mandac Diospac shimitami yangapi churarcangui. Chaimantami Mandac Diospish cantaca yangapi churashpa, Israel llactata jatun mandac cashcamanta anchuchigrin— nirca.
27Chashna nishpami Samuelca cutishpa ri callarirca. Ña ricucpimi, Saulca Samuelpac jahualla churanata puntamanta chutarca. Chashna chutacpimi, chai churana puntaca lliquirirca.
28Shina lliquiricpimi Samuelca:
—Mandac Diosca can chashna lliquishca shinami Israel llactata can mandanata quichushpa cambac ricsishca canta yalli ashtahuan alli runaman curca.
29Israelcunapac sumaimana Diosca imata ruhuasha nishpaca mana llullashpami ruhuan. Paica mana gentecuna shinachu quipata llaquirin— nirca.
30Shina nicpimi Saulca:
—Ñucaca juchatami ruhuashcani. Shina cacpipish, israelcunata pushac yuyaccunapac ñaupapish, israelcunapac ñaupapipish jatun mandac cashca shinallatac ñucata alli ningui. Canta Mandac Diosta alli nishpa mañangapac ñucahuan cutishun— nirca.
31Shina nicpimi, Samuelca Saulta catishpa cutirca. Saulca Mandac Diosta alli nircami.
32Chai quipami Samuelca:
«¡Amalecitacunata jatun mandac Agagta pushamuichic!» nirca.
Agagca: «Llaquinayaita ñuca huañunamantaca ña quishpirinimi» yuyashpami, Samuelpacman cushilla cuchuyarca.
33Ashtahuanpish Samuelca:
«¡Canca, cambac espadahuan huahuacunata huañuchishpami achca huarmicunata huahua illacta saquircangui! Chashnallatacmi cambac mamapish chai huarmicunapac chaupipica huahua illac saquiringa» nirca.
Shina nishpami Agagtaca pitinacushpa Gilgal pueblopi Mandac Diospac ñaupapi huañuchirca.
34Chai quipami Samuelca Ramá puebloman rirca. Shinallatac Saulpish Gabaa pueblopi cac paipac huasiman rirca.
35Samuelca pai huañungacamanmi Saultaca maipi mana ricurca. Mandac Dios Israel llactata jatun mandac cachun Saulta churashcamanta mai llaquiricpimi, Samuelpish Saulmantaca mai huacarca.
Who We AreWhat We EelieveWhat We Do
2025 by iamachristian.org,Inc All rights reserved.
