MARCOS 5 - Biblia Quichua Cañar 2010

Supai japishca runata alliyachishcamanta(Mt 8.28-34; Lc 8.26-39)

1Paicunaca cuchata pasashpaca, Gerasa llactamanmi chayarca.

2Canoamanta Jesús llucshincami, supai japishca runaca panteonmanta llucshishpa, Jesus-huan tupac shamurca.

3Paitaca pipish mana cadenacunahuan huatai pudircachu. Chaimantami panteonllapi causac carca.

4Tauca cutinmi huatana fierrohuanpish, cadenahuanpish huatac carca. Shina cacpipish chaicunata polvoshpa, pitishpami ric carca. Paitaca pipish mana huatai pudircachu.

5Tutapish, punzhapish urcucunapi, panteoncunapi sinchita caparishpa, paillatac rumihuan chugririshpami puric carca.

6Jesusta carumanta ricushcahuanmi, callpashpa paipac ñaupapi cungurirca.

7Cungurishpa, caparishpaca:

—Jahua pacha Diospac Churi Jesús ¿imatatac nic shamunguiyari? ¡Diosmantami mañani, ñucata ama llaquichichu!— nirca.

8Jesús: «¡Millai espíritu, cai runamanta llucshi!» nishcamantami chashna nirca.

9Jesús paita tapushpaca:

—¿Ima shutitac cangui?— nircami.

Chaimantami chai runaca:

—Achcacuna cashcamanta, huaranga huaranga shutimi cani— nirca.

10Supaicunaca ama caruman cachachunmi mañarca.

11Chai urcu cuchullapimi, achca cuchicuna micucurca.

12Chaimantami supaicunaca:

—Ñucanchictaca chai cuchicunapi yaicuchun cachaiyari— nishpa, mañarca.

13Chaimantami Jesusca chaiman richun saquirca. Supaicuna chai runamanta llucshishpaca, cuchicunapimi yaicugrirca. Shina yaicucpimi, chai cuchicunaca jahuamanta cuchaman singushpa, yacupi aguarishpa huañurca. Chai cuchicunaca ishcai huaranga shinami carca.

14Cuchicunata michiccunaca paicunapac pueblopi, llactacunapimi huillangapac callparca. Shina huillacpimi, ima tucushcata ricungapac tucui gentecuna shamurca.

15Jesuspacman chayashpaca, achca huaranga supaicuna llaquichishca runa alli tucushpa, churanatapish alli churarishca, alli yuyaipi tiyacuctami ricurca. Chaita ricushpami, yallita mancharirca.

16Chaita ricuccunaca supai japishca runa alli tucushcatapish, cuchicuna ima tucushcatapishmi paicunaman parlarca.

17Chaimantami Jesustaca chai llactamanta richun mañarca.

18Jesús canoapi tiyaricpimi, supaicunata llucchishca runaca paitapish pushashpa richun mañarca.

19Jesusca mana pushashpa risha nircachu, ashtahuanpish:

—Cambac huasiman rishpa, Dios llaquishpa, canta alliyachishcata cambac familiacunaman huillagri— nirca.

20Chai runa rishpaca, paita Jesús alliyachishcatami Decápolis pueblocunapi huillai callarirca. Shina huillacpica, tucui gentecunami cushicurca.

Jesús Jairopac ushita causachishcamantapish,shuc huarmita alliyachishcamantapish(Mt 9.18-26; Lc 8.40-56)

21Jesús cutinllatac canoapi yacuta pasashpa, cucha patapi cacpica, achca gentecunami paipacman tandanacurca.

22Chaimanmi, israelcuna tandanacuna huasita mandac Jairo shamurca. Chai mandac Jesusta ricushpa,

23paipac ñaupapi cungurishpaca:

—Ñuca ushimi huañugricun. Can rishpa, ñuca ushipac uma jahuapi maquita churacpica, mana huañungachu, alliyangami— nishpa mañarca.

24Chaimantami Jesusca chai runapac huasiman rirca. Shina ricucpica, achca gentecunami Jesus-huan pacta rircacuna.

25Chai riccunapurapica, chunga ishcai huatata yahuar cacharirishpa ungushca huarmimi ricurca.

26Chai huarmica tauca jambiccunapacman rishpami, llaquita apashpa puricurcalla. Jambiricushpallami pai charishcatapish tucui tucuchirca. Ima jambipish mana allichircachu, ashtahuanmi anchayashpa caticurca.

27Chaimantami Jesusmanta parlashcata uyashpa, gentecunapac chaupita rishpa, Jesuspac churanapi huashamanta tuparirca.

28Paipac shungupica: «Jesuspac churanapi tuparishpaca, jambirishallami» nishpami yuyacurca.

29Churanapi tuparicpica, chai ratomi yahuarca jarcarirca. Chaimantami huarmica ña alli tucushcata yacharca.

30Jesusca alliyachic poder paimanta llucshicpimi, huashaman tigrarishpaca:

—¿Maijantac ñuca churanapi tuparin?— nishpa tapurca.

31Chaimantami paipac yachacuccunaca:

—¿Manachu cai tucui gentecuna ñitirinacushpa, shamucuctaca ricungui? ¿Chashna cashca jahuachu “¿pitac ñucapi tuparin?” nishpa tapungui?— nirca.

32Jesusca pi tuparishcata yachangapacmi muyundita ricucurca.

33Chashna ricucucpimi, chai huarmica manchaihuan chucchushpa, Jesuspac ñaupapi cungurishpa, ima tucushcata tucuita huillarca.

34Chaimantami Jesusca:

—Huahua, can crishcamantami alliyashcangui. Cunanca, cushicushpa rilla. Ungüimantaca jambirishcanguimi— nirca.

35Jesús shina nicucllapitacmi, mandac Jairopac huasimanta maijan runacuna shamushpa Jairotaca:

—Yachachictaca, ¿imapactac yanga piñachicungui? Cambac ushica ñami huañun— nishpa huillarca.

36Shina nicpipish, Jesusca tandanacuna huasipi mandactaca:

—Ama mancharichu. Ashtahuanpish cri— nirca.

37Jesusca caishuc gentecunata chaillapi saquishpa, Pedrota, Jacobota, Jacobopac huauqui Juanllata pushashpami,

38chai mandacpac huasiman rirca. Chaipimi caparishpa, huacanacucucta ricurca.

39Jesús ucuman yaicushpaca:

—¿Ima nishpatac cancunaca caparishpa huacanacucunguichic? Huambraca mana huañushcachu, sueñucunllami— nirca.

40Jesús shina nicpica, burlashpa asircacunami. Chaimantami Jesusca chai ucumanta tucui gentecunata llucchishpa cachashpa, huambrapac taita mamata, quimsa yachacuccunata pushashpa, chai huambra siricuc ucuman yaicurca.

41Huambrapac maquita japishpaca:

—Talita, cumi— nirca. Chaica: “Huambra jatari, cantami nini” nisha ninmi.

42Shina nicpica, huambraca jatarishpa, puri callarircami. Chaimantami gentecunaca yallita mancharirca. Chai huambraca chunga ishcai huatayucmi carca.

43Jesusca huambrata causachishcata ama piman huillachunmi cutin cutin mandarca. Shinallatac huambraman carachunpish mandarcami.