1Ñucaca Dios munashcamanta Jesús acllashca apóstol Pablomi cani. Efeso pueblopi Cristo Jesusta crishpa Diospaclla caccunamanmi,
2ñucanchic Diospish, Apunchic Jesucristopish cancunataca mai cuyashpa, sumac causaita cushca cachun nini.
Jesucristollamanta Dios cusha nishcatachasquina cashcamanta3Cristohuan shuclla
tucushcamantami,
ñucanchicmanca
paipac Espirituta cushpa,
jahua pachapi tiyac tucuilaya
allicunata Diosca curca.
¡Chaimantami ñucanchic
Apunchic Jesucristopac
Diostaca alli nicunalla canchic!
4Diosca paipac cuyaimantami
manarac cai pachata ruhuashpa,
ñucanchictaca
jucha illac paipac ñaupapi
paipaclla cachun acllashca.
5Jesucristohuan shuc shinalla
tucushcamantami ñucanchictaca
paipac huahuata shina
ruhuashpa, ñaupaman
pai ima shina munacushcata
pactachirca.
6Chashnaca Dios mai cuyashpa,
paipac cuyashca Churimanta
allicunata cushcamantami,
¡paitaca alli
nicunalla canchic!
7Pai cuyashcamantami,
paipac Churipac yahuarhuan
ñucanchictaca huatashca
shinamanta cacharichishpa,
juchacunata perdonarca.
8Diosca tucuita yachac,
alli yuyaiyuc cashpami,
paipac cuyaitapish
ñucanchicman ricuchishpa,
9pai munashcamanta
ñaupaman cusha nishca
pacashcataca, Cristomanta
ñucanchic japichun ricuchirca.
10Diosca cai cusha nishcataca
pactana punzha
chayacpimi pactachirca.
Jahua pachapi,
cai pachapi tiyac imacunatapish
Cristo mandachunmi,
tandachishpa chashnaca ruhuarca.
11Cristohuan shuclla cashcamanta
pai cusha nishcata ñucanchic
japichunmi, Diosca
pai munashca shina ñaupaman
ña acllashca.
Tucui imatapish pai munashca
shinami ruhuan.
12Chashna ruhuashpaca,
ñucanchicrac punta
Apunchic Jesús yuyailla cashpa,
Diosta “allimari cangui”
nichunmi chashnaca ruhuarca.
13Shinallatac cancunaca
cashcata nic huillashcata,
quishpirinamanta
alli huillaita uyashpaca,
Cristota cricpimi,
pai cusha nishca
Espirituta cushpa,
paipacllata ruhuashca
sellota churarca.
14Cai shina ruhuashpami
ñucanchictaca huatashca shina
cashcamanta cacharichishpa,
paipacllata ruhuashpa,
pai cusha nishcata
chasquiccuna cashcata ricuchin.
¡Chashna ruhuashcamantaca
Diosta “allimari cangui”
nishunchic!
Pablo criccunamanta Diosta mañashcamanta15Chaimanta cancuna Apunchic Jesusta crishpa, Diospaclla cac tucui criccunahuan cuyanacuita charishcata uyashpami,
16Diosman ñuca mañashpaca, mana cungarishpa cancunamanta Diosta pagui nicunilla.
17Diospac Espíritu yachaita cushpa alli ricuchicpi cancuna Diosta alli ricsichunmi, ñucanchic Apunchic Jesucristopac sumaimana Diosta mañacuni.
18Cancuna pai cayacpi imata shuyana cashcata yachachun, shinallatac paipaclla caccunaman Dios cusha nishcaca sumac cashcata yachachunmi, alli yuyaita cuchun nishpa mañani.
19Ñucanchic paita criccuna cacpimi imatapish allita ruhuachun paipac poderta ñucanchicman cucun. Cai poderllahuantacmi, Diosca pipish mana ruhuaipaclla cashcata ruhuashpa,
20Cristota causachishpa, jahua pachapi paipac alli maquiman tiyachishpa ricuchirca.
21Chashna tiyachishpami poderta chariccunatapish, mandaccunatapish, tucuita atishpa mandaccunatapish, shinallatac cunan tucui ima tiyashcacunatapish, shamuc punzhapi ima tiyana cashcatapish tucuita Mandac cashcata ricuchirca.
22Chashna tucui ima tiyashcacunata mandachun Cristoman cushpaca tandanacushca criccunatapish uma shina mandachunmi, Cristollamantac Diosca curca.
23Tandanacushca criccunaca Cristopac cuerpomi can. Tandanacushca criccunaca tucui ima illashcatami Cristomanta chasquin. Shinallatac Cristollatacmi maipipish ima illashcacunataca cun.
Who We AreWhat We EelieveWhat We Do
2025 by iamachristian.org,Inc All rights reserved.
