JOSUÉ 2 - Biblia Quichua Cañar 2010

Jericó llactata ricuchun cachashcamanta

1Nunpac churi Josué ishcai runata Sitim pambamanta pacalla ricumuchun cachashpaca: «Chai llactatapish, Jericó pueblotapish imalaya cashcata allita ricumugrichic» nirca.

Paicuna rishpaca, huainayashpalla causac Rahab huarmipac huasiman chayashpami, chaipi pacarirca.

2Chaita Jericó llactata mandacman maijancuna huillashpaca:

—Israelcunapuramanta maijan runacunami cunan tuta cai llactata pacalla ricungapac shamushca— nishpa huillarca.

3Chashna huillacpimi, Jericó llactata jatun mandacca Rahab huarmipacman huillacta cachashpaca:

—Cambac huasiman shamushca runacunata llucchishpa cachai. Paicunaca tucui cai llactata ricungapacmi shamushca— nichun cacharca.

4Ashtahuanpish, chai runacunata chasquishpa, pacashpa charicuc huarmica:

—Ari, ñuca huasiman shamurcacunami. Paicuna maimanta cashcataca, mana yacharcanichu.

5Ña tuta cacpi, cai pueblo pungu huichcarigricpimi, chai runacunaca llucshishpa rircacuna. Paicuna maiman rishcatapish, mana yachanichu. Paicunata utca catishpa richic, japinguichicmi— nirca.

6Ashtahuanpish chai runacunataca huasi jahuaman huichicuchishpami, lino chaquichishca ucupi pacarca.

7Chai catic runacunaca Jordán yacuman rina ñanta catishpami, chai yacu ladocaman rircacuna. Chai caticcuna llucshincami chai punguca huichcarirca.

8Rahab huarmica chai pacashca runacuna manarac sueñucpimi, huasi jahuaman huichicushpa paicunataca:

9—Mandac Dios cai llactata cancunaman cushcataca yachanimi. Chaimantami paica cancunata manchachun, manchaita shungupi churashca. Tucui llactapi causaccunami cancunataca yallita manchaihuan chucchushpa, imatapish mana ruhuai pudincuna.

10Cancuna Egiptomanta llucshicucpi, cancuna pasachun, Puca Cuchata Mandac Dios chaquichishcata, shinallatac Jordán yacu chimba ladopi causac amorreocunata jatun mandac Sehontapish, Ogtapish imata ruhuashcataca yachanchicmi. Paicunata tucui tucuchishcata uyarcanchicmi.

11Chaita uyashpaca, ñucanchic shunguca yallita shaicushca shinami tucurca. Cancunata manchashpami, tucui gentecuna ima cushicuitapish, mana charincuna. Cancunata Mandac Diosca jahua pachapipish, cai pachapipish Diosmi.

12Cunanca, ñuca taitapac familiata mana llaquichingapac Mandac Diospac shutipi ari ni. Ñuca cancunata llaquishpa cuidashca shinallatac ñucanchictapish, llaquishpa cuidanguichic. Chaita pactachingapacca, shuc señalta ricuchichicyari.

13Ñuca taitatapish, ñuca mamatapish, ñuca turicunatapish, ñuca ñañacunatapish ama huañuchinguichicchu. Tucui ñucanchicta causacta saquinguinchicyari— nirca.

14Shina nicpimi, chai runacunaca:

—Cancuna ñucanchicmanta mana huillashpa, upalla cacpica, ñucanchicca causashunmi, shinallatac cancunapish causanguichicmi. Cai llactata ñucanchicman Mandac Dios cucpica, ñucanchicpish cancunata llaquishpa, mana huañuchishunchu. Chaitaca pactachishuntacmi— nirca.

15Shina nicpimi, chai huarmica huascahuan huatashpa, ventanata uricuchirca. Chai huasica pueblo muyundi jatun pirca jahuapimi carca.

16Chashna uricuchishpaca:

—Mashcashpa caticcuna cancunahuan ama tupachunca, urcuman richic. Cancunata caticcuna cutimungacaman quimsa punzhata chaipi miticugrichic. Chai quipaca, cancunapac ñanta catishpa ringuichicllami— nirca.

17Shina nicpimi, chai runacunaca:

—Ñucanchic canta mana llaquichingapac ñucanchic ari nishca pactachunca,

18cai llactaman ñucanchic yaicumucpi, ñucanchicta uricuchishca ventanallapitac cai puca huascata huarcuchingui. Shinallatac cambac taitatapish, mamatapish, turicunatapish, cambac taitapac tucui familiacunatapish, cambac huasipi tandachingui.

19Chai huasimanta maijanpish llucshishpa huañushpaca, paillatacmi juchayuc canga. Maijanpish cambac huasiman yaicushpa huañuchicpica, chai huañushcamantaca ñucanchicmi juchayuc cashun.

20Shinallatac ñucanchicmanta can huillacpipish, ñucanchic ari nishcaca yangallami saquiringa— nirca.

21Shina nicpimi, chai huarmica:

—Cancuna nishca shinallatacmi pactachisha— nirca.

Caya minchacaman nicpimi, chai runacunaca rircacunalla. Chai quipami, chai huarmica puca huascata ventanapi huarcuchirca.

22Paicuna chaimanta rishpaca, urcuman chayashpami, caticcuna cutingacaman quimsa punzhata miticushpa carcacuna. Paicunata caticcunaca tucui ñancunata mashcashpapish, mana tarircacunachu.

23Chai ishcai runacunaca urcumanta cutin urai shamushpami, Jordán yacuta pasarca. Nunpac churi Josuepacman chayashpaca, paicuna ima tucushcata imata ricushcatami parlarcacuna.

24Paicunaca Josuetaca:

—Mandac Diosca chai tucui llactatami ñucanchic maquipi churashca. Chai llactapi causaccunaca tucuimi manchashpa chucchucuncuna— nirca.