EZEQUIEL 40 - Biblia Quichua Cañar 2010

Diospac huasita muscuipi shina ricushcamanta

1Babiloniapi ishcai chunga pichca huatata prezu cacpi, huata callari quilla, chunga punzhapimi Mandac Diosca ñucata sinchiyachishpa, israelcunapac llactaman pusharca. Jerusalenta quichushcapish, ñami chunga chuscu huata carca.

2Mandac Diosmi ñucataca muscuipi shina, Israel llactaman pushashpa, chai llacta jatun urcu jahuapi churarca. Chai urcu ura ladopica jatun llacta shina huasicunami tiyarca.

3Chaiman ñucata pushacpimi, bronce shina jagan nicuc runata ricurcani. Chai runaca linomanta ruhuashca cordeltapish, medina caspitapish maquipi apashcami pungupi shayacurca.

4Chai runaca: «Huañunalla runa, allita ricui, shinallatac allita uyai. Ñuca imata ricuchishcataca allita yuyaringui. Cantaca ñuca ricuchishcata ricuchingapacmi caiman pushamurcani. Cai ricuchishcataca tucui israelcunaman huillangui» nirca.

5Chai huasi canzha muyundipica shuc pircatami ricurcani. Chai runa charicuc medina caspica quimsa metromi carca. Chai caspihuanmi pircata medirca. Chai pircaca altomanpish, anchomanpish quimsa metromi carca.

6Chai quipaca inti llucshina ladoman cac punguman rishpami, gradata huichicushpa, pungu umbralta medirca. Chai umbralca ishcai ladotami quimsa metro ancho carca.

7Largomanpish, anchomanpish quimsa metrota medic ucucunapish tiyarcami. Chai ucucunaca ishcai metro chaupi carupi ruhuashcami carca. Churanata huacaichina ucu ladopi cac ucuman yaicuna pungu umbralcunapish ishcai ladotami quimsa metro carca.

8Shinallatac churanata huacaichina ucutapish medircami. Chaica quimsa metromi carca.

9Chai quipaca corredorman yaicuna pungutapish medircami. Cutin umbralca chuscu metromi carca. Chai pungu pilarcunaca shuc metro anchomi carca.

10Inti llucshina ladoman cac pungu ladopi tiyac ucucunapish ishcai ladomanmi chashnallatatac medirca. Chaica quimsa ucucunatami charirca. Shinallatac ishcai ladomanta cac pilarcunapish shuclla medinahuan medishcami carca.

11Yaicuna pungu anchota medicpica, pichca metro anchomi carca. Cutin largomanca sucta metro chaupimi carca.

12Chai uchilla ucucuna ñaupapi cac pircacunata medicpica, shuc ladomanpish, caishuc ladomanpish chaupi metromi carca. Tucui chai ucucunami shuc ladomanpish, caishuc ladomanpish quimsa metro carca.

13Shuc ucumanta caishuc ucucaman medicpica, chunga ishcai metro chaupimi carca. Chashnami shuc lado pungumanta, caishuc lado pungucaman medirca.

14Shinallatac churanata huacaichina ucucunaca chunga metromi carca. Pungu pambapi cac pilarcunaca muyunditami carca.

15Shinallatac canzhamanta yaicuna pungu pambamanta, churanata huacaichina pungu pambacaman medicpica, ishcai chunga pichca metromi carca.

16Shinallatac uchilla ucucunapica ucumanca ancho, canzhamanca quichqui ventanacunami muyundita tiyarca. Churanata huacaichina ucu muyundipipish ventanacunami tiyarca. Chai ventenacunaca ucu ladomanmi muyundita carca. Shinallatac tucui pilarcunapimi palmerata dibujashca carca.

17Chai quipaca huasi pungu canzha pambaman apacpimi, uchilla ucucunata ricurcani. Chaicunaca muyundita rumihuan llambucllata ruhuashcami carca. Chai pungu pamba muyundipica quimsa chunga ucucunami tiyarca.

18Shinallatac chai huasicunaman yaicuna punguca rumihuan llambucllata ruhuashcami carca. Corredor chimbapurapica rumihuan ruhuashcaca ucucamanmi carca.

19Huasi ucuman yaicuna pungu ñaupamanta, canzhapi cac caishuc pungu ñaupacaman medicpica, pichca chunga metro anchomi carca. Inti llucshina ladoman medicpipish, jahua ladoman medicpipish, chashnallatacmi carca.

20Shinallatac canzha pambaman llucshina jahua ladoman cac zahuantapish largomanpish, anchomanpishmi medirca.

21Chai tucui pungu ladocunapica quimsa uchilla ucucunami tiyarca. Chaipi tiyac pungu arcopish, pilarpish jatun corredorman yaicuna ucupi tiyac pungucuna shinallatacmi carca. Largomanca ishcai chunga pichca metro, anchomanca chunga ishcai metro chaupimi carca.

22Chai pungu ladopi cac ventanacunapish, pungucunapish, dibujashca palmeracunapish inti llucshina ladoman cac pungucuna shinallatacmi carca. Chaiman yaicungapacca canchis gradacunatami huichicuna carca. Churanata huacaichina ucuca chai ñaupallapitacmi carca.

23Ucu pambapi cac punguca jahua ladopi cac pungu ñaupapimi carca. Shuc pungumanta caishuc pungucaman medicpica, pichca chunga metromi carca.

24Chai quipaca ura ladomanmi pusharca. Chai ura ladopica shuc zahuanmi tiyarca. Chai corredorpi cac pilarcunatapish, churanata huacaichina ucucunatapish, inti llucshina ladoman cac ucucunata shinallatacmi medirca.

25Chai zahuanpish, churanata huacaichina ucucunapish muyunditami ventanacunahuan carca. Chaipish caishuc pungu corredorpi tiyac ventanacuna shinallatacmi carca. Chaica, largomanca ishcai chunga pichca metro, anchomanca chunga ishcai metromi carca.

26Chai punguman chayangapacca canchis gradacunami tiyarca. Chai pungu ñaupapica churana huacaichina ucucunami tiyarca. Pungu pilarcunapica ishcai ladomantami palmera dibujashca carca.

27Ucu pambapi cac punguca ura lado zahuan ñaupapimi carca. Chai pungumanta ura ladoman tiyac zahuancaman medicpica, pichca chunga metromi carca.

28Chai quipaca ura lado zahuanta pushashpami, ñucataca ucu pungu pambaman pusharca. Chai pungupish caishuc pungucuna shinallatacmi medirca.

29Chai uchilla ucucunapish, pilarcunapish, churana huacaichina ucucunapish caishuccuna shinallatacmi carca. Pungupish, churanata huacaichina ucucunapish muyunditami ventanacunahuan carca. Chaicunata medicpica, altomanca ishcai chunga pichca metro, anchomanca chunga ishcai metro chaupimi carca.

30Chai muyundipi cac churanata huacaichina punguca largomanca chunga ishcai metro chaupi, anchomanca ishcai metro chaupimi carca.

31Chai churanata huacaichina ucucunaca canzha pungu pambamanmi carca. Shinallatac pungu pilarcunapipish palmera dibujashcami carca. Chaipica pusac patayuc gradapish tiyarcami.

32Quipaca inti llucshina ladoman cac ucu pungu pambamanmi pusharca. Chai punguta medicpica, caishuc pungucuna shinallatacmi carca.

33Uchilla ucucunapish, pilarcunapish, churanata huacaichina ucucunapish chashnallatacmi carca. Pungupish, churanata huacaichina ucucunapish muyunditami ventanacunahuan carca. Chaicunaca largomanca ishcai chunga pichca metro, anchomanca chunga ishcai metro chaupimi carca.

34Churanata huacaichina ucucunaca canzha pambacamanmi carca. Pilarcunaca ishcai ladomantami palmerata dibujashca carca. Chaipica pusac patayuc gradapish tiyarcami.

35Chai quipaca jahua ladoman cac zahuanmanmi pusharca. Chai zahuanpish caishuc zahuancuna shinallatacmi medirca.

36Chaipica uchilla ucucunapish, pilarcunapish, muyundita ventanayuc churanata huacaichina ucucunapishmi tiyarca. Chai pungu pambaca largomanca ishcai chunga pichca metro, anchomanca chunga ishcai metro chaupimi carca.

37Chai churanata huacaichina ucucunaca canzha pambacamanmi carca. Pilarcunaca ishcai ladomantami palmerata dibujashca carca. Chaipica pusac patayuc gradapish tiyarcami.

38Chai yaicunapi cac churanata huacaichina ucucuna ñaupapica shuc jatun ucumi tiyarca. Chai ucupimi Diosman cushpa rupachina animalpac aichata jahuana carca.

39Chai ucuman yaicuna pungupica cada ladomanmi ishcai mizacuna tiyarca. Chai jahuapimi Diosman cushpa tucui rupachina animaltapish, juchamantapish, pandarishcamantapish cushca animalta huañuchina carca.

40Jahua ladopi cac punguman yaicunapipish, shinallatac churanata huacaichina ucucuna ladopipish ishcai mizami tiyarca.

41Chai ucuman yaicuna pungupica cada ladomanmi chuscu mizacuna tiyarca. Tucuita tandachicpica, pusac mizacunami carca. Chai mizacunapimi Diosman cushca animalcunata huañuchina carca.

42Chuscu mizacunaca Diosman cushca animalta tucui rupachingapac, shinallatac Diosman cushca shuctac animalcunatapish huañuchingapacmi carca. Chai mizacunaca rumimanta labrashcami carca. Chai jahuapimi Diosman animalta cushpa huañuchina cuchillocunata churana carca. Chai mizacunaca altomanca pichca chunga centimetromi carca. Anchomanpish, largomanpish canchis chunga pichca centimetromi carca.

43Chai ucu pirca muyundipimi huarcuna ganchocuna tiyarca. Chai ganchocunaca largomanca ishcai chunga pichca centimetromi carca. Mizacuna jahuapica animalcunapac aichami tiyacurca.

44Caishuc ladomanta yaicushpa, jahua ladoman cac pambapi cac ishcai ucucunaca cantaccunapacmi carca. Shuc ucuca jahua ladopi cac zahuan ladomanmi carca. Chai ucuca ura ladomanmi ashtahuan alli ricurirca. Shuc ucuca ura ladopi cac zahuan ladomanmi carca. Chai ucuca jahua ladomanmi ashtahuan alli ricurirca.

45Chai runaca ñucataca: «Ura ladoman cac huasica Diospac huasita cuidac curacunapacmi.

46Jahua ladoman alli ricuric huasica Diospac altarpi servic curacunapacmi. Paicunaca Sadocpac churicunami. Levipac huahuacunapura cashcamantami Mandac Diosta servingacuna» nirca.

47Chai quipaca Diospac huasi ñaupapi cac canzha pambatami medirca. Chai pambaca pichca chunga metro cuadradomi carca. Altarca Diospac huasi ñaupapimi carca.

48Chai quipaca jahua ladopi cac corredormanmi pusharca. Chaipi tiyac pilarcunata medicpica, tucui pilarcunami ishcai metro, sucta chunga centímetro ancho carca. Cutin chaipi tiyac pungucunaca shuc ladomanpish, chaishuc ladomanpish shuc metro chaupimi carca.

49Chai corredorca chunga metro, chuscu chunga centímetro altomi carca. Cutin anchomanca pichca metro canchis chunga centimetromi carca. Chaiman huichicungapacca chunga patayuc gradami tiyarca. Chai pungupica tucui ladomanmi pilarcuna tiyarca.