2 SAMUEL 18 - Biblia Quichua Cañar 2010

Absalón huañushcamanta

1Davidca paipac runacunata tandachishpami, huaranga soldadocunata, patsac soldadocunata mandachun churarca.

2Chai quipaca chai tucui gentecunamantami quimsapi chaupishca shuc parteta Joab mandachun, caishuc partetaca Sarviapac cari huahua Joabpac huauqui Abisai mandachun, cutin caishuc partetaca geteocupuramanta Itai mandachun churarca. Chai quipami paihuan cac gentecunataca:

—Ñucallatacmi cancunahuanca macanacuiman risha— nirca.

3Shina nicpimi gentecunaca:

—Mana rinachu cangui. Ñucanchic miticushpa callpacpica, mana catingacunachu. Ñucanchicpuramanta chaupi huañucpipish, paicunamanca mana ima curingachu. Ashtahuanpish canca ñucanchicmanca chunga huaranga runacuna shina valishcami cangui. Chaimanta canca cai pueblollamantac ñucanchicpac ima illashcata ima shinapish cachashpa ayudai— nirca.

4Shina nicpimi jatun mandacca:

—Ñucaca cancunaman ima alli cashcata ruhuashallami— nirca.

Chashna gentecuna patsacpi, huarangapi chicanyachishca ricucpica, jatun mandacca puebloman yaicuna pungupimi shayacurca.

5Jatun mandacca Joabtapish, Abisaitapish, Itaitapish mandashpaca: «Ñucata cuyashcamantaca, Absalón mosota ama llaquichinguichicchu» nirca.

Jatun mandac Absalonta ama llaquichinguichicchu nishpa soldadocunata rimacuctaca tucui gentecunami uyarca.

6Chashnami paicunaca israelcunahuan macanacungapac pambaman llucshirca. Efrainpac yuracuna tiyac urcupimi macanacuica callarirca.

7Chaipimi israelcunaca Davidpac serviccuna aticpi huañurca. Chai punzhapica ishcai chunga huaranga runacunatami Absalonpac gentecunataca huañuchirca.

8Tucui llactacunatami macanacuica rirca. Chai macanacuipica sachacunapi urmashpami, espadahuan huañuchishcata yalli ashtahuan huañurca.

9Absalonca mulapi montashpa ricushpami, Davidta serviccunahuan tuparca. Chaipimi mulaca encina yura ramacuna huatarishca ucuta rirca. Chaita ricpimi, Absalonca sacha ramacunapi uma churarishpa huarcurishca saquirirca. Pai ricushca mulaca rircallami.

10Chaita shuc runa ricushpami Joabtaca:

—Absalón encina yurapi huarcurishcatami ricurcani— nirca.

11Shina huillacpi Joabca:

—Can chashna cacta ricushpaca, ¿ima nishpatac mana chaillapitac huañuchishpa, pambaman shitarcangui? Can huañuchishca cacpica, chunga ciclos cullquita, shuc chumbitami cuiman carcani— nirca.

12Shina nicpimi, chai runaca Joabtaca:

—Can shuc huaranga ciclos cullquita ñuca maquipi churacpipish, jatun mandacpac churitaca mana huañuchishachu. Chaica jatun mandac cantapish, Abisaitapish, Itaitapish rimashpaca: “Absalón mosotaca ama llaquichinguichicchu” nictami uyarcanchic.

13Jatun mandacca tucuita yachanmi. Paita huañuchishpaca ñucallatacmi llaqui tucuiman carcani. Huañuchishcamanta ñucata llaquichigricpica, canpish mana misanguimanchu— nirca.

14Shina nicpimi Joabca:

—Mana canhuan caipi yanga shayacusha ninichu— nirca.

Shina nishpami, quimsa flechata maquipi apashpa, Absalonpacman rishpa shungupi satirca. Absalonca encina ramacunapica causacurcaracmi.

15Quipataca Joabpac escudocunata apac chunga runacunami muyunacushpa tucui huañuchirca.

16Shina huañuchicpimi, Joabca israelcunata ama llaquichishpa catichun cornetapi tocarca. Chaita uyashpami, israelcunata llaquichinata saquirca.

17Chai quipaca, Absalonpac cuerpota japishpami, chai sachapi tiyac jutcupi shitashpa, chai jahuapica jatun rumi montonta ruhuarca. Chai quipaca, israelcunaca tucuimi quiquin carpa huasicunaman miticushpa callparca.

18Absalón causacushpaca: «Ñuca shutita yuyarichunca, churicunatapish mana charinichu» nishpami jatun mandacpac pambapi paita yuyarina shuc pilar shinata ruhuachishca carca. Chai pilar shinataca paipac shutitami churarca. Cunan punzhacamanmi «Absalonta yuyarina pilar» nincuna.

Absalón huañushcata David yachashcamanta

19Chai quipami Sadocpac churi Ahimaasca:

—Ñucanchicta piñaccunapac maquimanta Mandac Dios ima shina cacharichishcata jatun mandacman huillangapac callpagrinimi— nirca.

20Shina nicpimi Joabca:

—Cai ima tucushcataca mana cunanchu huillagrina cangui. Shuc punzhami huillagrina cangui. Jatun mandacpac churica huañushcami. Chaimanta mana cunanchu huillagrina cangui— nirca.

21Shina nishpami Joabca Etiopía runataca:

—Can jatun mandacpacman rishpa can ricushcata huillagri— nirca.

Shina nicpimi, etiope runaca Joabpac ñaupapi cumurirca. Chai quipami huillangapac callparca.

22Cutinllatacmi Sadocpac churi Ahimaasca Joabtaca:

—Imapish cachun, Etiopía etiope runata catishpa callpagrinimi— nirca.

Shina nicpimi Joabca:

—Ñuca huahualla, ¿imapactac catishpa callpasha ningui? Can huillashcamantaca imatapish mana japinguichu— nirca.

23Shina nicpimi paica:

—Imapish cachun, callpagrinimi— nirca.

Shina nicpimi Joabca:

—Callpailla— nirca.

Shina nicpimi, Ahimaasca jatun pamba ñanta rishpa, etiope runata pasashpa chayagrirca.

24Davidca pueblo yaicuna ishcai pungucuna chaupipimi tiyacurca. Torre jahuapi chapac runaca pungu jahuapi tiyac pataman huichicushpa, alzarishpami shuc runa pailla callpamucucta ricurca.

25Chai chapac runa ricushpami, jatun mandacta cayashpa huillarca. Shina huillacpimi jatun mandacca:

—Pailla shamushpaca, alli huillaihuanmi shamucunga— nirca.

Cutin callpashpa shamuc runa ashtahuan cuchuyamucpica,

26chai chapac runaca shuctac runa callpashpa shamucuctami ricurca. Chaimantami chai chapac runaca pungupi cuidac runata cayashpaca: «¡Shuctac runami, pailla callpamucun!» nirca.

Shina huillacpimi jatun mandacca:

—Chai runapish alli huillaihuanmi shamun— nirca.

27Cutinllatacmi chai chapac runaca:

—Puntapi callpashpa shamucca Sadocpac churi Ahimaasmi yuyachin. Pailayallami callpamun— nirca.

Shina nicpimi, jatun mandacca:

—Paica alli runami. Chaimanta alli huillaihuanmi shamucunga— nirca.

28Ahimaas jatun mandacta cayashpaca:

—¡Cushi causaita charingui!— nirca.

Chashna nishpami, jatun mandacpac ñaupapi pambacaman cumurishpaca:

—¡Canta Mandac Diosca alli nishca cachun! Paimi can jatun mandac-huan cariyaccunata ñucanchic maquipi churashca— nirca.

29Shina nicpimi, jatun mandacca:

—¿Absalón mosoca allillachu?— nishpa tapurca.

Shina nicpimi Ahimaasca:

—Canta servic Joab ñucata cachacucpica, yalli caparinacuitami uyarcani. Quipata ima tucushcataca mana ashtahuan yachanichu— nirca.

30Shina nicpimi, jatun mandacca:

—Caiman shamushpa shayari— nirca.

Shina nicpimi, chai runaca pasashpa chaipi shayarirca.

31Chai quipami etiope runa chayashpaca:

—Ñuca jatun mandaclla, alli huillaihuanmi shamuni. Cunanmi Mandac Diosca canta llaquichisha niccunapac maquimanta quishpichishca— nirca.

32Shina nicpimi, jatun mandacca etiope runataca:

—¿Absalón mosoca allillachu?— nishpa tapurca.

Shina nicpimi, etiope runaca:

—Tucui canta piñaccuna, shinallatac tucui can jatun mandacta mana allita ruhuaccunapish chai moso shina tucushpachari alli canman— nirca.

33Shina nicta jatun mandac uyashpaca yallita mancharishpami, chai puebloman yaicuna pungu jahua ucuman munai huacashpa rirca. Pai huacashpaca: «¡Ñuca huahua Absalonlla! ¡Ñuca huahua Absalonlla! ¡Can huañunapac randica ñuca huañushpachari alli caiman carcani! ¡Ñuca huahua Absalonlla, ñuca huahualla!» nishpami huacarca.