DEUTERONOMIO 21 - Biblia Quichua Cañar 2010

Maijan huañuchishcata mana yachashpa imata ruhuanamanta

1Mandac Dios cancunaman cushca llactapi shuc huañushca tiyacpi, cutin paita maijan huañuchishca mana yacharicpica,

2cancunata pushac yuyaccuna, juezcunami chai huañushca pushtumanta muyundi llactacunacaman medinga.

3Chai huañushcamanta cuchullapi cac llactapi causac pushac yuyaccunami shuc manarac trabajac, manarac yugota aparishca vaquillata apamunga.

4Chashnami jaicapi mana chaquic yacu tiyac, jaicapi mana yapushca, mana tarpushca huaicuman apashpa, vaquillapac cungata paquinga.

5Chai quipaca Levipac churi curacunami cuchuyanga. Paicunatami Mandac Diosca servichun, paipac shutipi bendiciachun acllarca. Ima piñanacui, ima mana alli tiyacpica, paicuna imata nicpimi, imatapish ruhuanga.

6Chai huañushcamanta cuchulla llactapi causac tucui yuyaccunami yacu huaicupi, huañushca vaquillapac jahuapi maquita jahuanga.

7Chashna jahuashpami: “Cai yahuartaca mana ñucanchic maquichu jichashca. Mana ricushcanchicchu.

8Mandac Dioslla, can acllashca israelcunata perdonaiyari. Cai mana faltayuc runapac yahuarmantaca ama israelcunata juchanchichu” ninga. Cashna ruhuacpimi, chai huañushca yahuarmantaca perdonashca canga.

9Chashnami cancunapac chaupimanta mana faltayuc yahuarta jichashcamantaca mana allita anchuchinguichic. Mandac Diospac ñaupapi cashcata ruhuanguichic.

Macanacushpa japishca huarmita imata ruhuanamanta

10Cancunata piñaccunahuan macanacungapac ricpi, Mandac Dios cancunapac maquipi paicunata churacpica, maijancunata prezunguichic.

11Chai prezushcapurapi maijan alaja huarmihuan cazarasha nishpaca,

12cancunapac huasiman apanguichiclla. Paica acchata pitishpa, shillutapish pitingami.

13Prezu churanata anchuchishpami cancunapac huasipi saquiringa. Paipac taita mamamanta quillacaman huacangami. Chai quipaca paihuan cazaranguimi. Paica cambac huarmimi tucunga. Cutin canca paipac cusami tucungui.

14Quipata paita mana munashpaca, paita richun saquinguilla. Paita prezushpa pingaichishcamanta ama cullquipi catunguichu, ama servic huarmita shina charinguichu.

Punta churi japinata mana quichunamanta

15Shuc runa ishcai huarmita charishpaca, shuctaca cuyangami, shuctaca piñangami. Chashna cuyashca huarmipish, piñashca huarmipish huahuata charingami. Piñashca huarmirac punta huahuata charicpica,

16herenciata cuna punzhapica piñashca huarmipi charishca punta churi japinataca mana cuyashca huarmipi charishca quipa churiman cunacchu.

17Piñashca huarmipi charishca churimanmi tucui churicuna japinamanta chaupi yallita punta churi cashcamanta cuna can. Tucui fuerzahuan charishca punta churi cashcamantami punta churi japinataca japina can.

Mana cazuc churita llaquichinamanta

18Shuc runa mana cazuc, sinchi shungu, taita mamatapish mana cazuc, paicuna mashnata macacpipish, mana uyacpica,

19taita mamami paicunapac llactata pushac yuyaccunaman huillangapac, llacta yaicunaman apanga.

20Chashna apashpami, chai llactata pushac yuyaccunamanca: “Cai ñucanchic churica mana cazuc, sinchi shungumi. Ñucanchic nishcatapish mana cazushpami, paipac munashcata ruhuashcata ruhuashpa, machashpa purin” nishpa huillanga.

21Chashna huillacpimi, chai llactapi tucui causaccuna rumihuan shitashpa huañuchinga. Chashnami cancunapac chaupimanta juchata anchuchinguichic. Chaita tucui israelcuna uyashpaca manchangami.

Sipirishpa huañushcata imata ruhuanamanta

22Shuc runa huañuchina juchata ruhuashcamanta sachapi sipishpa huañuchishca cacpica,

23mana tucui tuta sachapi huarcushca saquirinachu can. Chai huañushcataca Dios maldiciashca cashcamantami chai punzhallatac enterrana can. Chashna ruhuashpami Mandac Dios cancunaman cushca allpataca mana mapayachinguichic.