1Israelcunaca Sitimpimi causacurca. Chaipimi Moabpi causac huarmicunahuan huainayai callarirca
2Chai huarmicunami paicunapac yanga diosman animalcunata cushpa, rupachingapac israelcunata cayac carca. Chaipimi israelcunaca micushpa, yanga dioscunapac ñaupapi cumurirca.
3Chashnami israelcunaca Baal-peor diosta adorarca. Chaimantami Mandac Diosca israelcunahuanca nina japiric shina piñarirca.
4Mandac Diosca Moisestaca:
«Tucui israelcunata pushaccunata tandachishpa, inti achicyachicuc horas ñuca ñaupapi tucuita sipishpa huañuchi. Chashna huañuchicpimi, israelcunamanta nina ruparic shina piñachishcataca pasachisha» nirca.
5Shina nicpimi, Moisesca israelcunapac juezcunataca:
«Tucui cancunami Baal-peor diosta adorac runacunataca huañuchina canguichic» nirca.
6Israelpuramanta shuc runaca shuc madianita huarmita pushashpami Moisespish, israelcunapish ricucucpi, paipac huauquicunapacman chayarca. Chai horasca israelcunaca Dios-huan tupana huasi yaicunapimi huacacurca.
7Chaita ricushpami, Aarón curapac churi Eleazarpac churi Fineasca israelcunapac chaupimanta jatarishpa, shuc lanzata maquipi apashca,
8Israel runata carpa huasiman catirirca. Chaipimi Israel runatapish, chai huarmitapish ishcaitatac lanzahuan huicsapi pasachinacushpa huañuchirca. Chashna ruhuacpimi, israelpurapica huañuchic ungüica pararirca.
9Chai huañuipica ishcai chunga chuscu huaranga israelcunami huañurca.
10Chaipimi Mandac Diosca Moisestaca:
11«Aaronpac churi Eleazarpac churi Fineasca ñuca piñaric shinallatac piñarishpa, huañuchishpami israelcunapac chaupimantaca ñuca rabiata anchuchishca. Chaimantami ñucaca israelcunata mana tucuchini.
12Chaimanta paitaca: “Cushi causai tiyachunmi ñucaca paihuan ari ninacuita ruhuani.
13Huahua huahuacunapish huiñaita cura cachunmi ari ninacuita pactachisha. Mandac Dios piñaric shinallatac piñarishpami israelcunapac juchata anchuchingapac chai runata huañuchishca” ningui» nirca.
14Madianita huarmihuan huañuc Israel runaca Simeonpac huasi ucupurata pushac Salupac churi Zimrimi carca.
15Chai huañuc madianita huarmica madianitapac huasi ucupurata pushacpac ushi Cozbimi carca.
16Mandac Diosca Moisestaca:
17«Madianitacunata rabiachishpa macashpa huañuchi.
18Paicunaca allita umanata yachashpami cancunataca Baal-peor diosta adorachishpa umarca. Shinallatac madianitapac huasi ucupurata pushacpac ushi Cozbimi huarmipish pandachircami. Paica Baal-peor diosta adoracushcamanta huañuchicuc punzhapimi huañurca» nirca.
Who We AreWhat We EelieveWhat We Do
2025 by iamachristian.org,Inc All rights reserved.
