1Ñuca acllashcacunalla,
ñuca mandashcata uyaichic.
Ñuca rimashcacunataca
ringrita pascashpa uyaichic.
2Ñuca rimashpaca
yuyaita japina shimicunatami nigrini.
Ñaupa huatacunamanta pi mana yachashca
rimaicunatami huillagrini.
3Chaicunata ñucanchic
ñaupa taitacuna parlacpimi,
uyashpa allita entendircanchic.
4Paicunapac huahuacunapac ñaupapica
mana upalla saquirinachu canchic.
Mandac Diosta alabana cashcatapish,
pai sumaimanacunata ruhuashcatapish
quipa huahua huahuacunaman parlanami canchic.
5Diosmi Jacobopac huahuacunamanca
ima shina causanata yachachishpa,
israelcunamanca mandashcata curca.
Chaicunataca ñaupa taitacunamanmi
paicunapac huahuacunamanpish,
ñucanchicmanpish yachachichun mandarca.
6Chaicunataca quipa huahua huahuacunapish,
paicunapac ashtahuan quipa
huahua huahuacunapish yachashpa,
paicunapac huahuacunaman
huillachunmi mandarca.
7Chashna yachashpa Diospi
shunguta churachun.
Dios ruhuashcacunata ama cungarishpa,
pai mandashcacunata pactachichunmi mandarca.
8Ama ñaupa taitacuna shina
Diosta mana cazuc, sinchi shungu,
Diosta mana tucui shunguhuan,
tucui almahuan catic cachunmi
chashnaca yachachichun mandarca.
9Efrainpac huahua huahuacunaca
mai alli arcocunata charishpapish
macanacui punzhapica huashaimanmi
callparca.
10Dios-huan ari nishcata
mana pactachircacunachu.
Pai mandashcacunatapish
mana cazurcacunachu.
11Ashtahuanpish pai ruhuashcacunatapish,
sumaimanacunata ricushcatapish
cungarircacunami.
12Diosca Egiptopi tiyac
Zoán pambacunapimi sumaimanacunata
ñaupa taitacunaman ruhuashpa ricuchirca.
13Mama cucha chaupitami
paicunataca pasachirca.
Yacuca ishcai ladoman chaupirishpami
tandarishpa saquirirca.
14Punzhaca puyuhuan ñaupashpa,
tutaca ninahuan achicyachishpami
paicunataca pusharca.
15Shitashca pambapica
Rumi quingraita paquishpami
yacuta llucchishpa ubiachirca.
16Callpacuc yacuta llucchishpami
tucui pambacunata caita chaita
callpacucta ruhuarca.
17Chashna ruhuacpipish
paicunaca millaita ruhuashpami
Diosta piñachishpa catircacuna.
Shitashca pambapica jahua pachapi
causac Diostami piñachircacuna.
18Dios ima shina cacta ricungapacmi
paicuna munashca micunata mañarcacuna.
19Diosta piñachishpaca:
«¿Diosca cai shitashca pambapi
micunata carai pudingachu?
20Riqui, rumi quingraita paquishpami
yacuta llucchishpa,
pambacunapi caita chaita
callpacucta ruhuarca.
Chashna ruhuacpipish,
¿tandata carai pudingachu?
¿Pai acllashcacunaman
aichata carai pudingachu?» nircacuna.
21Shina nicta Mandac Dios uyashpami
Jacobopac huahua huahuacunahuanpish,
israelcunahuanpish nina japiric shina
piñarirca.
22Diosta mana crishcamanta,
pai quishpichina cashcapi
shunguta mana churashcamantami
chashnaca piñarirca.
23Chashna cashpapish jahua pachamanta
puyuta cacharcami.
Jahua pacha pungucunatapish pascarcami.
24Chashna ruhuashca jahuapish
paicuna micuchunca
maná shuti micunatami tamyachirca.
Chashnami jahua pachamanta
micunata cararca.
25Runacunaca angelcunapac
micunatami micurcacuna.
Micunataca atic atictami cacharca.
26Jahua pachamanta huairata
cuyuchishpami,
paipac tucuita ruhuac cashcahuan
ura lado huairata apamurca.
27Chashna ruhuashpami aichataca
ñuto allpata shina,
volac animalcunataca
mama cuchapi tiyac tiyuta shina
paicunapac jahuapi tamyachirca.
28Chai animalcunataca
paicuna causana carpa huasi chaupipipish,
muyundipipish urmachircami.
29Chai aichataca huicsa pactatacmi
micurcacuna.
Diosca paicuna munashcata curca.
30Chashna cashpapish
paicuna micushpa caticucpi,
micunapish shimipirac cacpimi,
31Dios yallita piñarishpa,
llaquichishpa sinchi runacunata huañuchirca.
Acllashca Israel runacunatami urmachirca.
32Tucui chaicunata ruhuacpipish,
ashtahuan juchata ruhuashpami
Dios sumaimanacunata ruhuashcatapish
mana crircacuna.
33Chaimantami Diosca paicunataca
shuc llanduta shina chingachirca.
Paicunapac causacuc huatacunataca
jatun llaquihuanmi tucuchirca.
34Shina huañuchicucpimi,
Diosta mashcarcacuna.
Shinami tucui munaihuan
mana shaicushpa mashcarcacuna.
35Chashnami Diosca paicunapac
jarcarina jatun rumi cashcata,
jahua pachapi causac Diosca
quishpichic cashcata yuyarircacuna.
36Shina cashpapish shimillahuan
alli nic tucushpami,
paicunapac calluhuanca llullarcacuna.
37Paicunapac shunguca
Dios-huanca mana allichu carca.
Paicuna ari nishcatapish
mana pactachircachu.
38Shina cacpipish llaquishpami
paicuna millaita ruhuashcatapish
cungarishpa mana tucuchirca.
Tauca cutinmi pai piñarishcatapish
ladoman churashpa,
ña mana llaquichishpa cungarirca.
39Diosca paicunataca
huañuclla aichayuc cashcata,
samai llucshishpa,
mana cutin cutimuc shina
cashcatami yuyarirca.
40¡Tauca cutinmi shitashca pambapi
piñachircacuna!
¡Imapish mana tiyac pambapimi
llaquichircacuna!
41Dios ima shina cashcata
ricungapacmi tauca cutin mañashpa,
israelcunapac jucha illac Diostaca
llaquichircacuna.
42Paipac maquihuan llaqui causaimanta
llucchishcataca mana yuyarircachu.
43Egiptopi tiyac Tanis pambapi
sumaimanacunata,
jatun mancharinacunata
ruhuashcataca mana yuyarircachu.
44Chaipica pipish ama ubiachun
jatun yacucunatapish,
callpacuc yacucunatapish
yahuartami ruhuarca.
45Llaquichic chuspicunatapish,
tucuita tucuchic sapocunatapish
cacharcami.
46Paicunapac granocunataca
burbojacunamanmi curca.
Tucui chagracunatapish
langostacunamanmi curca.
47Paicunapac uvas chagracunataca
runduhuanmi tucuchirca.
Higo chagracunatapish
casahuanmi tucuchirca.
48Paicunapac animalcunatapish,
huagracunatapish runduhuan,
rayohuanmi tucuchirca.
49Diosca Egipto llacta runacunahuan
nina japiric shina yallita piñarishpami,
tucui tucuchichun achca angelcunata cacharca.
50Pai yallita piñarishpaca
mana llaquishpami
paicunataca huañuchirca.
Ashtahuanpish paicunapac causaitaca
ungüita cachashpami tucuchirca.
51Egipto llactapi punta huacharishcacunataca
tucuimi huañuchirca.
Chashnami Campac churicunapac
carpa huasillapitac huañuchirca.
52Diosca pai acllashcacunataca
corralmanta ovejacunata llucchic shinami
Egiptomanta llucchirca.
Chaimantaca shitashca pambatami
manada ovejata shina pusharca.
53Imatapish mana manchachunmi
alli cuidashpa pusharca.
Paicunata piñaccunataca
mama cuchapimi ucuyachirca.
54Chai quipaca pai acllashcacunataca
paipaclla llactamanmi apamurca.
Paipac alli maquihuan atishpa
japishca urcumanmi pushamurca.
55Chaipi causac runacunataca
israelcuna ricucucpimi,
llucchishpa cacharca.
Chai quipaca huascahuan medishpami
allpacunata chaupishpa curca.
Chai runacuna causana huasicunapica
Israel aillucunatami causachun churarca.
56Ashtahuanpish jahua pachapi
causac Diosta pai ima shina cashcata
ricungapacmi piñachircacuna.
Ima shina causanata
pai yachachishcatapish
mana cazurcacunachu.
57Paicunapac ñaupa taitacuna
shinallatacmi mana cazurcacuna.
Mana allita shitac arco shinami
mana cazurcacuna.
58Paicunapac lomacunapi
altarcunata ruhuashpa,
yangalla dioscunahuanmi
yallita piñachircacuna.
59Chaita ricushpami Diosca israelcunahuan
yallita piñarishpa mana chasquisha nirca.
60Chaimantami Silo pueblo
gentecunapac chaupipi cac
paipac carpa huasitaca saquirca.
61Paica tucuita ruhuac cashcatapish,
sumaimana cashcatapish
yangalla tucushpami
piñaccunapac maquipi churarca.
62Pai acllashcacunahuanca
yallita piñarishpami
espadahuan huañuchichun saquirca.
63Mosocunataca ninahuanmi tucuchirca.
Chaimantami carihuan manarac chayarishca
solteracunaman cazarai cantoca mana tiyarca.
64Paicunapac curacunatapish
espadahuanmi huañuchirca.
Viuda huarmicunaca mana llaquirishcata
ricuchi pudircachu.
65Shina cacpipish, Mandac Diosca
sueñuimanta riccharic shinami jatarirca.
Shuc macanacuc runa mishashpa
caparic shinami caparirca.
66Paita piñaccunataca
huashaiman callpachishpami llaquichirca.
Chashnami huiñaita pingaichirca.
67Chashnami Diosca
Josepac carpa huasita saquishpa,
Efrainpac huahua huahuacunatapish
mana acllarca.
68Chaipac randica Judapac ailluta,
Sión urcuta acllashpami cuyarca.
69Chaipimi paipaclla huasitaca
jahua cielocaman jatunta shayachirca.
Cai pachata huiñaita charichunmi
alli sinchi allpapi shayachirca.
70Paita servic Davidtaca
ovejacunata michishpa purictami acllarca.
71Davidtaca cunanlla huacharishca
ovejacunata michina pambamantami
pai acllashca Jacobopac huahuacunata,
paipaclla israelcunata michichun apamurca.
72Davidca israelcunataca
cuyac shunguhuanmi sumacta michirca.
Alli yuyaihuan cuidashpami pusharca.
Who We AreWhat We EelieveWhat We Do
2025 by iamachristian.org,Inc All rights reserved.
