EZEQUIEL 16 - Biblia Quichua Cañar 2010

Jerusalenpi causaccuna mana cazushcamanta

1Mandac Dios ñucata rimashpaca:

2«Huañunalla runa, Jerusalén llactapi millaita ruhuashcata ricuchishpa:

3“Mandac Diosca Jerusalentaca: Can huacharishcapish, can causanapish Canaán llactami. Cambac taitaca amorreopuramantami carca. Cutin cambac mamaca heteopuramantami carca.

4Can huacharishca punzhapica mana puputa pitircachu, mana armachircachu, mana cachihuan cahuircachu, mana anacuchircachu.

5Chashna can llaquinayai cacpica, pipish llaquishpa, mana imata ruhuarcachu. Ashtahuanpish, can huacharishca punzhapica millashcami pambapi shitashca carcangui.

6Ñucaca cambac ladota pasacushpami, yahuarpi llaquinayaita mapayashca siricucta ricurcani. Chashna ricucpimi cantaca: ‘¡Causari!’ nircani. Ari, cantaca yahuarlla cacta ricushpami: ‘¡Causari!’ nircani.

7Chashnami pamba quihuata shina huiñachircani. Ña huiñashpa jatunyashpaca, sumac huarmimi tucurcangui. Cambac chuchucunapish, cambac acchapish huiñarcami. Ashtahuanpish canca churana illac lluchullami carcangui.

8Cutinllatac cambac ladota pasacushpami, cantaca ña cuyanalla huarmi cashcata ricurcani. Ñuca churanahuanmi cambac lluchulla cuerpota tapachircani. Chashna ruhuashpami, canhuanca ari ninacurcani. Canca ñucapacllami tucurcangui. Chaitaca Mandac Dios ñucami nini.

9Cantaca yacuhuan armachishpa, yahuarhuan mapayashcata maillashpami aceitehuan cahuircani.

10Sumac churanata churachishpami, chaquipipish tejón caramanta ruhuashca ushutata churachircani. Linomanta, sedamanta ruhuashca churanatami churachircani.

11Cantaca sumacta allichishpami, maquipica brazaletecunata, cungapica huallcata churachircani.

12Cambac singapica sumac achic nicuccunata, ringripica zarcillocunata, umapica sumac coronatami churachircani.

13Canca curihuan, cullquihuan allichishcami carcangui. Alli linomanta, sedamanta ruhuashca sumac churanatami churarircangui. Micunatapish ashtahuan alli trigo harinata, abeja mishquita, aceitetami micurcangui. Chashnami canca tucuimanta yalli alli tucushpa, jatun mandacpish tucurcangui.

14Cantaca ñucami sumacta allichircani, chaimantami shuctac llactacunapacpish alli nishca carcangui. Chaitaca Mandac Dios ñucami nini.

15Ashtahuanpish canca sumac cashcata yuyashpami, pipish chaita pasaccunahuan huainayarcangui. Chashnami paicunapaclla tucurcangui.

16Cambac sumac churanacunallahuantacmi lomacunapi altarta ruhuashpa huainayarcangui. ¡Chai shinaca jaicapi mana tucushcachu, manatac tucungachu!

17Ñuca cushca curihuan cullquihuanmi runaman riccha dioscunata ruhuashpa, paicunahuan huainayarcangui.

18Cambac sumac churanacunatami chaicunaman churachircangui. Ñuca aceitetapish, ñuca inciensotapish, paicunapac ñaupapimi churarcangui.

19Canman ñuca cushca tandatapish, alli trigo harinatapish, aceitetapish, abeja mishquitapish paicunaman mishquilla ashnachunmi, paicunapac ñaupapi rupachircangui. Chaitaca Mandac Dios ñucami nini.

20Chaipac jahuapica, ñucaman can cushca churicunatapish, ushicunatapish, chai dioscunaman cushpami, huañuchishpa tucuchircangui. ¿Huainayashca ashalla cacpichu,

21ñuca huahuacunatapish huañuchishpa, imaman riccha dioscunaman cushpa rupachircangui?

22Chashna millaita ruhuacushpa, huainayacushpaca huambrarac cashpa, churana illac cashcatapish, yahuarpi mapayashca siricushcatapish mana yuyarircanguichu.

23Mandac Dios ñuca: Can tucui millaita ruhuashca quipaca, ¡aij, imachari tucungui! ninimi.

24Lomacunapipish, plazacunapipish altarcunatami ruhuarcangui.

25Tucui ñancunapi altarcunata ruhuashpa, yallita mapayashpami cambac sumac cuerpotaca mapayachircangui. Chashnami tucui chaita pasaccunahuan yallita mapayashpa catircangui.

26Vecino Egipto runacunahuan yallita huainayashpami ñucata piñachircangui.

27Chaimantami cantaca maquita alzashpa llaquichishpa, cambac micunatapish quichurcani. Canta piñac filisteocunapac maquipimi churarcani. Paicunaca can millaita ruhuashpa causashcata ricushpaca pingarcami.

28Chashna huainayashpapish mana amirishpami, asiriocunahuanpish huainayarcangui. Paicunahuan huainayashpapish mana amirircanguichu.

29Caldea llactamanta catushpa, randishpa causaccunahuanpish ashtahuanmi huainayarcangui. Chashnapish manallatac amirircanguichu.

30Chaimantami Mandac Dios ñucaca: ¡Pandariclla shungu cashpami, cullquimanta huainayac shina, mana pingac huarmi shina, cai tucui millanacunata ruhuarcangui!

31Ñancunapi, plazacunapi altarcunata ruhuashpami huainayarcangui. Cullquimanta huainayac huarmica cullquimantami huainayan. Canca mana imata japircanguichu.

32¡Huainayac huarmi shinami cusapac randica, shuccunata chasquircangui!

33Huainayac huarmicunamanca pagancunami. Shina cacpipish, canracmi cambac cuyashcacunamanca pagarcangui. Tucui llactacunamanta shamushpa, canhuan huainayachunmi, chashna ruhuac carcangui.

34Canca shuctac huainayac huarmicunata atishpami, ashtahuan huainayarcangui. Canhuan huainayangapacca, pi cantaca mana mashcarcachu, ashtahuanpish canracmi mashcarcangui. Imata japinapac randica, canracmi pagarcangui. Pipish can shinaca mana ruhuashcachu.

35Huainayac huarmi, Mandac Dios rimashcata uyai.

36Mandac Diosca: Canca mana pingashpami lluchulla tucushpa huainayarcangui. Chashnami cambac cuyashcacunatapish, cambac millana ruhuashcalla dioscunatapish alli nircangui. Cambac huahuacunatapish chai dioscunaman cushpami rupachircangui.

37Chaimantami canhuan huainayaccunatapish, cambac cuyashcacunatapish, can mana ricunayachishcacunatapish cambac ñaupapi tandachigrini. Chashna tandachishpa, cambac muyundipi churacpimi, can lluchulla cashcataca ricunga.

38Cantaca huainayac huarmicunata, huañuchiccunata ima shina llaquichinata mandashca shinami taripashpa llaquichisha. Cantaca ñucapaclla causachun munashpami, yallita piñarishpa llaquichisha.

39Cantaca paicunapac maquipimi churasha. Paicunami yanga dioscunatapish, alli nina lomacunatapish, altarcunatapish urmachishpa, cambac churanacunatapish, cambac ima alajacunatapish quichushpa, lluchullata saquinga.

40Achca gentecunata cachacpimi, cantaca rumicunahuan shitashpa, espadahuan huañuchinga.

41Cambac huasicunatapish rupachingami. Achca huarmicunapac ñaupapimi cantaca llaquichinga. Shina llaquichicpimi, huainayanatapish, cuyashcacunaman paganatapish saquingui.

42Shina ruhuashpami, ñuca yallita piñarishcataca pasachisha. Chaimantami canca ñucapaclla causangui. Chashnami ñuca samarisha.

43Can huambrarac cashpa, ima shina causacushcata mana yuyarishpami, cai tucui millaicunata ruhuashpa, ñucata llaquichircangui. Chashna millaita ruhuashcamantami ñucapish cantaca yallita llaquichisha. Canca yallita millaicunata ruhuashpami, yallita ñucata piñachircangui.

44Cantaca yuyarina rimaicunahuan rimashpami: ‘Mamapacllatac huahuami’ ningacuna.

45Canca cusatapish, huahuacunatapish shitac huarmipac huahuami cangui. Canca cusatapish, huahuacunatapish shitac huarmipac ñañami cangui. Cambac mamaca heteopuramantami, cambac taitaca amorreopuramantami carca.

46Cambac punta ñañaca Samariami. Paica huahuacunandimi jahua ladopi causacun. Cambac quipa ñañaca Sodomami. Paipish huahuacunandimi ura ladopi causacun.

47Canca paicuna shinami, millaita ruhuarcangui. Chai ruhuashcacuna ashalla cacpimi, ashtahuan millaita ruhuashpa causarcangui.

48Mandac Dios ñuca shutipimi nini: Cambac ñaña Sodomapish, paipac huahuacunapish mana cambac huahuacuna shinachu ruhuashca.

49Cambac ñaña Sodomaca yalli micunata charishpami, jatun tucushpa, llaquipi causaccunatapish, imata mana chariccunatapish mana ayudashpa juchallirca.

50Chashnami ñuca ñaupapi jatun tucushpa, millaicunata ruhuashpa juchallirca. Chaimantami paicunataca anchuchircani.

51Canca yallitami juchallircangui. Canhuan ricucpica, Samaria llactaca ashallatami juchallirca. Cambac juchacunahuan ricucpica, Samaria llactapac juchacunaca mana ima ricurinchu.

52Can, cambac ñañacunata atishpa, yallita juchallishcamantaca pingaiyari. Chashna yallita juchallishpami, cambac ñañacunapac juchacunataca imapish mana cashca shinata ruhuashcangui. Chaimanta pingaiyari, llaquita apaiyari. Cambac ñañacunapac juchacunaca cambac juchacunahuan ricucpica, mana ima ricurinchu.

53Ñucami prezu apashcacunataca cutichimusha. Cambac huahuacunatapish, Sodomatapish, Samariatapish paicunapac huahuacunandimi cutichimusha.

54Can tucui millaicunata ruhuashcamanta pingaichishpa llaquichingapacmi cutichimusha. Chashnami canca paicunapac cushicuna tucungui.

55Cambac ñaña Sodomapish, Samariapish paipac huahuacunandi, canpish huahuacunandimi punta ima shina cashca shinallatac tucunguichic.

56Canca, cambac ñaña Sodomataca jatun tucushpa, burlashpami llaquichircangui.

57Can millaita ruhuashcata manarac ricuchicpimi, chashna carcangui. Cunanca Siria llactapi, Filistea llactapi causaccunamari canta burlancuna. Maipi cashpapish cantaca millancunami.

58Can millanacunata, pingaipaccunata ruhuashcamantaca llaquita apanami cangui. Chaitaca Mandac Dios ñucami nini.

59Mandac Dios ñucaca: Canhuan ari nishcata mana pactachircanguichu. Chaimantami llaquichisha.

60Shina cacpipish, can huambrarac cacpi, canhuan ari nishcataca yuyaricushami. Huiñaitami ari nishcata sinchiyachisha.

61Cambac punta ñañacunata, quipa ñañacunata cambac huahuacuna cachun ñuca cucpica, can ima shina causashcata, ima shina purishcata yuyarishpa pinganguimi. Mana canhuan ari nishcamantachu, paicunaca cambac huahuacuna shina canga.

62Ashtahuanpish ñucahuan ari nishcata sinchiyachishcamantami cambac huahua shina canga. Shina ruhuacpimi, ñucataca Mandac Dios cashcata yachangui.

63Can tucui millaita ruhuashcata perdonashca quipami, chaicunata yuyarishpa pingangui. Ña mana pingashpa rimaringuichu. Chaitaca Mandac Dios ñucami nini” ninmi ningui» nirca.