2 SAMUEL 13 - Biblia Quichua Cañar 2010

Amón Tamarta japirishcamanta

1Davidpac churi Absalonca shuc alaja ñahui Tamar panitami charirca. Chaitami Davidpac churi Amnonca yallita munarca.

2Paipac pani Tamarca pi carihuan manarac chayarishcachu carca. Shina cacpimi, Amnonca imatapish mana ruhuai pudishpa, ungungacaman chai yuyailla purirca.

3Amnonca Davidpac huauqui Simeapac churi Jonadabhuanmi apanacuccuna carca. Jonadabca yuyaisapami carca.

4Jonadab tapushpaca:

—Jatun mandacpac churilla, ¿ima nishpatac punzhanta chashna tulluyashpa ricunguiyari? ¿Ima nishpatac ñucamanca ima tucushcata mana parlangui?— nirca.

Shina nicpimi Amnonca:

—Ñucaca, ñuca huauqui Absalonpac pani Tamartami yallita munani— nirca.

5Shina nicpimi Jonadabca:

—Unguc tucushpa, cambac camapi siriri. Cambac taita ricuc shamucpica: “Ñucaman carangapac ñuca pani Tamar shamushpa, ñuca ñaupapi micunata ruhuashpa, paipac maquihuan carachunmi munani” ningui— nirca.

6Shinami Amnonca unguc tucushpa, camapi siririrca. Chashna siricucpimi, jatun mandac ricuc shamucpimi Amnonca:

—Ñuca paipac maquimanta micungapac, Tamar shamushpa, ñuca ñaupapi ishcai tortata ruhuachun cachashpa cui— nirca.

7Shina nicpimi, Davidca Tamarta paipac huasiman cachashpaca:

—Cambac turi Amnonpac huasiman rishpa, micunata ruhuashpa carai— nirca.

8Tamar rishpami, paipac turi ungushca siricuc huasiman chayashpa, harinata chapushpa tortata paipac ñaupapi ruhuashpa cusarca.

9Chai quipaca tortata sartendi apashpami, micuchun paiman curca. Shina cucpipish, mana micusha nishpami Amnonca: “Tucui caipi caccunata canzhaman llucshichun ni” nirca.

Shina nicpimi, tucui gentecuna llucshirca.

10Shina llucshicpimi, Amnonca paipac pani Tamartaca: «Cambac maquimanta ñuca micungapac cai camaman apamui» nirca.

Shina nicpimi, Tamarca pai cusashca tortataca paipac turi Amnón sueñuna ucuman aparca.

11Pai micuchun cungapac chayaricpi pai japirishpaca:

—Ñuca pani shamui ñucahuan sueñungui— nirca.

12Shina nicpica:

—¡Turilla, ama chashna ruhuaichu! ¡Ñucanchic israelcunapurapica mana chai millaita ruhuanachu canchic! ¡Ama millaita ruhuaichu!

13¿Chashna millaita ruhuashca jatun pingaihuanca maimantac rishayari? Cantapish israelcunapurapica, jatun millaita ruhuacmi ningacunami. Chaimanta canllatac jatun mandac-huan parlagri. Jatun mandacca canhuan cazarachun mana jarcangachu— nirca.

14Shina nicpipish, Amnonca mana uyashpami pai ashtahuan fuerzata charishcamantaca atishpa, uyai mana uyaita Tamarpi chayarirca.

15Chai quipaca, yallitami Tamartaca millashpa piñai callarirca. Pai utcaman cuyashcatapish, yallimi piñai callarirca. Shina piñashpami Tamartaca:

—¡Jatari, caimanta ri!— nirca.

16Shina nicpimi Tamarca:

—¡Ama chashna nichu! Ñucata llucchishpa cachashpaca, ñucahuan chayarishpa millaita ruhuashcata yallimi millaita ruhuagringui— nirca.

Shina nicpipish, mana uyasha nircachu.

17Ashtahuanpish servicta cayashpaca:

—¡Cai huarmita caimanta llucchi, punguta huichcai!— nirca.

18Tamarca tucuilaya color churanata churarishcami carca. Chashnami carihuan manarac chayarishca jatun mandacpac ushicunaca churaric carca. Amnonta servicca Tamarta ucumanta llucchishcahuanmi punguta huichcarca.

19Chaimantami Tamarca uchupata umapi churarishpa, tucuilaya color churanata lliquirishpa ishcai maquita uma jahuapi churashpa, caparishpa rirca.

20Shina ricucpimi, paipac turi Absalonca:

—¿Cambac turi Amnonchu chaita ruhuan? Shina cacpica, ñuca panilla, ama huacaichu. Upalla cai, paica turillatacmi. Chaimantaca ama yallimana llaquiricuichu— nirca.

Tamarca paipac turi Absalonpac huasipimi llaquilla saquirirca.

21Jatun mandac David chaita yachac chayashpaca, yallitami piñarirca.

22Cutin Absalonca ima allitapish, mana allitapish imata mana nircachu. Shina cashpapish paipac panita chaita ruhuashcamantaca piñacmi carca.

Absalón, Amnonta huañuchishcamanta

23Ishcai huata quipami Absalonta serviccunaca Efrainpac pueblo cuchulla Baal-hazor pambapi ovejacunata rutucurca. Chaipimi Absalonca tucui jatun mandacpac churicunata cayashpa jatun micuita ruhuarca.

24Chaipimi Absalonca jatun mandac Davidpacman rishpaca:

—Canta servic ñucami ovejacunata rutuchicuni. Chaimanta can jatun mandacpish, can churashca mandacpish, canta serviccunapish ñuca huasiman shamuichic— nirca.

25Shina nicpi, jatun mandacca Absalontaca:

—Mana, ñuca huahualla, tucui ñucanchic rishpa, canta yallita gashtachinaca mana allichu canga— nirca.

Mashnata jacu nicucpipish, jatun mandacca mana risha nishpami, paita bendiciarca.

26Chaimantami Absalonca:

—Quiquin mana risha nishpaca, ñuca huauqui Amnonllatapish cachaiyari— nirca.

Shina nicpimi, jatun mandacca:

—¿Imapactac Amnonta apasha ninguiyari?— nirca.

27Chashna Absalón cachachun nicucllapitacmi jatun mandacca Amnontapish, tucui churicunatapish paihuan richun saquirca.

28Ña utcamanmi Absalonca paita serviccunataca: «Amnón vinota ubiashpa yallita cushilla tiyacucpi, ñuca señata ruhuashpa: “¡Amnonta chugrichichic!” nicpica huañuchinguichiclla. Ñucami mandani. Chaimanta ama manchashpa sinchi sinchi caichic» nishcami carca.

29Absalonta serviccunaca pai nishca shinallatacmi Amnontaca ruhuarca. Shina ruhuacpimi, jatun mandacpac tucui churicuna jatarishpaca mulacunapi montashpa miticushpa rirca.

30Paicuna ñanpi cacpiracmi Davidca: «Jatun mandacpac tucui churicunatami Absalonca huañuchishca. Shucllapish mana saquirishcachu» nishcata uyarca.

31Chaita uyashpa David jatarishpaca, churanata lliquirishpami allpapi siririrca. Paita serviccunapish shinallatacmi churanata lliquirirca.

32Chaimantami Davidpac huauqui Simeapac churi Jonadabca:

—Jatun mandaclla, tucui cambac churicuna huañushca cashcataca ama yuyaichu. Amnonllami huañushca canga. Paitaca Absalonmi paipac pani Tamarpi chayarishca punzhamanta pacha huañuchisha nicurca.

33Chaimanta jatun mandaclla, maijan: “Jatun mandacpac tucui churicunami huañushca” nishcata ama crichu. Ashtahuanpish Amnonllami huañushca canga

34Absalonca miticushpami rishca canga. Torre jahuapi chapac runa huichai rishpaca, jahua urcu lado ñanta achca gentecuna shamucuctami ricurca.

35Shina cashpami Jonadabca jatun mandactaca:

—Riqui, canta servic ñuca huillashca shinallatacmi can jatun mandacpac churicunaca shamucun— nirca.

36Pai ña rimanata tucuchincami jatun mandacpac churicuna chayamushpaca, caparishpa huacai callarirca. Shinallatac jatun mandacpish, paita serviccunapish llaquillatami huacarca.

37Cutin Absalonca Gesur pueblota jatun mandac Amiudpac churi Talmaipacmanmi miticushpa rirca. Davidca tucui punzhacunami paipac churi Amnonta huañuchishcamantaca huacacurcalla.

38Absalonca chashna miticushpa rishpaca, quimsa huatatami chai Gesur pueblopi causarca.

39Jatun mandac Davidca Amnón huañushcamanta ña cungarishpami, Absalonta ricuna munaihuan carca.