1Jerusalén pueblota jatun mandac Adonisedecca Jericó pueblopi causaccunatapish, chai pueblota mandactapish imata ruhuashca shinallatac Hai pueblota chai pueblota jatun mandactapish tucui tucuchishcata, shinallatac gabaonitacunahuan alli causangapac ari nishcatapishmi yachac chayarca.
2Chaimantami yallita manchacurca. Gabaón puebloca Hai pueblota atishpami jatun carca. Chai pueblopi causaccunapish yalli sinchimi carca.
3Chaimantami Jerusalén pueblota jatun mandac Adonisedecca Hebrón pueblota jatun mandac Hohamta, Jarmut pueblota jatun mandac Pireamta, Laquis pueblota jatun mandac Jafiata, Eglón pueblota jatun mandac Debirtaca:
4«Gabaón pueblopi causaccunahuan macanacungapac ayudac shamuichic. Paicunaca Josuehuanpish, israelcunahuanpish alli causangapacmi ari nishca» nichun cacharca.
5Chaimantami Jerusalenta, Hebrón pueblota, Jarmut pueblota, Laquis pueblota, Eglón pueblota pichca jatun mandaccunaca tandanacushpa, paicunapac tucui macanacuc runacunahuan llucshirca. Gabaón pueblo chimba ladopimi carpacunata shayachishpa, chai pueblopi causaccunahuan macanacurca.
6Shina cacpimi, Gabaón pueblopi causaccunaca Josué Gilgalpi carpacunata shayachishpa causacucpi, paipacman huillaccunata cachashpaca: «Canta servic ñucanchictaca ama saquichuyari. Ñucanchicta ayudangapac utca huichaiman shamuiyari. Jahua urcucunapi causac tucui amorreocunata jatun mandaccunami tandanacushpa, ñucanchic-huan macanacungapac shamushca» nirca.
Amorreocunata macanacushpa atishcamanta7Chashna nicpimi, Josueca Gilgal pambamantaca alli sinchi macanacuc runacunahuan huichai rirca.
8Chaipimi Mandac Diosca Josuetaca:
—Ñucami paicunataca cambac maquipi churagrini. Chaimanta paicunataca ama manchaichu. Paicunapuramantaca pipish canhuan mana macanacui pudingachu— nirca.
9Josueca Gilgal pambamantaca tucui tuta huichai rishpami amorreocunapacman cungailla chayarca.
10Chaipimi Mandac Diosca amorreocunamanca israelcunata yallita manchana yuyaita curca. Chaimantami israelcunaca Gabaón pueblopica chugrichishpa, achcata huañuchirca. Bet-horón puebloman rina ñanta callpacpipish Azeca, Maqueda pueblocamanmi cati rishpa huañuchirca.
11Israelcunamanta miticushpa, Bet-horón pueblomanta urai rina ñanman callpacucpipish, Mandac Diosca jahua pachamanta rundu shina rumicunata Azeca pueblocamanmi paicunapac jahuapi urmachirca. Shina urmachicpimi, chai runacunaca tucui huañurca. Israelcuna espadahuan huañuchishcatapish yallimi chai rundu rumicuna urmashpa huañuchirca.
12Amorreocunata israelcunapac maquipi Mandac Dios churai punzhapi, Josué Mandac Diosta israelcunapac ñaupapi alli nishpaca:
«¡Intilla, Gabaón pueblopi
shayariyari!
¡Quillalla, Ajalón pugru pambapi
shayariyari!» nirca.
13Shina nicpimi intipish,
quillapish israelcuna
paicunata piñaccunata
tucuchingacaman shayarirca.
Chaitaca, ¿manachu Jaser libropi quillcashca? Intica shuc punzhatami mana tigrashpa, chaupi cielopi carca.
14Chai punzha shinaca mana tiyashcachu, shinallatac mana tiyangachu. Shuc runa mañashcata uyashpami Mandac Diosca israelcunamanta macanacurca.
15Chai quipaca Josueca israelcunandimi Gilgalpi cac carpa huasicunaman cutirca.
16Chai pichca jatun mandaccunaca miticushpa rishpami Maceda pueblo ladopi tiyac shuc jutcupi yaicurca.
17Chai pichca mandaccuna jutcupi miticushpa tiyacuctaca ñami Josueman huillarca.
18Shina huillacpimi Josueca: «Jatun rumicunata singuchishpa apashpa, chai jutcuta tapaichic. Shinallatac maijan runacunata cuidachun churaichic.
19Cancunata piñaccunata catinataca mana saquinachu canguichic. Chaipac randica paicunata cuidaccunata macashpa chugrichishpa huañuchinami canguichic. Paicunapac pueblocunamanca mana yaicuchun saquinachu canguichic. Chai pueblocunataca cancunata Mandac Diosca cancunapac maquipimi churarca» nirca.
20Josuehuan, israelcunahuan amorreocunata chugrichishpa achcata huañuchishpa tucui tucuchicpica, maijancunallami muyundita pircashca pueblopi miticushpa atirca.
21Chai quipaca tucui israelcunami ima mana tucushpa, Macedapi tiyac Josuepac carpa huasiman cutirca. Pipish israelcunata juchanchishpaca mana rimarcachu.
22Chaimantami Josueca: «Jutcu huichcashcata pascashpa, chai pichca jatun mandaccunata llucchichic» nirca.
23Josué mandashca shinami israelcunaca Jerusalén pueblota, Hebrón pueblota, Jarmut pueblota, Laquis pueblota, Eglón pueblota pichca jatun mandaccunata jutcumanta llucchirca.
24Chai mandaccunata Josuepacman pushamucpimi, Josueca tucui israelcunata cayashpa, paihuan cac macanacuc runacunata mandaccunataca: «Caiman cuchuyashpa, cai jatun mandaccunapac cungapi saruichic» nirca.
Shina nicpimi, paicuna cuchuyashpa, chai jatun mandaccunapac cungapi sarurca.
25Shina sarucpimi Josueca: «Cancunaca ama manchaichicchu, ama chucchuichicchu. Chashnami Mandac Diosca tucui cancunata piñaccunata ruhuanga. Ashtahuanpish sinchi caichic, ama manchaichicchu» nirca.
26Chai quipaca Josueca chai mandaccunata chugrichishpa huañuchishpami pichca yuracunapi huarcuchun mandarca. Chai yuracunapica amsacamanmi huarcushca carca.
27Ña inti tigracucpimi, Josueca chai huañushcacunataca yuramanta uricuchishpa paicuna miticushca jutcullapitac shitachun mandarca. Chaipi shitashpami chai jutcu pungutaca jatun rumicunahuan taparca. Chai rumicunaca cunan punzhacamanmi tiyacun.
28Josueca chai punzhallatami Maceda pueblota japishpa, chaipi causaccunatapish, chai pueblota jatun mandactapish espadahuan chugrichishpa huañuchirca. Chai pueblopi causaccunata shucllatapish mana saquishpami tucui huañuchirca. Chashna huañuchishpami Maceda pueblota jatun mandactaca Jericó pueblota jatun mandacta shinallatacmi huañuchirca.
29Josuepish, israelcunapish Maceda pueblomantaca Libna puebloman rishpami, chai pueblopi causaccunahuan macanacurca.
30Mandac Dios chai pueblopi causaccunatapish, chai pueblota jatun mandactapish israelcunapac maquipi churacpimi, paicunaca chai pueblopi causaccunataca shucllatapish mana saquishpa, tucuita espadahuan chugrichishpa huañuchirca. Chai Libna pueblota jatun mandactaca Jericó pueblota mandacta shinallatacmi huañuchirca.
31Josuepish, tucui israelcunapish Libna pueblomantaca Laquis pueblomanmi rirca. Chai pueblo ladopi carpacunata shayachishpami chaipi causaccunahuan macanacurca.
32Mandac Dios Laquis pueblotapish israelcunapac maquipi churacpimi, cayandi punzha chai pueblota japirca. Shina japishpaca, chaipi causaccunataca Libna pueblopi causaccunata shinallatacmi espadahuan chugrichishpa, shucllatapish mana saquishpa tucui huañuchirca.
33Chaimantami Gezer pueblota jatun mandac Horamca Laquis pueblopi causaccunata ayudangapac rirca. Ashtahuanpish Josueca paitapish, paipac macanacuc runacunatapish tucuimi huañuchirca.
34Josuepish, tucui israelcunapish Laquis pueblomantaca Eglón pueblomanmi rirca. Chai pueblo ladopi carpacunata shayachishpami chaipi causaccunahuan macanacurca.
35Chai punzhallatami chai pueblota japishpa, chaipi causaccunataca espadahuan chugrichishpa huañuchirca. Chai punzhapica Laquis pueblopi causaccunata shinallatacmi chai pueblopi causaccunatapish shucllatapish mana saquishpa, tucui huañuchirca.
36Chai quipaca Josuepish, tucui israelcunapish Eglón pueblomantaca Hebrón puebloman huichai rishpami chaipi causaccunahuan macanacurca.
37Hebrón pueblota japishpaca, chai pueblota jatun mandactapish, chai pueblo cuchulla llactacunapi causaccunatapish tucuimi huañuchirca. Paicunataca espadahuan chugrichishpami shucllatapish mana saquishpa, tucui huañuchirca. Chaipi causaccunapish, Eglón pueblopi causaccunapish, shucllapish mana causac saquirircachu.
38Chai quipaca Josuepish, tucui israelcunapish cutishpami Debir puebloman chayashpa, chaipi causaccunahuan macanacurca.
39Chai pueblota japishpami, chai pueblopi cac jatun mandactapish, chai pueblo cuchulla llactacunapi causaccunatapish espadahuan chugrichishpa huañuchirca. Chaipipish tucuita huañuchishpami shucllatapish mana causacta saquirca. Hebrón pueblopi, Libna pueblopi causaccunatapish, chai pueblota jatun mandactapish ruhuashca shinallatacmi Debir pueblopi causaccunatapish, chai pueblota jatun mandactapish tucui huañuchirca.
40Chashnami Josueca tucui pueblocunata japirca. Urcucunapi tiyac tucui pueblocunata, Neguev shitashca pambacunata, quingraicunata, chaipi tiyac tucui jatun mandaccunatapish huañuchishpami, shucllatapish mana causacta saquirca. Chashnami israelcunata Mandac Dios mandashca shinallatac shucllatapish mana causacta saquishpa, tucui huañuchirca.
41Josueca Cades-barnea pueblomantaca Gaza pueblocamanmi tucui atirca. Chashnami Gosén llactamantaca Gabaón pueblocaman tucui huañuchirca.
42Mandac Dios israelcunamanta macanacucpimi, tucui jatun mandaccunatapish atishpa, paicunapac jatun llactacunatapish japirca.
43Chai quipami Josueca tucui israelcunahuan Gilgal pueblopi tiyac carpa huasicunaman cutirca.
Who We AreWhat We EelieveWhat We Do
2025 by iamachristian.org,Inc All rights reserved.
