1Chaimantami Atenas pueblopi saquirinata yuyarishpa,
2ñucanchic huauqui Timoteota cancunapacman cacharcanchic. Paica Diosta servic, ñucanchic-huan Jesucristomanta alli huillaita huillacmi. Paimi cancunata cunashpa crina yuyaita cunga.
3Cancuna llaquihuan cashcamanta catinata ama saquichunmi, cushichichun cacharcanchic. Chai llaquicunata apana cashcataca cancunallatac yachanguichicmi.
4Ñucanchic cancunahuan cashpaca, chai llaquicunata apana cashcataca huillarcanchicmi. Chai huillashca shinami pactashca. Chaitaca ña yachanguichicmi.
5Chaimantami cancuna crinata saquicungami yuyashpa cancunata ricuchun Timoteota cacharcani. Diablo cancunata pandachicpi, ñucanchic cancunaman huillashca yanga tucunatami mancharcani.
6Shina cacpipish Timoteo Tesalonicamanta cutimushpami, cancuna allita crishpa, cuyanacushpa causacushcata huillashpa cushichirca. Ima shinami ñucanchic cancunata ricuna yuyailla canchic, chai shinallatac cancunapish ñucanchicta ricuna yuyailla cashcatami huillarca.
7Cuyashca criccuna chai shina huillacpimi, cai tucui llaquicunahuan cashpapish, cancuna alli crishpa caticushcata yachashpaca yallita cushicunchic.
8Chai shina Apunchic Jesusta alli caticushcata yachashpami, cutin causaric shina cushicunchic.
9Cancuna chashna caticushcamanta yallita cushicushpaca, ¿ima shinatac Diostaca pagui nishunyari?
10Ñucanchicca cancunapac ñahuita ricushpa, crina yuyaita cushpa, ashtahuan sinchiyachinatami munanchic. Chaimantami tutapish punzhapish Diosta mañacunchiclla.
11Ñucanchic Diospish, Apunchic Jesucristopish cancunata ricungapac pushachunmi munanchic.
12Ñucanchic cancunata cuyac shinallatac, cancunapish caishuc-huan chaishuc-huan, shinallatac shuccunahuanpish cuyanacuna yuyaita Apunchic Jesús cuchunmi munanchic.
13Shinallatac Dios cancunata sinchi cricta ruhuachunmi munanchic. Chashna cashpami, Apunchic Jesús paipaclla caccunahuan shamucpica, ñucanchic Diospac ñaupapica pi mana juchanchipac jucha illac cashun.
Who We AreWhat We EelieveWhat We Do
2025 by iamachristian.org,Inc All rights reserved.
