ECLESIASTÉS 8 - Biblia Quichua Cañar 2010

1¿Pitac yuyaisapa shina runaca tiyan?

¿Pitac tucuita entendishpa huillacca tiyan?

Alli yachaica runapac ñahuitami achicyachin.

Piñashca cactapish alliyachinmi.

2Dios-huan ari nishcamanta

jatun mandac mandashcata cazungui

nishpami alli yuyaita cuni.

3Jatun mandacpac ñaupamantaca

ama utca rinata yuyanguichu.

Ima mana allitaca

ama chaillatatac ruhuashpa catinguichu.

Paica tucui ima munashcatami ruhuanga.

4Jatun mandac mandashcaca poderta charinmi.

¿Pitac: «Imatatac ruhuacungui»

nishpa tapungayari?

5Mandashcata cazuc runaca mana ima tucungachu.

Yuyaisapa runapac shunguca

Dios ima horas, ima shina ruhuanata yachanmi.

6Tucui ima munashcata ruhuangapacmi

shuc punzhapish, ima shina ruhuanapish tiyan.

Shina cacpipish

runa mana allita ruhuashcaca

paillatatacmi llaquichin.

7Paica ima tucunataca mana yachanchu.

¿Pitac pai ima tucunataca huillangayari?

8Runaman causaita cuc samai

ama llucshichunca pi mana jarcai pudinchu.

Shinallatac huañuna punzhata jarcacpish

mana tiyanchu.

Huañuimantaca ima macanacunahuanpish

mana quishpiri pudinchu.

Diosta mana manchac runatapish,

pai ruhuashca juchaca mana quishpichingachu.

9Inti achicyachicuc cai pachapica tucui caicunata ruhuashcacunatami tucui shunguhuan ricurcani. Maijan cutinca runaca paipac llaquipacllatacmi caishuc runata llaquichinga.

Runapac causaica yangalla cashcamanta

10Shinallatac Diospaclla huasipi llucshishpa, yaicushpa puric mana allita ruhuaccuna huañucpi, alli nishpa enterrarictami ricurcani. Paicuna mana allita ruhuashpa causacushca pueblopimi chashna ruhuacurca. Chaipish yangallami.

11Huañuclla runacunaca paicuna mana allita ruhuashcamanta mana utca llaquichicpica, ashtahuan mana allita ruhuanatami yuyarincuna.

12Juchayuc runa patsac cutin millaita ruhuacpipish unaita causacpipish, ñucaca Diosta manchashpa, paipac ñaupapi allita causac runa alli llucshic cashcatami yachani.

13Ashtahuanpish Diosta mana manchac runapacca imapish mana alli llucshinata, paipac causana punzhacuna ashallayashpa, llandu shina tucuna cashcatami yachani. Diospac ñaupapi mana manchashcamantami chashnaca tucunga.

14Cai pachapica shuctac yanga ruhuaicunapish tiyanmi. Cashcata ruhuaccunaca Diosta mana manchaccuna shinallatacmi llaqui tucuncuna. Diosta mana manchaccunaca cashcata ruhuaccuna shinami alli causancuna. Chaicunapish yangami ninimi.

15Chaimantami ñucaca, imamanta cushicuna cashcata alli nini. Inti achicyachicuc cai pachapica runaca micushpa, ubiashpa, cushicunami can. Caicunamanta yalli cushicuica mana tiyanchu. Cai pachapi Dios causaita cushcacamanca, pai trabajashcamantami chaitaca ruhuai pudin.

16Ñucaca tucui shunguhuanmi allita yachacushpa, cai pachapi causaccuna imata ruhuacucta ricushpa yachacurcani. Maijancunaca tutapish, punzhapish mana samarincunachu.

17Dios tucuita ruhuashcatami ricurcani. Inti achicyachicuc cai pachapi imata ruhuashcataca runaca mana yachai pudinchu. Runaca cai ruhuashcata alli yachacusha nicushpapish manatac entendi pudingachu. Yuyaisapa runa alli yachanimi nicushpapish, paipac yachashcahuanca mana entendi pudingachu.