1 REYES 17 - Biblia Quichua Cañar 2010

Mana tamyangachu nishpa Elías huillashcamanta

1Eliasca Galaad llacta tisbitapuramantami carca. Paica mandac Acabtaca: «¡Israelcunata Mandac Diospac shutipimi nini: Ñucaca paitami servini! ¡Cai huatacunaca mana tamyangachu paramollapish mana tiyangachu! ¡Ashtahuanpish ñuca mandacllapimi tamyanga!» nirca.

2Chai quipami Mandac Diosca Eliastaca:

3«Caimanta anchurishpa, inti llucshic ladoman rishpa Jordán chimba ladopi cac Querit yacu huaicupi miticugri.

4Chaipica, chai huaicumanta yacuta ubiangui. Shinallatac cuervo animalcunatami chaipi micunata canman carachun mandarcani» nirca.

5Eliasca Mandac Dios mandashca shinallatacmi Jordán yacu chimba ladopi cac Querit yacu huaicupi causagrirca.

6Chai cuervo animalcunaca tutamantapish, tandata, aichata chishipish tandata aichatami apamuccuna carca. Yacutapish chai jatun yacumantami ubiac carca.

7Ña tauca punzhacuna quipami, chai llactapi mana tamyacpi, chai huaicu yacuca chaquirca.

Sarepta pueblopi causac viuda huarmimanta

8Shina cacpimi Mandac Dios Eliasta rimashpaca:

9«Jatari, Sidón llactapi cac Sarepta pueblopi causagri. Riqui, chaipi causac shuc viuda huarmitami canman micunata carachun mandarcani» nirca.

10Shina nicpimi, paica jatarishpa, Sarepta puebloman rirca. Chai pueblo punguman chayashpaca, shuc viuda huarmi yantata murucuctami ricurca. Elías chai viuda huarmita cayashpaca:

—Ñuca ubiangapac asha yacuta vasopi convidai— nirca.

11Chai huarmi ña yacuta apamungapac ricpimi, Elías cutin cayashpaca:

—Ñuca micungapac asha tandata apamushpa convidai— nirca.

12Chashna nicpimi, chai huarmica:

—¡Canta Mandac Diospac shutipimi nini: Cusashca tandataca mana charinichu! ¡Maqui junda harinallatacmi puñupi charini! Aceitetapish ashallatami pomapi charini. Cunanca, ishcailla yantatami ñuca cari huahuahuan tandata ruhuashpa micungapac murucuni. Caita micushpaca huañushunllami— nirca.

13Shina nicpimi Eliasca:

—Ama manchaichu. Can ima shina nishca shinallatac ruhuagrilla. Shina cacpipish can charishca harinamantaca ñucamanrac shuc uchilla tortata cusashpa apamugri. Quipaca canman, cambac huahuamanpish ruhuanguillami.

14Israelcunata Mandac Diosca: “Cai llactapi ñuca tamyachingacamanca chai puñupi tiyac harinapish, pomapi tiyac aceitepish mana tucuringachu” ninmi— nirca.

15Shina nicpimi, chai viuda huarmica Elías nishca shinallatac ruhuangapac rirca. Quipaca Eliaspish, chai huarmipish, paipac familiapish tauca punzhacunapacmi micunata charircacuna.

16Eliasman Mandac Dios huillashca shinallatacmi puñupi tiyac harinapish, pomapi tiyac aceitepish mana tucurirca.

17Ña unaita causacucpimi, chai huasiyuc huarmipac cari huahuaca ungushpa anchayarca. Chashna anchayashpami huañurca.

18Chaimantami chai huarmica Eliastaca:

—Diospac runa cantaca ¿Ima mana allitatac ruhuashcaniyari? ¿Ñuca juchacunata yuyachishpa, ñuca cari huahuata huañuchingapacchu ñucapacman shamurcangui?— nirca.

19Shina nicpimi Eliasca:

—Cambac cari huahuata caiman apamui— nirca.

Shina nicpi, chai huahuata apamucpimi Eliasca huahuata japishpa, paipac ucuman apashpa cama jahuapi sirichirca.

20Chaipi sirichishpami, Eliasca Mandac Diosta sinchita caparishpa mañashpaca: «¡Ñucata Mandac Dioslla! ¿Ñucaman cai viuda micunata caracushca jahuachu huahuata huañuchishpa, paitaca llaquichingui?» nirca.

21Eliasca chai huahuapac cuerpota quimsa cutincaman ucllarishpami, Mandac Diostaca: «¡Ñucata Mandac Dioslla, cai huahuapac almata paipac cuerpoman cutichi!» nishpa, sinchita mañarca.

22Elías mañashcata Mandac Dios uyashpami, huahuapac almata cutichimushpa, chai huahuataca cutin causachirca.

23Eliasca paipac ucumanta huahuata marcashpa apamushpaca:

—¡Riqui, cambac huahuaca causarircami!— nishpami mamaman curca.

24Chaimantami chai huarmica Eliastaca:

—¡Diospac runa cactaca cunanmi yachani! ¡Mandac Diospac shimitapish mana llullashpa huillashcataca cunanmi yachani!— nirca.