1Quipa punzhacunapi llaqui punzhacuna shamuna cashcatapish yachanami cangui.
2Chaipica quiquinlla alli canata, cullquita yallimana charinata munaccuna, jatun tucushcacuna, Diosta mana alli nishpa rimaccuna, taita mamata mana cazuccuna, mana pagui niccuna, rumi shungucuna,
3cuyaita mana chariccuna, mana llaquiccuna, mapa yuyaicuna shamucpi mana jarcariccuna, imatapish parlariccuna, shuccunata mana allichu niccuna, imapish allicunata piñaccuna,
4mana confiarinacuna, mana pingaccuna, allimi canchic niccuna, Diosta cazunapac randica millaita ruhuashpa cushicuccuna,
5Diosta cuyaccunami canchic nishpapish, paicuna ruhuashcahuan mana allitac ricuchiccunami cangacuna. Chashna gentecunahuanca ama tandaringuichu.
6Paicunapuramantami maijancunaca huasicunaman yaicushpa, imatapish criclla, millai yuyaicuna aticpi juchalliclla huarmicunata pandachincuna.
7Paicunaca punzhanta yachacushpapish, cashcata nic yachachishcataca mana yachac chayancunachu.
8Janes, shinallatac Jambres brujocuna Moisesta jarcac shinami, chai gentecunaca cashcata nic huillanataca jarcancuna. Chaicunaca imapish alli yuyaita mana charishpami, crinatapish saquishpa sinchiyashcacuna.
9Shina cashpapish tucui gentecuna paicuna juizhu illac cashcata yachashpami, chai runacuna tucushca shina, mana unai huatacaman crichingacuna.
Ña tucuchingapac Pablo Timoteoman mingashcamanta10Chashna cacpipish canca ñuca yachachishcatapish, ñuca ima shina causacushcatapish, ima yuyaita charishcatapish, mana utca piñaric cashcatapish, cric cashcatapish, cuyac cashcatapish,
11llaquita apashpa cushicuc cashcatapish yachanguimi. Antioquía pueblopi, Iconio pueblopi, shinallatac Listra pueblopi ñucata piñashpa llaquichishcata yachanguimi. Chashna llaquichicpipish, Apunchic Jesusllatacmi tucui chaicunamantaca huacaichirca.
12Maijanpish Apunchic Jesus-huan shuclla tucushpa, paipaclla causanata munaccunaca llaquita apangami.
13Ashtahuanpish millaita ruhuaccunapish, shinallatac shuccunata pandachiccunapish punzhanta ashtahuan ashtahuan mana allipi catishpami ashtahuan pandachishpa, paicunapish pandaringacuna.
14Chashna canapac randica, can imata yachacushcata crishpa alli catingui. Canca pi yachachishcataca yachanguimi.
15Huahuamanta pachami Dios quillcachishcataca yachangui. Chaillatacmi Jesucristota crishpa quishpirichun yachacta ruhuanga.
16Dios quillcachishcaca tucuimi Diosllatac yuyaita cushpa quillcachishca. Chaimantami yachachingapacpish, mana alli ruhuaccunata rimangapacpish, cunangapacpish, shinallatac cashcata ruhuashpa causanata yachachingapacpish alli.
17Chashna yachachishca cashpami, Diospacta ruhuaccunaca imatapish allita ruhuangapac allichirishca canga.
Who We AreWhat We EelieveWhat We Do
2025 by iamachristian.org,Inc All rights reserved.
